Македонија
„Ајде ако не, слави да прави“, судијката реагира што Зеќири си викнал дома доктор без судска дозвола, прати и психијатар за да му се утврди состојбата
 
																								
												
												
											Адвокатите на Мухамед Зеќири донесоа психијатар, кој е и вештак, за да образложи дека обвинетиот не е во добра психичка состојба поради што бараа одлагање на рочиштето. Докторот Александар Марцикиќ, пак, без судска дозвола, бил во домот на Зеќири, на што остро реагира судијката Фанка Јанчулева-Михаиловска. Психијатарот посочи дека состојбата на обвинетиот не е добра, но тоа за судот не е потврда, туку само индиција дека здравјето му е нарушено. Судијката Јанчулева-Михаиловска нареди друго вешто лице да го посети Зеќири и да види каква му е состојбата, а откога доктор Марцикиќ рече дека од четири до шест недели обвинетиот нема да може да следи судења.
„Јас бев кај Мухамед Зеќири дома. Имав консултација по барање на неговиот адвокат. Прашав дали ми треба дозвола од судот, а тој рече дека има слободен пристап на луѓе од страна“, изјави доктор Марцикиќ, на што доби укажување од судијката: „Лицата во куќен притвор се под ист режим како лицата во притвор. Само притворот го издржуваат во домашен притвор. За секој медицински преглед се бара дозвола од судот. Ова е преглед од доктор психијатар, судот нема дозвола“.
На ова реагира Мирослав Вуиќ, адвокат на Зеќири.
„Има забрана за лица вклучени во предметот. Нема друга забрана. Ако му е потребна брзата помош, исто треба да се бара дозвола?“, праша адвокатот, на што судијката му одговори: „Техничкиот советник не е брза помош. Ве опоменувам во иднина за секоја идна потреба за посета од доктор во домашна посета да барате дозвола од судот. Судот треба да биде во тек со здравствената состојба на обвинетиот. Не можете да влегувате кога сакате во домот на обвинетиот. Ајде ако не, слави да прави“, реагира судијката.
По ова, судијката Фанка Јанчулева-Михаиловска бараше повеќе информации од доктор Александар Марцикиќ за состојбата на обвинетиот. Еден од адвокатите на Зеќири бараше да се исклучи јавноста, но судијката беше децидна дека новинарите ќе останат бидејќи мора да се знае зошто и кој ги одлага рочиштата.
„Ова што сум го напишал не е теорија. Сум го посетил, сум имал преглед. Мојот впечаток е дека е влезен во депресивна состојба. Има клинички скали за евалуацијата на депресијата. Мојот клинички впечаток е дека човекот е во афективна депресија. По начинот на кој одговара, по моториката. Теоријата ја користам за да кажам за какво нарушување се работи во однос на интензитетот“, појасни докторот.
„Колку би траела таа состојба?“, праша судијката, а докторот одговори: „Минимум период во кој треба да даде впечатливи терапевтски ефекти се 4-6 недели. Тоа и го наведов во извештајот од денот кога почнал да прима терапија“.
Судијката се интересира дали ќе треба болнички третман, на што од докторот што го прегледал Зеќири без судска дозвола одговори: „Може да се размислува и за болнички третман. Тој ме известува преку ‘Вибер’ дека сопругата е постојано покрај него. Индикација за болнички третман се јасни и евидентни самоубиствени идеи, тогаш се одредува болнички третман. Кај него имаме самообвинување, но не сум забележал дека има самоубиствени мисли и тенденции. Затоа не предложив болничко лекување“.
Докторот беше дециден дека за две недели, за кога е закажано ново рочиште за случајот, Зеќири нема да може да дојде.
„Со ваков наод, сметам дека обвинетиот не е во состојба активно да го следи рочиштето и да учествува во градењето на сопствената одбрана“, рече докторот.
Судијката Фанка Јанчулева-Михаиловска издаде наредба друго вешто лице да го прегледа Зеќири и да ја утврди неговата здравствена состојба.
„Извештајот претставува само индиција за неговото психичко здравје. Судот ќе издаде наредба до вешто лице од областа на психијатријата за да даде мислење дали обвинетиот Зеќири може да присуствува и да го следи судењето со оглед на дијагнозата, а притоа да се цени и овој психијатриски извештај од доктор Марцикиќ. Се надевам дека ќе добиеме извештај до следното рочиште“, рече судијката.
Судењето се одложува вторпат по ред. Претходниот пат, кога полицајци тргнаа да го спроведат Зеќири, не успеаја. Ја известија судијката дека тој е во лоша здравствена состојба и дека е повикана брзата помош. Постоеше можност да биде задржан во болница, но, сепак, остана на домашно лекување.
Обвинителката Катерина Коларевиќ поднесе обвинение против ексгенералниот секретар на Владата, Мухамед Зеќири. Тој се гони за злоупотреба на службената положба и овластувањето, односно дека во повеќе наврати, без јавна набавка, избрал фирми на кои им исплаќал владини пари. Обвинителството тврди дека Зеќири го оштетил буџетот за речиси 1,5 милион евра, кои завршиле во приватни фирми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Македонија
(Видео) Минчев: Во недела масовно за бројот два, за Максим Димитриевски во Куманово, за Мирослав Лабудовиќ во Центар и Орце Ѓорѓиевски за Град Скопје
 
