Поранешниот директор на Клиниката за онкологија, Никола Васев, кој заедно со тројца други онколози е обвинет за несовесно лекување пациенти, денеска, пред Основниот кривичен суд Скопје изјави дека не се чувствува виновен. Вината, денес, пред судот, ја отфрлија и обвинетите Драган Јакимовски и Симонида Црвенкова, кои истакнаа дека својата кариера ја посветиле на лекување на пациентите.

Докторката Мери Пешевска, од друга страна, ја прифати одговорноста во делот на своите лозинки за пристап до системот, кои, како што рече, биле оставени на шалтер, но тоа било направено со цел побргу да минуваат пациентите и да се аплицира терапијата за нив. Одбраната на Пешевска побара раздвојување на постапката.

Обвинителката Ана Гоговска-Јакимовска рече дека обвинетите свесно и систематски постапувале спротивно на стандардите на светските и на европските онколошки упатства, при што кај 29 пациенти биле применети неподобни терапии со отстапувања во дозирањето и без соодветна процена на здравствената состојба.

Обвинителката нагласи дека несовесното постапување било овозможено и со соработка со Пешевска, која му дала пристап до системот на Васев, а со тоа се финализирале терапии без соодветен надзор.

Според Обвинението, кај 29 пациенти биле применети неподобни терапии, со отстапувања во дозирањето и без соодветна процена на здравствената состојба. Покрај тоа, Васев и поранешниот економски директор се соочуваат со дополнително обвинение за злоупотреба на службената положба и проневера, со штета од над 2,2 милијарди денари.

Пред три дена во Скопје ЗОО почина младо мајмунче од видот гибон за кој, според нашите сознанија, по извршениот патолошкиот наод, се појавува повторно оваа инфекција туберкулоза од истиот тип како и кај ламите, кои починаа пред еден и пол месец, изјави Стефан Кирков, советник во Советот на Град Скопје од ВМРО-ДПМНЕ.

„Пред речиси еден и пол месец починаа три лами од туберкулоза, а кај другите две исто така се детектира оваа болест, која знае да биде пренослива од животно на животно, од човек на човек, и сето тоа, замислете, имаше обид да се скрие од јавноста, но по допрен глас од мене и по моја пријава во Агенцијата за храна и ветерина, сето тоа беше набрзина откриено и обелоденето со опомена за установата и казни за директорот. Пред само три дена во ЗОО Скопје почина и младо мајмунче од видот гибон за кој, според нашите сознанија, по извршениот патолошкиот наод, се појавува повторно оваа инфекција туберкулоза од истиот тип како и кај ламите. Оттука, се прашуваме колку животни пцовисаа од оваа болест и епидемија, која очигледно ја има во скопската Зоолошка градина, уште колку животни се болни и дали сето ова претставува голема опасност за посетителите, но и за вработените во оваа установа?“, праша Кирков.

Тој апелира институциите да направат координативно тело и да се направи целосен преглед во оваа установа и доколку е потребно, и привремено да се затвори сè додека не се осигури дека сите животни се здрави и додека безбедноста во оваа установа за посетителите и за вработените е загарантирана.

„Како советник во Град Скопје размислувам да иницирам барање за свикување вонредна седница на Советот на Град Скопје со една единствена точка на дневниот ред, а тоа ќе биде ситуацијата со епидемијата во скопската Зоолошка градина, но и барање одговорност од менаџментот, седница на која ќе побарам од службите на Градот да се обезбеди присуство, конечно, на директорот на оваа установа, како и на градоначалничката Данела Арсовска како негова претпоставена. Како советник во Градот побарав информации од јавен карактер од оваа установа за бројката на пцовисани животни и добив одговор дека изнесува некаде 30-ина за три и пол години, но, според моите информации, овие бројки се навистина и двојно повеќе. Сето ова на седница на Советот јавно ќе го обелоденам, детаљно и прецизно како јавноста би имала увид во сè што се случува во оваа установа наречена Зоолошка градина“, рече Кирков.

Дивата депонија Вардардиште пак гори и ги труе скопјани. Еколошка бомба, закана за над 150.000 граѓани од Аеродром, Гази Баба, Кисела Вода но и за цело Скопје. Четири години неспособната локална власт на ДПМНЕ не успева да реши една дива депонија што шири зараза и смрт. Ова е врв на неработење, негрижа и криминална рамнодушност, изјави Каја Шукова, кандидатка за градоначалничка на Град Скопје.

Таа вели дека СДСМ има конкретно и издржано решение за Вардариште.

„Итно оградување и заштита на просторот на Вардариште, со пристап само за комунална хигиена. 24-часовно физичко обезбедување за превенција од палење на отпадот.
На подолг рок: изградба на нова претоварна станица по сите европски стандарди и воведување систем за управување со отпадот. Од собирање до селекција и финално депонирање во Дрисла“, рече Шукова.

Таа додаде дека советничката група на СДСМ ќе бараме итно свикување на седница на советот на Град Скопје за Вардариште.

„Не може советот да биде на страна а скопјани да се гушат, тоа е недозволиво. Мора службите на градот да добијат задача за итно надминување на проблемот со горење на отпадот во Вардариште“, рече Шукова.