Директорот на Агенција за храна и ветеринарство, Зоран Атанасов, денеска одржа работен состанок со претседателот на Ветеринарната комора на Република Северна Македонија, Томислав Николовски, на кој беше разгледана динамиката на активностите кои ги спроведуваат ветеринарните друштва на терен за реализација на Годишната наредба за здравствена заштита на животните.

Атанасов на состанокот оцени дека течат бавно активностите за вадење крв од овците за дијагностичко испитување на бруцелозата. Тој побара од првиот човек на Комората во наредниов период ветеринарните друштва да ги забрзаат активностите на терен со цел сточарите да можат да го запазат законскиот рок за аплицирање за добивање субвенции.

На состанокот беше разгледана можноста за електронска идентификација на овците, за што заедничка беше констатацијата дека примарно во моментов е да се утврди реалната бројна состојба на овците во одгледувалиштата, за што веќе се спроведуваат активности од страна на официјалните ветеринари и ветеринарните друштва со кои Агенција има потпишано договори. Зависно од тоа колкав реално ќе биде бројот на овците на терен, дополнително, со влезот на земјата во Европската Унија, ќе се одлучи и дали ќе се премине на системот на електронско обележување на овците.

За претстојното идентификување на копитарите со микрочипови, на состанокот беше заклучено дека е потребно во текот на идната недела да се изврши обука на ветеринарните од ветеринарните друштва кои ќе ја реализираат оваа активност, за начинот на внесување на податоците во модулот за копитари во Информацискиот систем на Агенцијата за храна и ветеринарство.