														Со повик за масовна излезеност на вториот круг од локалните избори што ќе се одржи задутре Движењето ЗНАМ – за наша Македонија ја заокружува својата изборна кампања што завршува вечерва на полноќ. Повикот го упати генералниот секретар на Движењето ЗНАМ Горан Минчев и до граѓаните и до симпатизерите и поддржувачите на ЗНАМ.
„Во недела, на 2 ноември, Ве повикувам сите членови, симпатизери и поддржувачи на Движењето ЗНАМ: излезете масовно и покажете ја вашата енергија, довербата и вербата во нашата визија. Да гласаме за број 2, за Максим Димитриевски во Куманово, број 2 за Мирослав Лабудовиќ во Центар и за број 9 за Орце Ѓорѓиевски за Град Скопје и за сите кандидати на нашите владини партнери каде што нашата заедничка поддршка носи промена. Ве повикувам сите граѓани, без разлика на политичка, етничка или верска припадност: да излеземе заедно и да гласаме за визија, за работа и за систем.
Да гласаме за иднина во која младите остануваат, семејствата живеат достоинствено, а државата функционира како дом за сите“, повика Минчев.
Тој искажа задоволство од резултатите што Движењето ЗНАМ ги постигна во првиот круг а кои, вели, дефинитивно ја потврдија стабилизацијата на гласачкото тели и станаа вистински показател дека политиките што ги водат се во вистинска насока. Истовремено се заблагодари и на коалициските партнери во власта – ВМРО-ДПМНЕ И ВРЕДИ.
„Граѓаните го препознаа нашиот концепт на чесна, директна и народна политика, која наидува на сè поголема поддршка низ целата држава. Посебна благодарност упатувам и до пријателите од ВМРО-ДПМНЕ, кои ја препознаа нашата искреност и визија, и застанаа рамо до рамо со нас. Ви благодарам за политичката зрелост и за поддршката во оваа заедничка борба за достоинствена, силна и обединета држава. Исто така, искрена благодарност до коалицијата ВРЕДИ, за поддршката и вербата дека само преку заедништво можеме да градиме држава во која има место за сите“, рече генералниот секретар на Движењето ЗНАМ.
Но, потенцираше Минчев, највредното од оваа кампања се средбите очи в очи со граѓаните. „Отворените врати, искрените насмевки и топлото добредојде што не пречека и што секојдневно го чувствувавме беше нашата најголема мотивација да истраеме и да покажеме што значи да се работи за народот и за државата“, порача Минчев, упатувајќи и посебна благодарност до активистите на Движењето ЗНАМ за несебичната пожртвуваност и поддршка и доверба во текот на сите пет недели од кампањата.
Македонија
67-годишен маж ја тепал сопругата, ја гушел и се обидувал со каиш да и ги врзе нозете: Семејно насилство во Петровец
 
