Веројатно пазарџиството по кое е познат Зоран Заев ја зарази и бугарската политичка сцена, па така ќе добиеме би рекол непристојни понуди од Слави Трифонов, кој ќе се обиде да прави трговија на Бугарија за нешто што ним им е потребно како држава и сето тоа на грбот на македонските граѓани, изјави портпаролот на ВМРО-ДПМНЕ, Димче Арсовски, одговарајќи на новинарско прашање во врска со изјавите на Слави Трифонов поврзани за спорот на Бугарија со Македонија.

Арсовски истакна дека „кога Бугарите нашле Влада што молчи на секоја нивна провокација, тоа станува нормално однесување, но она што не е нормално е тоа што Владата во Македонија предводена од СДСМ продолжува да глуми нормалност, а молчењето значи одобрување, но одобрување само од нивна страна, а не од јавноста“.

„И додека Владата на СДСМ молчи на новите пазарења со Бугарија, факти што се случија во меѓувреме се дека најпрвин поскапе струјата над 15 проценти, потоа ја укинаа евтината тарифа, кои сами ја воведоа, метанот што го рекламираа за најеколошки го поскапеа 120 проценти и поскапеа одново горивата за граѓаните, а од акцизата власта не се откажува сѐ уште и дополнително можеби сѐ уште ќе ја зголемува“, посочи Арсовски.

Арсовски истакна дека петта работа што се случува во моментот додека Владата на СДСМ молчи на бугарските провокации е тоа што се појави ново сведоштво дека парите од рекетот, како што рече, завршиле во Струмица.