Македонија
АСОМ до Пендаровски: Не дозволувајте вашиот потпис да загрози 10.000 животи

По вчерашното изгласување на предлог измените на Законот за игри на среќа, од Асоцијацијата на спортски обложувалници на Македонија (АСОМ), уште еднаш, преку писмено соопштение, го искажуваат револтот за ова, како што велат, бескрајно самоволие на власта и насилно протнување на законот со европско знаменце.
„Во оваа прилика, сакаме и уште еднаш јавно да се обратиме до претседателот Стево Пендаровски, кој и самиот побара на законските измени за игрите на среќа да не се брза со процедурата со европско знаменце без претходно да се поведе сеопфатна и стручна дебата со цел да се дојде до балансирано решение во интерес и на вработените и на граѓаните.
Претседателе, дали сега, кога Вие сте последниот чекор до спроведување на овој контроверзен закон, ќе ги потпишете овие измени? Дали кога сте ставени пред свршен чин, ќе дозволите ваквиот закон, за кој е повеќе од очигледно дека не постои јасна европска директива, да помине без никаква јавна расправа ниту дискусија“, прашуваат од АСОМ.
„Целата јавност слушна дека и самиот рековте дека треба да се соочат сите аргументи низ стручна дебата и да се дојде до вистинско и балансирано решение, меѓутоа ние, членките од АСОМ и од АПИС кои претставуваме 95% од пазарот за игри на среќа, немавме ниту една прилика аргументирано да го дадеме нашиот коментар.
Претседателе, Вие и самиот сте европски ориентиран политичар, па оттука прашуваме: дали треба да се потпише закон кој нема никаква врска со европското законодавство и за кој класично се злоупотреби европското знаменце, само за да се протурка по брза постапка за нечии крајно сомнителни и контроверзни бизнис интереси? Овој закон не беше ставен ниту на ЕНЕР, ниту имаше јавна расправа, што сериозно го поткопува интегритетот на ЕУ и нејзините вредности.
Всушност, потпишувањето на измените на Законот ќе ја затвори целата индустрија за игри на среќа, принудувајќи 10.000 луѓе да останат без работа. Вкупно, директно и индиректно ќе бидат погодени 54.000 луѓе, а многу сродни бизниси и компании сериозно ќе настрадаат.
Дали сакате да ги носите на совест овие илјадници семејства? По овие измени, утре, некоја мајка веќе нема да може да си дозволи роденден за своето дете; некое семејство веќе нема да биде во можност да го отплаќа својот кредит, а го зеле затоа што биле финансиски стабилни. Потпишувањето на овој закон ќе придонесе и стотици млади луѓе да го бараат своето чаре во странство.
Претседателе, имајте слух, луѓето се исплашени. Сите тие чесно го заработуваат својот леб во целосно легална индустрија, кај стабилни компании. Истите тие луѓе ниту еднаш не се посомневале дека ќе го изгубат своето работно место, и тоа не поради своја лична одговорност, туку поради некакви измени на закон.
Претседателе, повеќе десетици пати, на сите временски прилики и неприлики, излегуваме со нашите вработени пред Собранието за да го искажеме нашиот револт. Сега е на вас да бидете пред сè човек! Не дозволувајте судбината на 10.000 лица да биде во ваши раце. Оваа бројка од 10.000 луѓе не е само статистика; тие се мајки и татковци, браќа и сестри, чесни вработени, сите со свој придонес во нашето општество. Нивните основни средства за живот, нивните аспирации и планови за иднината, но на крајот и нивното достоинство, се сега доведени во прашање.
Зад секое работно место всушност стои цело семејство, кое сега се бори со несигурност. Па затоа, Претседателе, како чувар на нашата колективна благосостојба, денес уште еднаш апелираме на Вашата емпатија, повикувајќи Ве да бидете чувар на надежта, но и на отпорот против неправдата. Вашата одлука носи тежина на илјадници лични приказни и затоа не дозволувајте Вашиот потпис да ги загрози животите на оние кои веруваат во вашиот збор“, се наведува во соопштението на АСОМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Ајфонот е на братучед ми“ – Дудуш вели дека се сликал со телефонот за да го промовира бројот 17 за изборите

