Македонија
Ахмети: Верувам во европските вредности на Бугарија и се надевам дека ќе најдеме заедничко решение

Премиерот Зоран Заев ја ризикува својата политичка кариера, само за да го деблокира патот на земјата за интегрирање во Европската Унија, изјави лидерот на ДУИ, Али Ахмети, изнесувајќи став во однос на интервујто на Заев дадено за бугарски медиум, а кое наиде на бурни реакции во јавноста.
Ахмети изјави дека се надева на конструктивност од страна на Бугарија и додаде дека очекува помош од Брисел за побрзо изнаоѓање заедничко решение.
„Сметам дека господинот Зоран Заев има добра волја да реши важен проблем кој има врска со иднината на нашата земја за отворање на преговорите со ЕУ. Тој ја стави во ризик својата политичка кариера за доброто на земјата и граѓаните на Република Македонија. Знаете дека ние се солидаризираме со нашите македонски сограѓани и никогаш не сме оспорувале ништо, без оглед дали се работи за историја, јазик или култура. Порачувам да не нè обземаат емоциите, туку да бидеме рационални, што е можно поразумни за да го решиме ова прашање. Се надевам на поддршка од бугарска страна, која се изјасни дека е за наша интеграција во ЕУ, и верувам дека ќе покаже подготвеност да ги надминеме овие разлики и да го отвориме патот за членство во ЕУ. Верувам во европските вредности на Бугарија и верувам дека овие разлики ќе бидат надминати, набргу, во наредните денови“, изјави Ахмети по завршувањето на свечената академија во чест на Денот на албанското знаме.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без струја денеска делови од Бутел и Аеродром

Од ЕВН Македонија АД известуваат дека денеска без електрична енергија ќе останат:
– во периодот од 08.20 до 12.30 часот, дел од корисниците од ул. 1 во населба Радишани. (општина Бутел)
– во периодот од 09.00 до 12.00 часот, корисниците од ул. Горно Лисиче лоцирани на потегот од Маг Комерц, А-М Стил, Феромонт Инжинеринг кон село Долно Лисиче. (општина Аеродром)
Македонија
Дел од Аеродром денеска без вода

Од ЈП Водовод и Канализација известуваат дека денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Променливо облачно со повремен локален дожд

Времето денеска ќе биде променливо облачно со повремени локални врнежи од дожд. Ќе дува умерен до засилен ветер претежно од северен правец (локално над 60 km/h). Минималната температура ќе биде во интервал од 4 до 9, а максималната ќе достигне од 7 до 13 степени.
Во Скопје, променливо облачно со повремен локален дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 9, а максималната ќе достигне до 12 степени.
Времето во наредните денови
До среда ќе се задржи претежно облачно време со повремени локални врнежи од дожд и студени утра. Ќе дува умерен до засилен, а долж Повардарието повремено силен ветер од северозападен правец. Потоа следи период на стабилно и суво со постепен пораст на дневната температура.