Македонија
Ахмети вели дека ако излезе на улица нема враќање назад, „Вреди“ со коментар дека улицата е на народот, а не на милионерите

Можно е симпатизерите на ДУИ да излезат на улица, вели Али Ахмети, поради случајот со ексминистерот, Крешник Бектеши, кој се гони за лиценцата за дискотеката „Пулс“ во Кочани каде изби смртоносниот пожар.
Според Ахмети, се работи за политички прогон, а рече дека нема да се повлечат додека не се обезбеди неселективна правда и предвремени парламентрни избори.
„Ако Али Ахмети излезе на улица, враќање нема. Тој процес може да заврши само со предвремени парламентарни избори“, рече Ахмети за ТВ24.
Попладнево стигна реакција од неговите почитички опоненти Вреди/Влен кои велат дека улицата е на народот, а не на милионерите што се плашат од правдата.
„Дваесет години на власт – никогаш на улица за народот, секогаш во тишина за правдата. Сега, кога системот што си го изгради за себе се руши, Али Ахмети плаче за „улицата“, оти му се лизга тронот од раце и лажицата од уста!“, велат од коалицијата.
Го прашуваат Али Ахмети, каде бил кога во времето на неговото владеење со Груевски, Албанците се гушеле по затвори, а на нивното име се лепела етикетата „терорист“. Каде бил кога се измислувал Монструм, кога Сопот бил обвинет за тероризам, кога во Бродец се пролеала албанска крв, кога во Диво Насеље биле искористени за валкани политички сценарија.
Се додава дека денес, ДУИ се обидува да се претстави како жртва – ама единственото нешто што навистина ги плаши е правдата и гласовите на народот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Филипче беше најлошиот министер за здравство, ветуваше „европско здравство“ а создаде „Менгеле здравство“

Венко Филипче беше најлошиот менаџер и министер за здравство во историјата на Македонија. Двете обвиненија за случајот Онкологија се доказ плус за тоа, велат од ВМРО-ДПМНЕ.
Според нив, СДС на чело со Филипче како екс министер за здравство предизвика огромни финансиски загуби но и директно ги оштети онколошки болните кои остануваа без терапија.
„Деструктивните политики на Филипче и СДС, го уништија македонското здравство, во време на СДС и Филипче имаше бројни скандали во здравството како историскиот скандал на Онкологија.
Мандатот на Филипче беше обележан и со недостиг на регистар за следење на онколошката терапија.
Филипче е до гуша заглавен во скандалот со Онкологија. Филипче и Заев ветуваа „европско здравство“ а го претворија во „Менгеле здравство“ и целосен крах на здравствениот систем поради лукративни причини“.
Филипче и СДС, додаваат од ВМРО-ДПМНЕ, треба да знаат дека граѓаните повеќе нема да дозволат да бидат жртви на валканите игри кои со години го уништуваа здравствениот систем.
Нагласуваат дека не постои семејство во државата која не е засегнато директно или индиректно со Онкологија и со работата на оваа здравствена установа.
„Во време на Филипче како министер за здравство, здравјето на граѓаните беше заложник на бизнис мафијата блиска до СДС. Последиците од Филипче и СДС во здравството се катастрофални и штетни.
Крахот на македонското здравство во време на Филипче и СДС доведе до агонија кај пациентите, пациенти без терапии и без лекови, неефикасен систем на закажување термини и егзодус на лекарите.
Филипче дозволи здравствениот систем да се распадне. СДС е синоним за корупција криминал и предавство“, истакнуваат од партијата на власт.
Македонија
Сиљановска-Давкова во посета на Ватикан на манифестацијата „Македонија во чест на Св. Кирил“

Претседателката Гордана Сиљановска-Давкова од денеска ќе престојува во посета на Италија и на Ватикан и ќе ја предводи македонската државно-црковна делегација по повод манифестацијата „Македонија во чест на Св. Кирил“.
Денеска, Сиљановска-Давкова ќе присуствува на молебенот во чест на Свети Кирил во базиликата „Сан Клементе“.
На 24 мај, сабота, претседателката ќе ја посети базиликата „Санта Марија Маџоре“, каде што ќе положи венец на спомен-плочата на македонски јазик во чест на делото на Светите браќа Кирил и Методиј и ќе го посети гробот на папата Франциск.
Вечерта, во рамки на манифестацијата „Македонија во чест на Св. Кирил“, претседателката Сиљановска-Давкова ќе присуствува на концертот „Македонисимо“ на Симон Трпчески, настан во организација на македонското Министерство за култура.
На 26 мај, понеделник, во Апостолската палата, Сиљановска-Давкова ќе има аудиенција кај поглаварот на Римокатоличката црква, Неговата Светост, папата Лав IV и ќе оствари средба со државниот секретар на Светиот Престол, кардиналот Пјетро Паролин. Потоа, во Рим ќе има билатерална средба со претседателот на Италијанската Република, Серџо Матарела.
Во составот на македонската државно-црковна делегација којашто ќе ја предводи претседателката Сиљановска-Давкова, се предвидени Зоран Љутков, министер за култура и туризам; Елена Кузмановска-Биондиќ, државен секретар во Министерството за надворешни работи и надворешна трговија; Оливера Трајковска, директорка на Комисијата за односи со верските заедници и религиозни групи; митрополит тетовско-гостиварски г. Јосиф, епископ Стобиски г. Јаков од МПЦ-ОА и протојереј ставрофор отец д-р Зоран Стојанов од Католичката црква.
Македонија
Мицкоски продолжува и на јавна сцена да демонстрира одбивност кон Албанците, велат од ДУИ

Јавното понижување на градоначалникот на Тетово пред сите камери, пред целата јавност, всушност преставува логична последица на моноетничката доминација во Власта, која со тек на времето сѐ поизразено излегува на површина, велат од ДУИ.
Ова, според партијата на Ахмети, не е првпат Мицкоски вака да се однесува кон Албанците.
„Тоа не е случајност. Тоа е израз на неговите лични преференции во политиката. Тоа е намерно потценување, овој пат на јавна сцена. Тоа е негов начин да покаже кој одлучува, а кој молчи. Или, како што и самите наоколу се фалат, тој го остварува своето предизборно ветување – „да им го покаже местото на Албанците во државава“. Не случајно Премиерот го дисциплинираше градоначалникот на прашањето за вработувањето на Албанците“.
Оваа системска неправда, како што истакнуваат, се одвива во континуитет, и тоа е една од клучните политики за остварување на моноетничката доминација.
„Прво го ставија Уставниот суд во полза на нивните предизборни ветувања и го укинаа Балансерот, потоа, без механизми за заштита од мајоризација, пристапија кон серија вработувања и унапредувања во сите институции без вработување на ниту еден Албанец со што полека се нормализира моноетничката доминација во администрацијата.
Албанците не го заслужуваат ова. Во Желино не беше понижен само еден човек, туку беше згазена Уставната децентрализација која е клучна придобивка за граѓаните од Рамковниот договор“.
Премиерот, додаваат од ДУИ, ниту има ингеренции, ниту смее да си дозволува било какви обиди за „дисциплинирање“ на градоначалник кој е избран од граѓаните. Особено, нагласуваат од таму, е поразително што на јавна сцена гледаме политичари Албанци како молчат и толерираат навреда од човек кој ги презира на секој можен начин.