Градоначалникот на Шуто Оризари и кандидат за нов мандат, Курто Дудуш, објави дека фотографијата со „ајфон 17 про макс“ имала за цел да го промовира бројот 17 со кој ќе настапи со „Унија на Ромите“ на локалните избори.
За скапиот телефон, кој чини над 1.000 евра, Дудуш вели дека не е негов, туку на неговиот братучед, Алмир Дудуш – познат бизнисмен во Шуто Оризари.
Преку социјалните мрежи, Дудуш објаснува дека телефонот бил искористен како визуелен елемент за привлечност пред медиумите, при што, како што вели, медиумите веднаш загризале и се фокусирале на сликата, наместо на програмските идеи и проекти.
Дудуш наведува дека целта е остварена – бесплатна реклама на изборниот број.
Македонија
Филипче: СДСМ отсекогаш била повеќе од партија, била движење за слобода

Вечерва СДСМ и коалицијата по слоганот „Се бориме за нашиот дом“, ја претставуваат програмата од Пробиштип од каде лидерот на СДСМ Венко Филипче порача дека не смее да се доволи Македонија да стане приватна сопственост.
„Од овде, од Пробиштип, испраќаме јасна порака – да го одбраниме нашиот заеднички дом. Да ја одбраниме Македонија како дом за сите, не како приватна сопственост на неколкумина од власта. Македонија е наш заеднички дом – дом во кој секој граѓанин е еднаков, во кој има место за сите, а не само за привилегираните околу власта. Да изградиме општество каде што младите ќе остануваат, а не ќе заминуваат. Да создадеме Македонија во која чесниот труд ќе се вреднува, а не партиската книшка“, рече Филипче во Пробиштип.
Притоа тој истакна дека изборот на локалните избори не е само политичка, туку е битка за праведност, за достоинство и за иднината на следните генерации.
„СДСМ отсекогаш била повеќе од партија, била движење за слобода, за правда, за еднаквост. Нашите корени се во АСНОМ, во генерации што ја вградија темелната вредност државата да биде дом на секој човек. Вечерва таа вредност ја ставаме на прво место. Зашто без вас, без нашето јадро, без нашето членство, нема СДСМ. Без вас, нема иднина за правда, за еднаквост, за грижа“, рече тој.
Филипче исто така порача дека е време да се врати надежта и да се покажее дека СДСМ знае да ја исправи државата во секое маало и секоја зграда.
„Не ветувам лесен пат. Ветувам борба чесна, упорна, со главата горе. Ние сме наследници на идејата за слободна, праведна и солидарна Македонија. Време е да се собереме и да ја изградиме силата што ќе ја запре неправдата и ќе ја врати државата во рацете на народот“, рече Филипче.
Македонија
Лабудовиќ: Центар ќе го вратиме во рацете на граѓаните, време е за нова енергија и вистински промени

Кандидатот за градоначалник на Центар од редовите на Движењето ЗНАМ за Наша Македонија, Мирослав Лабудовиќ, заедно со министерката за финансии Гордана Димитриеска Кочоска, остварија средба со граѓаните на Центар, на која во фокус беа проблемите кои ја засегаат општината – урбанистичкиот хаос, загадувањето, недостигот на паркинг и потребата од повеќе зелени површини и подобра инфраструктура.
„Центар не смее да остане заглавен во апатија и хаос. Време е да ја прекинеме праксата на импровизации.
Мојата визија е јасна – чист и зелен Центар, со современа инфраструктура, со правилен урбанизам и транспарентна локална власт што ќе биде сервис на граѓаните, а не на малкумина привилегирани.
Ќе ја вратиме општината во рацете на жителите и ќе изградиме средина во која младите ќе сакаат да останат и да создаваат своја иднина.“ – истакна Лабудовиќ.
Лабудовиќ посочи дека Центар заслужува раководство што работи како вистински сервис на граѓаните – со подобра комунална инфраструктура, решенија за сообраќајниот метеж, нови простори за спорт и рекреација и културен развој кој ќе ја врати душата на општината.
За да се постигнат вистински промени, потребно е обединето дејствување. Во тој контекст, соработката меѓу Движењето ЗНАМ и ВМРО-ДПМНЕ е клучна, како гаранција за стабилност, системски решенија и долгорочни резултати за Центар.
„Само заедно можеме да го изградиме Центар кој ќе му припаѓа на народот. Секоја средба со граѓаните е потврда дека силата е во заедништвото, во искрените разговори и конкретните решенија. Ви благодарам за довербата, таа е најголемата мотивација да донесеме вистински промени.“ – додаде Лабудовиќ.
Центарци изразија целосна поддршка за Лабудовиќ, нагласувајќи дека е време за нова енергија, визија и чесно водење – Центар да стане општина со која сите ќе се гордееме.