Македонија
Бачев: Заев врши брутална албанизација на државните органи
Претседателот на политичката партија Единствена Македонија, Јанко Бачев, денеска одржа прес-конференција на која информира за одредени државни органи каде што, како што рече, застапеноста на Албанците надминува и над 50 отсто, што е далеку од рамката на Рамковниот договор за правична застапеност.
Притоа Бачев истакна дека иако бројот на Албанците во државата е околу 14 отсто, за потребите на денешната прес-конференција предвид ја зема официјално признаената бројка од 25,17 отсто.
„Зоран Заев секојдневно ја повторува фразата ‘едно општество за сите’, во кое треба да има соодветна и правична застапеност и на Албанците. Меѓутоа, во заднина се случуваат работи што не ги гледаат оние што не се зад сцената. А токму зад сцената Заев за десетина месеци изврши вистински масакр во државната администрација бидејќи бројот на Албанците во некои институции надмина и 50 отсто, што е надвор од рамката на Рамковниот договор“, истакна Бачев во своето обраќање.
Притоа тој кажа дека во македонската влада од 2.722 вработени, Албанци се 1.535 или 56,4 отсто, Македонци се 672 или 24,7 отсто, а преостанатите 515 вработени или 18,9 отсто се Турци, Роми, Срби, Власи, Бошњаци и други.
„Во Министерството за локална самоуправа, дури 57 отсто се административци Албанци, во Министерството за економија 34 отсто, во Министерството за животна средина и просторно планирање 30 отсто, во Министерството за здравство 44 отсто, во Министерството за култура 33 отсто, во Министерството за образование и наука 28 отсто, а во Министерството за правда 30 отсто“, рече претседателот на Единствена Македонија.
Бачев истакна дека Единствена Македонија располага и со податоци, според кои од 30 до 70 отсто се административци Албанци и во повеќе самостојни државни органи (агенции, дирекции, комисии, заводи), како и во западниот дел во земјата во голем број посебни јавни установи и други правни лица.
„Во моментот имаме вистинска окупација на државните органи и институции со административци Албанци. Произлегува дека Република Македонија е уникатен пример каде што мнозинскиот македонски народ е изложен на дискриминција од страна на едно малцинство, во случајот албанското“, кажа Бачев на денешната прес-конференција.
Тој посочи дека Рамковниот договор и понатаму останува длабоко трауматичен за македонската национална свет и се спроведува на штета на Македонците.
„Единствена Македонија и македонскиот народ очекуваат одговор од Зоран Заев зошто спроведува брутална албанизација во државните органи. Не сакаме да бидеме погрешно разбрани дека попречуваме некое право на вработување, но во овие услови новата легална власт на Единствена Македонија ќе спроведе обратен процес на масовно бркање на Албанците од работа. Исто така, новата легална власт на Единствена Македонија ќе ја сосече во корен праксата на полнење на администрацијата според проценти и доследно ќе го спроведе правилото вработување во администрацијата врз основа на знаење, способност и достигнувањe“, рече претседателот на Единствена Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: ВМРО-ДПМНЕ сака да ја врати Македонија во времето на страв и уцени
ВМРО-ДПМНЕ сака повторно да ја врати Македонија во времето на страв, на уцени и притисоци, но граѓаните нема да потклекнат, рече претседателот на СДСМ, Венко Филипче, на вечерашниот собир во Конче во поддршка на кандидатот за градоначалник од СДСМ, Благој Илиев.
Тој остро ги осуди притисоците врз граѓаните во текот на кампањата, потенцирајќи дека власта на ВМРО-ДПМНЕ се обидува да ги заплаши луѓето преку институциите.
„Со полиција, финансиска полиција, шумска полиција, преку социјалните служби, прават притисок врз граѓаните. Сакаат да потсетат на времето кога сите живеевме во страв и уцени. Но тоа време заврши. Луѓето сакаат нормален живот, без притисоци, без закани, без поткуп,“ рече тој.
Филипче повика на масовна излезност во недела и поддршка за кандидатот на СДСМ, Благој Илиев.
„Да излеземе во огромен број во недела и да го заокружиме бројот 5 за Благој Илиев, човекот кој работи за вас, не за себе. За Конче да продолжи да се развива“, рече Филипче.
