Досега, освен за инцидентот во ОУ „Лазо Ангеловски“, кој се случи утринава околу 9 часот, кога едно лице на гласачкото место 2708 нападнало тројца припадници на полицијата, други поголеми инциденти засега не биле пријавени, изјави јавниот обвинител Џељал Бајрами на денешната прес-конференција. Бајрами додава дека за инцидентот што се случи ова утро добил известување од МВР и дека во текот на денот Обвинителството ја чека целата документација за случајот од страна на МВР.

„Секторот за внатрешни работи Скопје го извести Обвинителството за извршено кривично дело денеска во 9.20 часот во дворот на ОУ ‘Лазо Ангеловски’ во Скопје на гласачкото место број 2708. Делото е извршено од едно лице што  нападнало тројца униформирани полициски службеници. Осомничениот е задржан во полициска станица. Во координација на Основното јавно обвинителство Скопје, СВР Скопје постапува за целосно документирање на настанот по што ќе ја достави целата документација со кривична пријава против осомничениот за сторено кривично дело напад врз службено лице при вршење работи на безбедноста од член 383 од Кривичниот законик“, изјави јавниот обвинител Џељал Бајрами.

Комисијата за следење на евентуалните неправилности за време на гласањето на референдумот постојано ги следи активностите поврзани со процесот на гласање, додаде јавниот обвинител Џељал Бајрами и посочи дека Обвинителството е во постојана комуникација со сите дежурни јавни обвинители во земјат, како и дека се во постојана комуникација со МВР. Јавниот обвинител додаде и дека посериозни неправилности немало на гласачките места на територијата на Македонија.

Бајрами изјави дека Обвинителството има сознанија за мал инцидент во Радовиш, каде што едно лице фрлало летоци, но надлежното Обвинителство информира дека со ова дејство е сторен прекршок, и во Штип, каде едно лице неовластено фотографирало. Фотографирано било лице што носело храна на избирачко место, а лицето што неовластено фотографирало е задржано во полиција на разговор, информира Бајрами.

Во обвинителствата во Гостивар и Битола не се пријавени неправилности поврзани со процесот на гласање.

На електронската адреса на Обвинителството, додава Бајрами, пристигнале десетина поднесоци, кои се однесувале за помали неправилности, а седум или осум од поднесоците, додава обвинителот, биле поднесени од едно исто лице.