Македонија
Без дозвола поминал преку полна линија – Се бара притвор за скопјанецот кој усмрти мотоциклист и избега

Обвинителството бара притвор за 26-годишниот скопјанец кој вчера со автомобилот усмрти мопедист на улицата Скупи, по што избегал од местото на несреќата, а подоцна самиот се пријавил во полицијата.
Oд Обвинителството објавија детали за несреќата во која настрада 30-годишен маж.
Возачот не поседувал возачка дозвола и движејќи се по улицата Скупи, во обид за престигнување, поминал низ полна надолжна линија на коловозната лента наменета за движење возила од спротивен правец. На овој начин, како што информираат од Обвинителството, возачот го спречил нормалното движење на возилото кое дошло од спротивен правец – мопед „пежо“ со скопски регистарски ознаки. Со предниот дел од автомобилот пријавениот удрил во мопедот на кој се превезувале две лица.
По незгодата, без да им укаже помош на повредените кои останале да лежат на патот, осомничениот го напуштил местото на настанот. Во незгодата, лицето кое го управувало мопедот се здобило со тешки телесни повреди, додека сопатникот од мопедот се здобил со тешки телесни повреди на кои подоцна им подлегнал и починал.
„Бидејќи постојат околности кои укажуваат дека осомничениот може да побегне или да го повтори случајот, јавниот обвинител достави предлог до судијата на претходната постапка од Основниот кривичен суд Скопје да му одреди мерка притвор на осомничениот. Како значајна околност во предлогот за определување мерка притвор, јавниот обвинител го наведе фактот дека осомничениот веднаш по сообраќајната несреќа избегал без да им помогне на оштетените, што е очигледен доказ за неговото избегнување да се соочи со последиците од незаконските дејствија“, велат од Обвинителството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Улици во Чаир без вода, намален притисок во Топанско Поле

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради поврзување на нова со стара постоечка водоводна мрежа на улица Кемал Сејфула бб, прекинато водоснабдување ќе имаат корисниците од улицата Џон Кенеди и дел од улицата Кемал Сејфула, а со намален притисок ќе остане населбата Топанско Поле во општина Чаир.
Водоснабдувањето ќе биде прекинато од 09:30 часот до завршување на работните активности.
Македонија
Делови од Ѓорче Петров и Чучер Сандево денеска без струја

Регионалниот центар за управување со кризи на Град Скопје, по добиеното известување од ЕВН, информира дека поради планирани зафати во електро дистрибутивната мрежа, денеска без напојување со електрична енергија ќе останат:
· од 09:00 до 13:00 часот, објектите на Полициската Станица и базата на БППЗ во Ѓорче Петров, општина Ѓорче Петров;
· од 09:00 до 15:00 часот, корисниците од дел од нас. Кисела Јабука, општина Ѓорче Петров;
· од 09:00 до 16:00 часот, корисниците од селата: Побожје, Бродец, Танушевци, Брест и Малино, општина Чучер Сандево;
· од 11:00 до 13:00 часот, корисниците од дел од ул. Кадињача, општина Ѓорче Петров.