Тој кажа дека градоначалниците од СДСМ реализирале 90 до 100 проценти од ветеното.
„Нема општина во која СДСМ има градоначалник, а да ветената програма не е завршена 90 или 100 проценти“, рече Филипче.
Тој истакна дека граѓаните најдобро ја чувствуваат разликата кога општините ги водат луѓе кои работат чесно и посветено во интерес на сите.
„Многу добро знаете како Благојче работеше во минатиот мандат, како се однесуваше додека беше градоначалник, дека вратата му беше секогаш отворена и дека работеше за доброто на општината и на вас, граѓаните“, порача Филипче.
Претседателот на СДСМ во своето обраќање нагласи дека токму оваа разлика меѓу одговорно и неодговорно владеење се гледа насекаде низ државата.
„Нема општина во држава во која што има градоначалник од ВМРО-ДПМНЕ, а да програмата е завршена повеќе од 20 проценти. Како да се натпреваруваат кој помалку ќе работи за граѓаните“, рече Филипче.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла
Македонија
Божиновска и Јоксимовиќ: Забрзана изградба на гасниот интерконектор Македонија–Србија, се редефинира енергетската карта на регионот
Во рамки на 14. Меѓународен форум за енергија и одржлив развој (IFESD-14), што се одржува во Скопје, министерката за енергетика, рударство и минерални суровини, Сања Божиновска, оствари работна средба со Јована Јоксимовиќ, помошничка министерка за рударство и енергетика на Република Србија, задолжена за меѓународна соработка и европска интеграција.
Во фокусот на разговорите беше изградбата на гасниот интерконектор меѓу Македонија и Србија, проект од стратешко значење за енергетската безбедност и диверзификација на снабдувањето со гас во регионот.
Двете соговорнички се согласија дека проектот треба да се реализира во забрзана динамика, со цел да се овозможи поврзување на гасните системи на двете земји и пристап до нови извори на гас.
На маргините на форумот dополнително, во Министерството за енергетика на Македонија се одржа работен состанок на кој се дискутираше координацијата на институциите и операторите во двете земји за реализација на проектот. Ба разгледани процедурите и техничките чекори за понатамошно убрзување на активностите.
„Гасниот интерконектор со Србија е еден од најважните регионални инфраструктурни проекти што ќе овозможи вистинска енергетска стабилност и сигурност. Овој проект не е важен само за Македонија и Србија – тој е значаен и за цела Европа. Со оваа нова енергетска врска, двете земји добиваат пристап до алтернативни извори и рути, а Европа добива посилен и подобро поврзан Балкан. Ова е чекор што ја позиционира нашата земја како активен и одговорен партнер во новата енергетска карта на Европа. Нашата заедничка цел е овој проект да се реализира во најкраток можен рок – затоа што секој ден е важен за нашата енергетска иднина. Со заеднички напори ќе го реализираме овој проект, во тесна координација и постојана комуникација со нашите партнери од Србија “ изјави Божиновска.
„Гасниот интерконектор со Македонија е проект кој има значење подалеку од нашите граници. Тој е дел од визијата за регион кој е енергетски поврзан, сигурен и усогласен со европските цели. Србија и Македонија заедно покажуваат дека со партнерство и заедничка стратегија можеме да обезбедиме стабилна и предвидлива енергетска иднина. Соработката меѓу нашите две земји во областа на енергетиката е пример како регионалното партнерство може да донесе конкретни резултати. Соработката со колешката Божиновска и со македонскиот тим е интензивна и исклучително конструктивна. Уверена сум дека со заедничка координација и поддршка на нашите оператори ‘Србијагас’ и ‘Номагас’, ќе создадеме нова енергетска оска на стабилност меѓу двете земји. Имаме јасна динамика, завршени студии и поддршка од европските институции. Следниот чекор е координирана акција за изградба. Заеднички ќе работиме на тоа интерконекторот да стане реалност во најскоро време,“ истакна Јована Јоксимовиќ, помошничка министерка за меѓународна соработка и европска интеграција во Министерството за рударство и енергетика на Србија.

