Претседателот на ДУИ, Али Ахмети, и неговите најблиски соработници продолжија со средбите со граѓаните и партиските активисти како одговор на огнената група на ДУИ предводена од Изет Меџити, која интензивно разговара со базата на членови на ДУИ.

Ахмети од Гостивар им порача на своите членови дека не корумпира власта, туку стравот од губење на власта.

„Власта не корумпира, стравот корумпира, стравот од губење на власта, кои се нашите мисии, нашите задачи и нашите работни места, да бидеме повеќе посветени, да бидеме поангажирани, и тоа не само на телевизиските екрани и на ТВ-дебатите туку и со конкретна активност и посветеност и борба против криминалот и корупцијата бидејќи има и луѓе што велат дека се плашат да не ја загубат власта, а потоа прават лоши работи.

Зошто бараме ветинг (проверка)? Да престанат сите шпекулации и приказни и да им дозволиме на правосудните органи да одговорат кои се оние што ја злоупотребуваат довербата, сакаме правда, убаво филтрирана за да биде веродостојна и доверлива за одлуките што се носат. Ги повикуваме и другите страни да најдат заеднички пат за нужно да го почнеме ветингот и чесно да го завршиме затоа што само така можеме да одиме напред, со ветинг на секој политичар, секој законодавец и спроведувач на законот и секој функционер од централно до локално ниво.

Можете да протестирате колку сакате на Запад, но Западот не дозволува анархија, нема анархија на Запад, анархистите се мали групи што кршат прозорци и бојадисуваат институции. Ги слушам и внимателно ги следам реакциите во врска со измената на Уставот, политичките партии имаат должност да ја едуцираат масата затоа што оваа држава е силна со Македонци и Албанци, во оваа држава лојалноста кон државата зависи од тоа колку државата e лојална кон граѓаните“, рече првиот човек на ДУИ, Али Ахмети.

Тој им порача на „огнeните“ дека нема намера да го смени првиот вицепремиер Артан Груби.

„Сега велат, тргни го Артан. Нема да го сменам затоа што тоа е одлука на мнозинството“, порача Ахмети.

Првиот вицепремиер Артан Груби, кој деновиве е цел на незадоволната огнена група во ДУИ, се пофали со сè она што сработила ДУИ како дел од владите во последните две децении.

„Направивме сè, од Охридскиот рамковен договор како официјализирање на јазикот и знамето, администрација што изнесува 21 %, три универзитети и сите други достигнувања што ги направивме заедно. Ја пропуштивме само границата Љојан – Миратоц, која требаше да се потпише пред празниците, но поради тамошната политичка криза, верувам дека набргу ќе ја поминеме.

Сакам да споделам со вас една несекојдневна вест, која ја немавме во програмата, но гледајќи ги можностите што можеме да направиме, решивме и го потпишавме меморандумот со Бехтел Енка за Коридорот 8, што значи целосно уривање на автопатот Тетово – Гостивар. Нов пат со три ленти од секоја страна и спореден пат, кој ќе ги поврзува селата кон Кичево, и автопатот што поврзува со Охрид, набргу ќе имаме врска од Скопје до границата со Албанија“, истакна Артан Груби пред присутните.

Орце Костов