Македонија
Бавна правда: 650 судења се одложени за 1,5 година поради отсуство на обвинител
За една и пол година (2017 до јуни 2018 година) во скопскиот кривичен суд биле одложени 672 судења, од кои во Одделот за организиран криминал и корупција, биле одложени 650 поради отсуство на обвинител, покажаа податоците до кои дојде „Макфакс“ преку барање за слободен пристап до информации од јавен карактер. Таков е случајот со судењата за шарената револуција, каде рочишта се одлагаат на барање на обвинителките. На последното рочиште за предметот „Маѓар Телеком“ не се појави обвинителот Ермон Незири.
Од скопска единица велат: „Ве известуваме дека по извршени проверки во АКМИС системот, беше утврдено дека во горенаведениот период поради отсуство на јавен обвинител во Одделот за организиран криминал и корупција при овој суд, биле одложени 22 главни расправи, а во Кривичниот оддел за полнолетни биле одложени вкупно 650 главни расправи“.
Сашо Рајчев, шефот на скопското обвинителство за „Макфакс“ изјави дека причина за одлагањето на рочиштатата, меѓу другото, е недостигот обвинители, како и техничко-кадровските капацитети на институцијата која треба кривично да гони.
„По постојните одлуки за систематизација што ги носи Советот на јавните обвинители, во Основното јавно обвинителство Скопје се предвидени 61 јавен обвинител. Во 2017 година до денеска, пополнети се 46 места на јавни обвинители, од причина што 8 јавни обвинители се избрани во Обвинителството за гонење организиран криминал и корупција, 5 јавни обвинители се избрани во СЈО, што значи на 13 јавни обвинители им мирува функцијата во ОЈО Скопје, а две места се непополнети“, вели Рајчев.

Тој додава дека според постојните законски прописи во моментот не постои обејктивна можност тие места да бидат пополнети, бидејќи во согласност со Законот за јавното обвинителство, јавни обвинители во првостепените јавни обвинителства, може да бидат избрани од Советот на јавни обвинители, исклучиво од Академијата за судии и јавни обвинители, а во моментов нема такви кандидати за избор.
„Во тек е обука на нова генерација кандидати за судии и јавни обвинители, кои својата обука ќе ја завршат во 2019 година, а услови за нивен избор ќе се создадат во втората половина од крајот на 2019 година. Дотогаш објективно доколку не дојде до промена на законските прописи, и тоа како на Законот за јавното обвинителство, така и на Законот за Академијата за судии и јавни обвинители не постои објективна можност, овие места да бидат пополнети“, додава шефот на ОЈО Скопје.
Рајчев за „Макфакс“ објасни дека со примена на Законот за кривичната постапка од 1 декември 2013 година, обемот на работа на Јавното обвинителство е зголемена најмалку за трипати, во смисла што обвинителот раководи со предистражната постапка, дава наредби за обезбедување законити докази до правосудната полиција, во која влегуваат МВР, Царинската управа и Управата финансиската полиција, ја води истражната постапка и товарот на докажување во текот на главната расправа на поднесените обвиненија е на главниот обвинител.„ Еден стручен соработник работи со тројца до четворица обвинители, обвинителите често немаат записничари…“, вели Рајчев.
Шефот на скопското обвинитеслтво потенцира дека обвинителите водат предитраги, истраги, дежураат, а во исто време треба да се појавуваат на судски рочишта за предметите. И товарот на докажување во текот на главната расправа по поднесените обвиненија е на јавниот обвинител, а претходно по стариот ЗКП, судот беше тој што ги изведуваше доказите.
Во април 2018 година, изготвена е анализа со сите податоци и за обемот на работа, и за недостатигот на кадар. За ова се известени јавниот обвинител на РМ, Советот на јавни обвинители и министерката за правда, но досега нема промени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Без разлика на етничката, верската и политичката припадност, на 2 ноември да се обединиме во Кичево
После вториот круг очекувам 59 градоначалници да има коалицијата предводена од ВМРО-ДПМНЕ, со што ќе ја заокружиме највисоката бројка во историјата на демократската Македонија, по бројот на градоначалници, којашто некогаш се случила. И ако на тоа се додаде и извесната победа на Орце Ѓорѓиевски за град Скопје, којшто води 3:1 после првиот круг во однос на неговиот противкандидат, тогаш заокружуваме бројка од 60 градоначалници коишто ќе дојдат од коалицијата предводена од ВМРО-ДПМНЕ, вклучително и главниот град, рече претседателот на ВМРО-ДПМНЕ, Христијан Мицкоски на вечерашниот мини митинг во Кичево во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември во недела.
Мицкоски се осврна и на победата на коалицијата предводена од ВМРО-ДПМНЕ за листите на советници во 58 општини.
