Македонија
„Ајде ако не, слави да прави“, судијката реагира што Зеќири си викнал дома доктор без судска дозвола, прати и психијатар за да му се утврди состојбата

Адвокатите на Мухамед Зеќири донесоа психијатар, кој е и вештак, за да образложи дека обвинетиот не е во добра психичка состојба поради што бараа одлагање на рочиштето. Докторот Александар Марцикиќ, пак, без судска дозвола, бил во домот на Зеќири, на што остро реагира судијката Фанка Јанчулева-Михаиловска. Психијатарот посочи дека состојбата на обвинетиот не е добра, но тоа за судот не е потврда, туку само индиција дека здравјето му е нарушено. Судијката Јанчулева-Михаиловска нареди друго вешто лице да го посети Зеќири и да види каква му е состојбата, а откога доктор Марцикиќ рече дека од четири до шест недели обвинетиот нема да може да следи судења.
„Јас бев кај Мухамед Зеќири дома. Имав консултација по барање на неговиот адвокат. Прашав дали ми треба дозвола од судот, а тој рече дека има слободен пристап на луѓе од страна“, изјави доктор Марцикиќ, на што доби укажување од судијката: „Лицата во куќен притвор се под ист режим како лицата во притвор. Само притворот го издржуваат во домашен притвор. За секој медицински преглед се бара дозвола од судот. Ова е преглед од доктор психијатар, судот нема дозвола“.
На ова реагира Мирослав Вуиќ, адвокат на Зеќири.
„Има забрана за лица вклучени во предметот. Нема друга забрана. Ако му е потребна брзата помош, исто треба да се бара дозвола?“, праша адвокатот, на што судијката му одговори: „Техничкиот советник не е брза помош. Ве опоменувам во иднина за секоја идна потреба за посета од доктор во домашна посета да барате дозвола од судот. Судот треба да биде во тек со здравствената состојба на обвинетиот. Не можете да влегувате кога сакате во домот на обвинетиот. Ајде ако не, слави да прави“, реагира судијката.
По ова, судијката Фанка Јанчулева-Михаиловска бараше повеќе информации од доктор Александар Марцикиќ за состојбата на обвинетиот. Еден од адвокатите на Зеќири бараше да се исклучи јавноста, но судијката беше децидна дека новинарите ќе останат бидејќи мора да се знае зошто и кој ги одлага рочиштата.
„Ова што сум го напишал не е теорија. Сум го посетил, сум имал преглед. Мојот впечаток е дека е влезен во депресивна состојба. Има клинички скали за евалуацијата на депресијата. Мојот клинички впечаток е дека човекот е во афективна депресија. По начинот на кој одговара, по моториката. Теоријата ја користам за да кажам за какво нарушување се работи во однос на интензитетот“, појасни докторот.
„Колку би траела таа состојба?“, праша судијката, а докторот одговори: „Минимум период во кој треба да даде впечатливи терапевтски ефекти се 4-6 недели. Тоа и го наведов во извештајот од денот кога почнал да прима терапија“.
Судијката се интересира дали ќе треба болнички третман, на што од докторот што го прегледал Зеќири без судска дозвола одговори: „Може да се размислува и за болнички третман. Тој ме известува преку ‘Вибер’ дека сопругата е постојано покрај него. Индикација за болнички третман се јасни и евидентни самоубиствени идеи, тогаш се одредува болнички третман. Кај него имаме самообвинување, но не сум забележал дека има самоубиствени мисли и тенденции. Затоа не предложив болничко лекување“.
Докторот беше дециден дека за две недели, за кога е закажано ново рочиште за случајот, Зеќири нема да може да дојде.
„Со ваков наод, сметам дека обвинетиот не е во состојба активно да го следи рочиштето и да учествува во градењето на сопствената одбрана“, рече докторот.
Судијката Фанка Јанчулева-Михаиловска издаде наредба друго вешто лице да го прегледа Зеќири и да ја утврди неговата здравствена состојба.
„Извештајот претставува само индиција за неговото психичко здравје. Судот ќе издаде наредба до вешто лице од областа на психијатријата за да даде мислење дали обвинетиот Зеќири може да присуствува и да го следи судењето со оглед на дијагнозата, а притоа да се цени и овој психијатриски извештај од доктор Марцикиќ. Се надевам дека ќе добиеме извештај до следното рочиште“, рече судијката.
Судењето се одложува вторпат по ред. Претходниот пат, кога полицајци тргнаа да го спроведат Зеќири, не успеаја. Ја известија судијката дека тој е во лоша здравствена состојба и дека е повикана брзата помош. Постоеше можност да биде задржан во болница, но, сепак, остана на домашно лекување.
Обвинителката Катерина Коларевиќ поднесе обвинение против ексгенералниот секретар на Владата, Мухамед Зеќири. Тој се гони за злоупотреба на службената положба и овластувањето, односно дека во повеќе наврати, без јавна набавка, избрал фирми на кои им исплаќал владини пари. Обвинителството тврди дека Зеќири го оштетил буџетот за речиси 1,5 милион евра, кои завршиле во приватни фирми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
1570 сообраќајни прекршоци минатиот викенд, 758 за брзо возење

