Македонија
Бабовски на 87. состанок на Советодавниот форум на Европската агенција за безбедност на храната

Јакнење на националните капацитети во областа процена на ризик за безбедноста на храната и подобрување на алатките за репортирање на националните податоци од спроведувањето на мониторинг програмите, во насока на поддршка на земјите во процесот на усогласување на националните со системот на Европската Унија, со цел обезбедување унифицирани, квалитативни и квантитативни податоци. Ова се дел од темите на кои денес и утре, во Парма, Италија, ќе се дискутира на 87. состанок на Советодавниот форум на Европската агенција за безбедност на храната (EFSA), на која во својство на член на Советодавниот форум на EFSA учествува и директорот на Агенција за храна и ветеринарство, Николче Бабовски.
На состанокот членките на Форумот ќе ги разгледаат и актуелните трендови поврзани со процената и комуникацијата на ризик во областа на безбедноста на храната и ветеринарната политика, а Форумот ќе биде искористен и за продлабочување на соработката и партнерствата не само со Европската агенција за безбедност на храна туку и меѓу земјите што имаат свои претставници во Советодавниот форум.
Акцент во дводневните дискусии ќе биде ставен и на комуникацијата на ризик поврзана со безбедноста на храната и здравствената заштита на животните за што ќе се дефинираат активностите меѓу сите земји членки на Форумот, кои координирано ќе се преземаат. Како алатка за зајакнување на националните капацитети на надлежните органи од областа на безбедноста на храната и ветеринарната политика, според планираното, на Форумот денес и утре, ќе се разговара и за зајакнување и на активностите за организирање школи за комуникација на ризик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Неколку скопски општини денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.00 до 13.00 часот, корисниците од улицата Црноризец Храбар, општина Аеродром;
– во периодот од 08.30 до 13.00 часот, дел од корисниците од село Сарај – пат за Љубин (кај Џамијата) општина Сарај;
– во периодот од 09.00 до 11.30 часот, поголем дел од корисниците од објектите со парен број на улицата Иван Цанкар во населба Влае, општина Карпош;
– во периодот од 09.00 до 13.00 часот, корисниците од ул. Елисе Поповски Марко, Киро Гавриловски, Антон Панов, општина Центар;
– во периодот од 09.00 до 14.30 часот, едл од корисниците од ул. Франц Прешерн со бр. од 20 до 40, општина Карпош;
– во периодот од 11.00 до 15.30 часот, дел од корисниците на ул Поп Богомил и трнодол, општина Карпош.
Македонија
Променливо облачно со сончеви периоди и со услови за дожд

Времето денеска ќе биде променливо облачно со сончеви периоди. Во западните и јужните делови ќе има повремен локален дожд и услови за појава на ретки грмежи. Ќе дува слаб до умерен ветер од североисточен правец. Минималната температура ќе биде во интервал од 6 до 11, а максималната ќе достигне од 16 до 23 степени.
Во Скопје, променливо облачно со сончеви периоди и со услови за слаб дожд. Ќе дува слаб до умерен ветер од североисточен правец. Минималната температура ќе се спушти до 11, а максималната ќе достигне до 23 степени.
Времето во наредните денови
Времето во следните денови ќе биде сончево со мала до умерена облачност и со умерен, повремено засилен северен ветер. Во вторник и среда утринските температури ќе бидат пониски, а дневните во постепен пораст.
Македонија
Полицијата казнуваше и денес, откри 96 сообраќајни прекршоци

Одделението за безбедност на патниот сообраќај при СВР Скопје денеска во периодот од 08:30 до 16:00 часот спроведе зајакната акциска контрола во делот на сообраќајот на територијата на град Скопје.
При контролата санкционирани се вкупно 96 учесници во сообраќајот, од кои изречена е 41 мерка за возење со брзина поголема од дозволената, 15 санкции за возачи на мотоцикл кои управувале без заштитна кацига, четири мерки за возење без возачка дозвола, две санкции за возење мотоцикл без поседување на дозвола со соодветна категорија, две мерки за малолетни лица за управување мотоцикл кои при тоа немале положено возачки испит за познавање на сообраќајните знаци и правила на сообраќајот, а едно лице било приведено во полициска станица за утврдување на идентитет за сторен сообраќаен прекршок по член 211 поради непочитување на знаци и наредби од полициски службеници и 31 мерка по други сообраќајни прекршоци, соопшти МВР.
Сообраќајните контроли продолжуваат и во наредните денови. Полицијата апелира до сите учесници во сообраќајот да ги почитуваат сообраќајните правила и прописи и сите заеднички да придонесат за подобри, посигурни и побезбедни патишта.