Македонија
АХВ ќе врши попис на свињите како превенција од болеста Африканска чума

Агенцијата за храна и ветеринарство донесе решение за спроведување попис и идентификација на приемчиви животни на болеста Африканска чума кај свињите, со што ги прошири превентивните мерки за спречување на појава и ширење на оваа болест.
„Согласно со решението, пописот ќе го спроведат ветеринарните друштва кои со Агенцијата имаат потпишано договор за реализација на активности од јавен интерес, почнувајќи од 8 ноември, и истиот ќе заврши на 31 декември годинава. Во рамки на оваа активност, попишани и идентификувани ќе бидат сите свињи кои се одгледуваат во земјава, во комерцијалните фарми, но пред сè во селските домаќинства, дури и оние кои одгледуваат по една свиња, а ќе се изврши и регистрирање на новите одгледувалишта“, велат од АХВ.
Регистрацијата на одгледувалиштата и идентификувањето на свињите со ушни маркички ќе биде на трошок на Агенцијата и обезбедени од Програмата за здравствена заштита на животните за 2018 година.
„Агенцијата за храна и ветеринарство ги повикува сите одгледувачи на свињи да го пријават одгледувалиштето/фармата и животните кои ги одгледуваат во најблиското ветеринарно друштво. Напоменуваме дека при евентуална појава на болеста Африканска свинска чума и кај нас, само регистрираното одгледувалиште и идентификуваните/обележани свињи се единствен правен основ одгледувачите да добијат отштета за убиените животни“, велат од Агенцијата.
Со пописот, ќе биде извршено ажурирање на податоците за одгледувалиштата и бројот на свињи кои се евидентирани во Ветеринарно-информативниот систем на Агенцијата за храна и ветеринарство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода дел од скопски Карпош

ЈП Водовод и Канализација известуваат дека денеска ( четврток) поради изведување на водоводен приклучок од ф – 100 мм на ул. Осло бр. 15б, во периодот од 09.00 часот па се до завршување на работата, без вода ќе останат корисниците од ул. Осло. ( општина Карпош )
Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.