Македонија
Арсовска ја потпиша Платформата за хуманитарна помош со Црвениот крст на град Скопје

На Светскиот ден на Црвениот крст се креира Платформа за унапредување на соработката помеѓу Црвен крст на град Скопје и Градот Скопје во делот на подготвеност и одговор во случај на катастофи, која денес ја промовираа градоначалничката на град Скопје Данела Арсовска и Сузана Тунева Пауновска, секретар на Црвениот крст на град Скопје.
-Проактивноста во делувањето на Црвениот крст е од исклучителна важност за бројни категории на граѓани за чија добробит делуваат волонтерите на Црвен крст, преку илјадници акции и активности во текот на целата година, вклучително и оние за најранливите групи на граѓани, за кои оваа грижа придонесува за позитивна промена во нивниот живот, изјави градоначалничката на Скопје Данела Арсовска по потпишувањето на Платформата.
Арсовска истакна дека соработката со Црвениот крст треба да се унапредува, па затоа токму на овој ден кога се одбележува важноста на организацијата, се креира Платформа за унапредување на соработката помеѓу Црвен крст на Град Скопје и Градот Скопје во делот на подготвеност и одговор во случај на катастрофи.
-Оваа платформа ги активира ресурсите за делување за помош на граѓаните во случај на катастрофи. Ќе се формираат оперативно функционални мобилни тимови кои ќе бидат во служба на граѓаните, при потреба од евакуирање, медицинска поддршка и транспорт на лица, како и обезбедување и дистрибуција на хуманитарна помош. Соработката со Црвениот крст за нас е од голема важност бидејќи со зголемување на активностите се обезбедува помош онаму каде што е најпотребна, а преку почитување на основните принципи на Црвениот крст ја мобилизираме вистинската моќ на хуманоста, додаде градоначалничката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Филипче од Крушево: Илинден е нашиот темел – заедно да ја продолжиме борбата за Македонија

Претседателот на СДСМ, Венко Филипче денеска од Крушево го честита 2 Август, Денот на Републиката – Илинден.
„Го честитам празникот Илинден од историското и храбро Крушево, од каде што тргна револуцијата, од каде што тргна големата борба, епопејата за слободна, независна држава. Денеска ги славиме и двата Илиндени, и тој од 1903-та и тој од 1944-та и АСНОМ. Мора прво да се присетиме и да оддадеме признание на сите жртви коишто со својата крв, со својата жртва се вградија во темелите на нашата модерна држава. Тие ја започнаа борбата за да од една сиромашна, полуфеудална и неразвиена земја ние сега живееме денеска во модерна и развиена држава“, кажа Филипче.
Тој додава дека „нашата мирновременска борба не е завршена, дека мораме уште многу напорно да работиме, да конечно станеме дел од Европа каде што припаѓаме, и цивилизациски, и културно, и географски“.
„Сите заедно мора да работиме и да ги оставиме настрана и поделбите и квалификациите на патриоти и предавници, затоа што вистински патриотизам е само унапредување на нашата држава“, истакна претседателот на СДСМ.
Македонија
Kостадиновски: Нашето современо илинденско наследство е вистинската посветеност на владеењето на правото и правната држава

Претседателот на Уставниот суд, Дарко Костадиновски, упати честитка по повод Денот на Републиката, 2 август – Илинден.
„Денес, 122 години од Илинденското востание и 81 година од Првото заседание на АСНОМ, со воодушевеност си припомнуваме за епохалните победи и незаборавените жртви на нашите илинденци, на создателите на нашата Република.
Илинден е вечна инспирација за современа и праведна држава, симбол на визионерство и непокор, но и потсетник за должноста којашто ја имаме кон нашите предци и иднината којашто им ја должиме на нашите деца.
Чекориме во слободна држава, во земја која ги слави и возвишува идеалите на патриотизмот преку слободно и достоинствено живеење.
Чин на највисок патриотизам денес претставува вистинската посветеност на владеењето на правото и градењето на правната држава. Тоа е нашето современо илинденско наследство.
Да продолжиме со истиот жар и стремеж за правда, секој од нас да ја исполни обврската кон илинденците и никогаш да не згасне борбата за просперитетна, прогресивна, но пред сè правна држава!
Нека ни е честит Денот на Републиката!
Честит Илинден!“, стои во честитката на Костадиновски.
Македонија
ВМРО-ДПМНЕ: Илинден е ден на обединување, ден кога сите треба да се поклониме пред минатото и да се заветиме за иднината

ВМРО-ДПМНЕ упати честитка по повод Илинден.
„Илинден е симбол на нашата непокорност, заветот на Крушево и борбата на партизаните за слободна Македонија. Тоа е ден кога се преклопуваат идеалите на сите генерации кои сонуваа за држава своја, слободна и праведна.
Илинден е и Крушевската Републикa, замислена како дом на сите луѓе, без разлика на вера и народност. Илинден е и АСНОМ, темелот на современата македонска држава, каде што повторно се повтори истиот идеал: Слободна Македонија, за македонскиот народ и за сите нејзини граѓани.
Денес, на нас е да ја чуваме слободата, да ја унапредуваме демократијата, да ја развиваме државата. И тоа во услови кога има многу предизвици, негаторски политики и разлилни пропаганди.
Илинден е и ден на обединување.Тоа е ден кога сите треба да се поклониме пред минатото и да се заветиме за иднината.
Нашата мисија е јасна, Македонија мора да победи. Да ја вратиме правдата, да го зачуваме идентитетот, да ја изградиме државата која ќе биде дом на достоинството и просперитетот. Илинден е најголемата вистина која живее, епопејата на народот за слобода и своја држава.
Честит Илинден!
Да живее Македонија!“, стои во честитката на ВМРО-ДПМНЕ.