Додаде дека не било лесно, туку дека било тешко, но единството и поддршката на граѓаните покажале дека може да се совлада и помногуброен противник.
„Затоа е многу важно на 2 ноември во недела да се обединиме овде во Кичево, без разлика на нашите различности, без разлика дали тие различности се етнички, верски или политички. Многу е важно да бидеме како едно, да се обединиме околу вредностите коишто ги споделуваме, да се обединиме околу цивилизацијата којашто ја застапуваме. Затоа што јас сум убеден дека против кандидатот на Александар не ги споделува нашите вредности, не ја споделува нашата цивилизација. И секој оној којшто ќе го земе пенкалото во рака и ќе застане позади гласачката кутија, со гласачкиот лист пред него, нека го слуша својот разум и своето срце и нека гледа длабоко во својата душа, од таму ќе извира бројот 9. И нека го заокружи бројот 9, нека заокружи за Александар“, повика Мицкоски.
Секој оној кој ќе биде исправен пред предизвикот дали да го поддржи Александар или неговиот против кандидат, додаде Мицкоски, нека се присети на вредностите кои ги застапува Александар и вредностите кои ги застапува неговиот против кандидат.
„Дали вие сакате да живеете во средина во којашто ќе владеат криминалот, блуд, разврат и уцени? Дали сакате Кичево да биде домаќин на блуд, разврат, криминал и уцени? Заборавете на етничката припадност, сетете се на вашите ќерки, на вашите внуки, дека некоја од нив може да биде жртва на овој човек. Затоа, кога ќе го имате пенкалото во рака, верувајте во вредности, не во басни, не во приказни. Заборавете на нешто што некој ви кажува дека се случило пред 4, 5, 6 децении, верувајте на оние коишто ви кажуваат што ќе се случува за четири, пет децении од денес. Заборавете на оние романтични приказни што некој ви ги кажува за некое измислено минато коешто никогаш не се случило. Верувајте на иднината којашто сите ние заедно Македонци, Албанци, Турци, Роми, Срби, Власи, Бошњаци и останати ќе ја градиме. Тоа е иднината на Македонија“, упати Мицкоски обединувачка порака и повик до сите етнички заедници.
Македонија
Николоски: Скопје од денеска директно се поврзува со шпанската престолнина Мадрид
Скопје од денеска директно се поврзува со шпанската престолнина Мадрид, авиолинија која е една од дваесетте авиолинии што ги воведовме во изминатата година, истакна вицепремиерот и министер за транспорт Александар Николоски, кој заедно со амбасадорот на Шпанија во Македонија, Рафаел Сориано Ортиз и Неџат Курт, генерален директор на ТАВ Македонија, го означија првиот лет Скопје-Мадрид.
Николоски потенцираше дека ова е огромен успех за авиосообраќајот, бидејќи со воведувањето на новите линии се забележува и значителен раст на патници и туристи во Македонија.
„Многу ми е драго што денеска почнува директна линија помеѓу Скопје и Мадрид, ги поврзуваме двата главни града, главниот град на Кралството Шпанија и главниот град на Македонија, нешто што е многу значајно, за развојот на туризмот, за развојот на бизнисот и за размената помеѓу двата народи, размената во културата, нешто што навистина многу значи“.
Од минатата година кога беше избрана оваа Влада до денес, додаде тој, отворена е 21 нова дестинација.
„Од Париз, од “Орли” се лета за Скопје, од Истанбул се лета за Охрид, од Дубаи ќе почне да се лета за Скопје оваа зима, од Барселона, од Лион, од Амстердам и од Љубљана се лета за Скопје, тука се чартерите на “Фрибрд Ерлајнс” кои што секој ден слетуваат на скопскиот аеродром, кои за скоро ќе бидат и по два дневно. До Охрид почна да се лета од Базел, Ларнака, Мадрид, Штутгарт, Бари, Стокхолм на главниот аеродром почнуваат овие денови. Понатаму, ја отвараме Женева, Келн, многу значајно за мене Прага, а веќе од пролет Неапол-Италија, Будимпешта-Унгарија, Катовице и Вроцлав до Охрид, и Милано исто така до Охрид.
Вкупно 21 нова дестинација, 21 нова линија, за зголемување на бројот на туристи и повеќе бизнис во Македонија. Сакам да се заблагодарам на директорот на ТАВ на неговиот тим, за одличната соработка која што ја имаме, да се заблагодарам на амбасадорот на Шпанија и да најавам дека ќе има уште дестинации од Шпанија, Барселона и Мадрид нема да се последни” истакна вицепремиерот Николоски
Македонија
Утре наутро претежно ведро и студено, преку денот сончево
Утре наутро ќе биде претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Во наредните денови следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

