Македонија
Беса: Пописот докажа дека со ДУИ во Владата бегството на Албанците од татковината е масовно

Објавувањето на резултатите од пописот отвора голема дебатa што бара длабинска анализа, но и одговорност од политичките сили, кои сакајќи да ги задржат ексклузивноста и нетранспарентноста, денес го преземаат целиот историски товар на еден процес, кој, за жал, отвори многу дилеми и нејасности, велат од Беса.
„Движењето Беса уште еднаш го потврдува својот политички став дека процесот на попис на населението е и треба да остане само статистички, а колективните законско-уставни права на етничките заедници, во овој случај на Албанците, треба да произлегуваат од бројот на жители што се државјани на државата, а не по бројот на резидентни жители во државата.
Преку нашата анализа на последниот попис на населението во земјата произлегуваат некои пораки што сакаме да ги споделиме како загриженост со јавноста.
Прво: формата, начинот и водењето на процесот помина во целосна тајност, а процесот на одложување, односно прекин на процесот и пречките со кои се соочуваа граѓаните за пријавување, особено оние во дијаспората, го губи кредибилитетот на пописот како процес. Оттука, се сомневаме дека овој процес се претвори во политичко пазарење помеѓу СДСМ и ДУИ, како и многу други прашања во минатото, кои, за жал, докажаа дека при секое политичко пазарење на ДУИ последиците се долгорочни за Албанците во државата.
Второ: ако тргнеме од статистичките податоци што произлегуваат од овој попис, на површина излегува една голема вистина, која континуирано ја иницираме како грижа, а тоа е дека во сите овие години на владеење на ДУИ, Албанците масовно си заминаа од родното место“, изјави Хоџа.
Како што рече тој, погрешните политики, корупцијата, непотизмот, партизацијата на сите институции принудија многу семејства, но, пред сѐ, многу млади луѓе да ја напуштат државата.
„Факт е дека колку подолго ДУИ ги води државните институции преку неспособни луѓе, партиски приврзаници и оние чии главни заслуги се послушноста кон партијата, толку повеќе Албанци ќе ги напуштат своите родни места.
Овој процес на масовен егзодус на Албанците мора итно да се запре, тоа се прави со создавање подобри услови за живеење, економска благосостојба, отворање нови работни места, но сето тоа може да се случи само со отстранување на ДУИ од власт, поконкретно на нејзините преставници во Владата“, изјави тој.
Од Беса го потврдија ставот дека државата треба што побргу да оди на предвремени избори, а ДУИ, како што велат, да оди во опозиција и да се реформира бидејќи, според нив, секој ден се докажува дека тие се штетни за иднината на Албанците, а тоа го потврдиле и од пописот на населението, за што и самите биле учесници во неговата организација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
32-годишен скопјанец осомничен за разбојништво во Бучимци: маскиран и со ловечки нож ограбил соселанец

Јавен обвинител од Основното јавно обвинителство Скопје поведе постапка против едно лице осомничено за кривично дело – Разбојништво од член 237 став 4 во врска со став 1 од Кривичниот законик.
Осомничениот 32-годишен скопјанец, на 18 август, маскиран со маица со која си го покрил лицето и капа, преку незаклучена влезна врата влегол во домот на негов соселанец во селото Бучимци. Во рацете држел ловечки нож и кога во една од собите го затекнал сопственикот, му се заканил дека ќе го убие ако не му даде пари.
Оштетениот, исплашен за својот живот, извадил 4.000 денари од комодата, но го замолил разбојникот да му дозволи да задржи барем 1.000 денари, бидејќи му се неопходни.
Осомничениот се согласил и го напуштил местото со 3.000 денари кои противправно ги одзел од сопственикот.
Јавниот обвинител до судијата на претходна постапка достави предлог за определување мерка притвор за осомничениот, бидејќи постојат околности кои укажуваат на опасност од бегство, можност за влијание врз сведокот/оштетен со заплашување и уценување, како и можност да го повтори делото.
Македонија
Зголемена фреквенција на возила на граничните премини Табановце и Богородица

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП „Табановце“ времето на чекање за влез е околу 20 минути, за излез е околу 40 минути.
На ГП „Богородица“ времето на чекање за излез знесува околу 20 минути, додека на останатите гранични премини од македонска страна нема подолги задржувања при влез или излез од државата.
Македонија
Вицепремиерот Николоски во Будимпешта на прослава на Националниот ден на Унгарија

Вицепремиерот Александар Николоски на покана на премиерот на Унгарија, Виктор Орбан, присуствува на Националниот ден кој се слави во чест на Свети Стефан основачот на унгарската држава и христијанството во Унгарија.
Покрај учеството на прославата на националниот ден, предвидени се повеќе средби со високи претставници на владата на Унгарија, неколку министри и потенцијални инвестиции. На средбите е предвидено да се разговара за динамиката на проектите во Македонија како и за идната засилена економска соработка помеѓу двете држави.
Посетата на вицепремиерот е уште една потврда за одличното пријателство и соработката помеѓу Македонија и Унгарија, се додава во соопштението на Министерството за транспорт.