Изминатиов викенд полициските службеници од сите сектори за внатрешни работи, постапувајќи во делот на контролите на сообраќајот на патиштата низ земјава вкупно издадоа 1570 платни налози за сторени сообраќајни прекршоци повеќето по основ на Законот за безбедност на сообраќајот на патиштата, извести МВР.
Притоа, заради непрописно паркирање издадени биле 216 платни налози, за возење со брзина поголема од дозволената 758 санкции, а пак по основ на непоседување возачка дозвола 141 лице било отстрането од сообраќајот.
Исто така, евидентирани се 62 прекршоци за неносење сигурносен појас, изречени се 31 санкција за возачите на мотоцикл за управување без заштитна кацига, 27 мерки се изречени за користење на мобилен телефон при возење, а осум санкции за возачи кои минале на црвено светло, додека пак 61 возач е отстранет од сообраќај заради недозволено количество алкохол во крвта.
По основ пак на Законот за возила во посочениот период од сообраќај се исклучени 39 возила од кои 11 поради техничка неисправност, а 28 заради тоа што биле нерегистрирани, соопшти МВР и додава дека сообраќајните контроли продолжуваат и во наредните денови.
Македонија
Двајца браќа обвинети за убиство и за обид за убиство на подмолен начин

По спроведена истражна постапка, јавен обвинител од Основното јавно обвинителство Скопје денеска поднесе Обвинителен акт против две лица кои како соизвршители се товарат дека сториле едно кривично дело – Убиство од член 123 став 2 точка 1 и уште едно кривично дело – Убиство во обид предвиден со член 19 од Кривичниот законик.
Во текот на истрагата се обезбедени докази кои потврдуваат дека на 01.11.2024 година во Арачиново двајцата браќа на возраст од 23 и 31 година со умисла и на подмолен начин лишиле од живот едно лице и се обиделе да лишат од живот уште едно. Со двајцата оштетени – татко и син обвинетите се договориле да се најдат и да разговараат за наводен долг од 7.000 евра. Со автомобил пристигнале на договорената локација, но по краток разговор, едниот од обвинетите извадил огнено оружје – пиштол и започнал да пука кон жртвите. Од нанесените огнострелни повреди оштетениот татко починал, а синот се здобил со тешки телесни поврeди.
Јавниот обвинител до Основниот кривичен суд Скопје достави и предлог за продолжување на претходно определената мерка притвор за двајцата обвинети, бидејќи се уште постојат законските основи за најстрога мерка за обезбедување.
Македонија
Филипче ја следи политиката на Заев, кој со една раката на срцето се колнеше во македонската жичка, а со другата ја распродаваше, велат од ВМРО-ДПМНЕ

Венко Филипче се гордее со неговиот претходник, Зоран Заев и учи од него. Тој призна дека не сака да се одвои од неговата сенка и дека и народот треба да учи од неговото искуство и политики спроведени во минатото, велат од ВМРО-ДПМНЕ.
„Неговите политики спроведени во минатото од Заев, покрај криминал и корупција се предавството на националните интереси. Зоран Заев е човек кој со едната рака на срце се колнеше во македонската жица и тврдеше дека си ја сака земјата, додека со другата ја распродаваше. Откако со Бугарија влезе во процес на преговори и без око да му трепне, Заев прифати се што Бугарите од него побараа. Сега, таа попустлива политика на Зоран Заев спрема Бугарија, до најмал милиметар ја следи и неговиот наследник во СДС, Венко Филипче. Наместо државничка политика за заштита на националните интереси, Филипче инсистира на попустлива и политика на предавство на националните интереси“, според партијата на власт.
Од оваа партија оценуваат дека политиката на Филипче и СДС е предавничка.
„Пред некој ден потврди и Бујар Османи, кој призна дека со дозвола на СДС, со Бугарија преговарал за етнички прашања.
Со вакви погубни и предавнички политики и послушнички и поданички однос кон Заев, не е ни чудно што на последните анкети на јавното мислење, половина од граѓаните Филипче не го препознаваат за лидер на опозицијата“, додаваат од ВМРО-ДПМНЕ.
Со неговите потези, како што велат, Филипче само потврдува дека СДС продолжува да биде синоним за неспособност, криминал и предавства.