														Јавен обвинител од Основното јавно обвинителство Скопје поведе постапка против едно лице за нанесување тешка телесна повреда од член 131 став 2 во врска со став 1 од Кривичниот законик.
При вршење семејно насилство тој со умисла тешко телесно ја повредил неговата сопруга. По кратка вербална расправија на 28 октомври во семејниот дом, осомничениот 67-годишен жител на селото Петровец физички ја нападнал сопругата, ја удирал со раце и нозе по целото тело и главата, ја гушел и се обидувал со каиш да и ги врзе нозете.
Жената на моменти губела свест, но успеала да се ослободи и преку прозорецот избегала кај соседите за да побара помош. Од семејното насилство се здобила со тешки повреди – скршеници на три ребра и хематоми.
Ценејќи ги сите околности, особено опасноста од бегство на осомничениот, но и веројатноста да го повторува насилството кое го вршел и во присуство на ќерките и малолетната внука, јавниот обвинител до судијата на претходна постапка од Основниот кривичен суд Скопје достави предлог за определување мерка притвор, соопшти обвинителството.
Македонија
Во недела сите масовно да излеземе на гласање, зошто додека седите дома, други одлучуваат за вашата иднина, порача Мицкоски
 
														Во привот изборен круг коалицијата предводена од ВМРО-ДПМНЕ, благодарение на поддршката на граѓаните, постигна историски резултат. За прв пат во независна демократска Македонија коалицијата предводена од ВМРО-ДПМНЕ на советничките листи победи во 58 општини плус главниот град, тоа се вкупно 59 општини. Имаме веќе избрани 33 градоначалници, во вториот круг имаме дополнителни 26 кандидати за градоначалници, а противкандидати на нашите кандидати во две општини веќе се откажаа, со што трката во вториот круг веќе е извесна и таму. А од останатите 24 очекувам во сите 24 општини да победат кандидатите на ВМРО-ДПМНЕ и да бидат градоначалници во своите општини, рече претседателот на ВМРО-ДПМНЕ, Христијан Мицкоски на денешниот митинг во Македонска Каменица во рамки на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.
Додаде дека очекува, со победата на Орце Ѓорѓиевски во Град Скопје, да се заокружи бројката од 60 градоначалници, што, како што оцени, е исто така историски резултат што никогаш не е направен во Македонија.
Мицкоски ги повика граѓаните на Македонска Каменица, но и на цела Македонија, да излезат да гласаат и на вториот круг во недела и тоа уште помасовно, затоа што со останувањето дома се дозволува некој друг да одлучува за иднината.
„Би сакал да се заблагодарам на сите граѓани коишто излегоа и гласаа во првиот круг и да ја искористам оваа прилика да ги повикам да излезат и да гласаат во вториот круг. Гледаме дека има наши граѓани коишто, можеби, со години не дошле во Македонија, но доаѓаат од земјите во западна Европа за да гласаат во општини како што се Брвеница и Кичево и така натаму. А, гледаме дека одредени наши сограѓани остануваат дома мислејќи дека на тој начин ќе покажат некаков револт, пркос или ќе испратат некаква порака, која во суштина нема да биде препознаена, бидејќи кога останувате дома дозволувате некој друг да одлучува за вашата иднина. Затоа мојата порака и мојата замолница до оние коишто сè уште се двоумат дали да излезат во овој втор изборен круг, е да излезат масовно и, нормално, да го заокружат бројот 9 за Димче, за идниот градоначалник на Македонска Каменица“, повика Мицкоски.
Мицкоски додаде дека ВМРО-ДПМНЕ се бори подеднакво за секоја општина и за секоја педа од македонската територија, што се покажа и во измината година и половина власт.
„Ние се бориме за секоја општина, се бориме за секој човек, се бориме за секој метар квадратен македонска територија, тоа го покажавме како Влада изминатите 16 месеци, така ќе биде и во овој втор круг. Затоа, кога велам дека очекувам сите 26 кандидати кои се во вториот круг сите да победат и да им се приклучат на оние 33, тоа и го мислам и ние како ВМРО-ДПМНЕ, како коалиција правиме се што можеме тоа да се случи и јас сум убеден дека во недела заеднички ќе испишеме уште една историја, којашто до сега не се случила во Македонија“, потенцираше Мицкоски.


 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											