Петнаесет високи полициски функционери добија решенија за отказ бидејќи работеле спротивно на законот и нелегално издавале дозволи за поседување на оружје, обелодени министерот за внатрешни работи, Панче Тошковски.

Министерот на денешната прес-конференција рече дека лично до него и кабинетот стигнале претставки од граѓани за начинот на кој во МВР биле спроведувани постапките за издавање на дозволи за поседување на оружје.

„По извршена темелна истрага од страна на Комисија која спроведе ревизија за претставките, се констатираше дека кај огромен број на предмети, над 5.000 предмети не било постапувано во минатото, а притоа, голем број предмети кадешто апликантите не исполнувални услови им била давана дозвола за оружје“, рече Тошковски.

Министерот објасни дека селективно се постапувало само за предмети за кои интерес имал конкретен полициски функционер да даде наредба, а тоа не се правело хронолошки. Вториот пробелем, рече Тошковски, се однесува на конкретни лица кои не посадувале законски услови кога им биле давани дозволите.

Тошковски најави дека во наредниот период ќе следат и кривични пријави за оние за кои постојат докази дека сториле кривично дело.

За решавање на проблемот кој со години бил таложен, создадена е дигирална алатка која ќе овозможи неселективен и системски пристап кон дозволите за поседување на оружје, најави министерот.

Селвер Ајдини, со партиска книшка на ДУИ, служеше една деценија во Советот на Агенцијата за аудиовизуелни медиумски услуги
ДУИ и некои од нејзините сателити, сега кога се во опозиција, се обидуваат да наметнат лажен политички морал, реагираат од коалицијата „Вреди“.

Но, и ова, како што велат, не им поминува бидејќи граѓаните многу добро и јасно знаат како го злоупотребиле секој институционален механизам само за своја корист.

Според „Вреди“, тоа што ДУИ зборува за постапување спротивно на законите е апсурдно само по себе.

„ДУИ е синоним за постојано кршење на законот, и недвосмислено е дека за тоа треба и ќе има одговорност. Пред да зборува за закони, ДУИ треба да се погледне во огледало, бидејќи е првата што се очекува да се соочи со правдата за постојаното кршење на законите, за нерегуларностите насекаде каде што стапнале оставиле траги на злоупотреба и манипулации. Јавноста многу добро знае дека Унијата за Девалвирање на Институциите (ДУИ) е типичен модел на погрешен начин на водење на институциите. Затоа, ВЛЕН се залага секоја институција да биде на услуга на граѓаните и да нуди услуги со највисок квалитет. Од ДУИ испуштиле крик за предложените советници во Агенцијата за аудио и аудиовизуелни медиуми, отишле до таму да ги квалификуваат како дејство што е во спротивност на законот“, истакнуваат од „Вреди“.

Ја потсетуваат јавноста дека потпретседателот на овој Совет Селвер Ајдини е почесен член на ДУИ. Ајдини, според нив, е активист и ревносен член кој не пропушта ниту една седница или собир на огранокот на ДУИ во градот Куманово. За ова, како што појаснуваат, ДУИ го награди со именување во Советот за аудио и аудиовизуелни медиумски услуги.

„И оваа награда што ДУИ му ја даде на сопартиецот тогаш не размислуваше за закони, туку имаше цел да смести партиски членови кои потоа ги претвора во „мамца“ за гласови во време на избори. Основниот принцип на работа на „Вреди“ е меритократијата“, нагласуваат од партијата.

Министерот за јавна администрација, Горан Минчев, оствари билатерална средба со министерката за јавна администрација и антикорупција на Република Албанија, Адеа Пирдени, во Тирана.

Средбата се одржа во рамките на настанот посветен на Партнерството за отворена власт, иницијатива која ги промовира транспарентноста, отчетноста и учеството на граѓаните во јавниот сектор.

Министерот Минчев и министерката Пирдени разменија искуства и достигнувања од тековните реформи во јавната администрација, нагласувајќи ја важноста на градењето капацитети и одговорноста на институциите во насока на подобрување на јавните услуги и воспоставување на силни механизми за спречување на корупцијата.

Ова беше и можност да се дискутираат иницијативи за поттикнување на транспарентноста и зајакнување на вклученоста на граѓаните и невладините организации во креирањето на јавни политики.

Министерот Минчев изрази задоволство од успешната соработка со Албанија и потенцираше дека Република Македонија и Албанија делат заедничка визија за поефикасна и транспарентна јавна администрација, фокусирана на отчетност и ефикасно управување со ресурсите. Тој ја нагласи важноста на партнерството за отворена власт во градењето доверба меѓу граѓаните и институциите.

Министерката Пирдени, од своја страна, го поздрави партнерството со Република Македонија, истакнувајќи ја потребата од заедничка работа и споделување на добри практики, особено во борбата против корупцијата. Таа ја изрази подготвеноста на Албанија за продлабочување на соработката со Република Македонија преку заеднички проекти и иницијативи, кои ќе придонесат за создавање на поефикасна и транспарентна јавна администрација.

Оваа билатерална средба ја потврди заложбата на двете земји за отворена и отчетна власт, а заедничките напори ќе придонесат кон развој на инклузивно и демократско општество.