Македонија
Бесплатен летен спортско едукативен камп за ученици од Кисела Вода

Бесплатен летен спортско едукативен камп за спортските таленти од основните училишта и учениците од социјално ранливите семејства, обезбеди Општина Кисела Вода. Оваа иницијатива, која е плод на посветеноста за промовирање на спортот и здравиот начин на живот, ги промовира и еднаквите можности за учество и развој на сите деца без разлика на нивната финансиска состојба.
На јавниот повик кој е достапен на општинската веб страница https://opstinakiselavoda.gov.mk/wp-content/uploads/2024/05/oglas5.pdf , можат да аплицираат децата кои постигнале резултати во олимписки и неолимписки спортови, во поединечна и екипна конуренција, согласно класификацијата на Агенцијата за млади и спорт.
За спортските таленти, Комисијата ќе ги вреднува постигнатите прво, второ и трето место.
Kандидатите задолжително треба да ги достават, дипломите и признанијата за освоени места или учество на официјални државни, меѓународни и регионални натпревари, како и дипломите и признанијата за освоено место или учество на пријателски натпревари во сите категории. Основците пак, кои припаѓаат на социјално ранлива категорија согласно Закон за социјална заштита, за истото треба да достават соодветна документација како доказ за исполнетост на условите. На повикот можат да се пријават и ученици од семејства со еден вработен, примател на минимална плата, како и ученици од семејства чиј вкупен приход не надминува 35.000,00 денари месечно.
-Овој бесплатен седумдневен камп на брегот на Охридското Езеро ќе биде повеќе од обично дружење. Тој претставува можност за нашите ученици да се социјализираат, да создадат нови пријателства и да ги развиваат своите спортски таленти. Верувам дека преку вакви активности, децата ќе можат да ги зајакнат своите спортски вештини, но и да научат важни животни лекции за тимска работа, дисциплина и посветеност. Нашата поддршка за младите спортисти не завршува тука. Оваа иницијатива е само дел од нашата континуирана стратегија за поттикнување на спортските активности и здравиот начин на живот кај младите. Овие спортски кампови се стимул за спортистите да продолжат да се натпреваруваат и да ги постигнуваат своите цели, но исто така претставуваат и обид да се избегне маргинализацијата на децата од социјално загрозените семејства. Сите деца, без разлика на нивната социјална позадина, треба да имаат еднаква шанса за успех и развој. Од тука, ги поттикнувам сите кои се опфатени со зададените критериуми да аплицираат на јавниот повик. Од своја страна, како градоначалник, можам да кажам дека Општина Кисела Вода ќе продолжи да инвестира во вакви проекти, кои го поддржуваат личниот и спортскиот развој на талентираните и водат кон избегнување на маргинализацијата на децата од социјално загрозените семејства-изјави градоначалникот Орце Ѓорѓиевски,
Барањата и изјавите со потребната документација треба да се доставуваат до 05 јуни, по пошта на адреса Општина Кисела Вода ул. “Петар Дeљан” бр.17, или во архивата на општината со назнака – “За избор на ученици од општинските основни училишта од Општина Кисела Вода кои ќе посетуваат бесплатен летен спортско едукативен камп” – Комисија за спроведување на постапката за избор на ученици од општинските основни училишта од Општина Кисела Вода кои ќе посетуваат бесплатен летен спортско едукативен камп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Нема операции на Кардиохирургија, дали министерот за здравство работи за приватните клиники, прашуваат од СДСМ

Според опозициската СДСМ, состојбата во македонското здравство е катастрофална.
Како што оценуваат, неспопсбноста на власта, создаде таков хаос, што болниците остануваат без лекари а пациентите сами со својата мака.
Недостигот на специјалисти, додава Елена Радеска од оваа партија, е огромен проблем кој се продлабочува.
„Клиниката за Kардиохирургија е во толку тешка состојба да поради недостиг од стручен кадар во моментов нема кој да оперира.
Нема операции, нема нови интервенции, нема надеж.
Тоа го признава и актуелниот министер за здравтво но владата на ВМРО-ДПМНЕ нема решение.
Граѓаните слушаат само оправдувања, треба да чекаат лекари од странство привремено да дојдат за да може да се направи операција. Или се принудени да одат на приватни клиники кои им се недостижни.
Ова е срам и голема неправда за сите кои се борат за здравје и живот. Ова власт секој ден покажува и докажува дека работи само за големите приватни болници, додека здравствениот систем тоне во хаос, а за граѓните ништо не се прави.
Министерот за здравсто наместо за доброто на јавното здравство, на болниците, клиниките, здравствените установи како да работи само за доброто на приватните болници“.
Ситуацијата со факторите на коагулација, како што истакнува, е уште еден пример за неспособност и негрижа.
„Наместо да се обезбеди рекомбинантен фактор VIII, тендерот пропадна. Сега се користат плазматски и препарати од четврта генерација. Трошокот е енормен, а пациентите се оставени да живеат во страв дали воопшто ќе имаат терапија.
Ова се тажни приказни на вистински луѓе кои секојдневно живеат во неизвесност поради оваа власт. Секое одложување, секоја погрешна одлука и секоја пропуштена шанса во здравството значи човечки животи.
За овој хаос во здравството мора да има одговорност“.
Македонија
Уапсени 60 лица за подметнување пожари во Македонија

Од 01 април до 29 септември регистрирани се вкупно 2.080 пожари на отворен простор, при што приведени се вкупно 60 лица, а по преземени мерки поднесени се 36 кривични пријави, информира Министерството за внатрешни работи.
Најголемиот број на настанати пожари е утврдено дека се предизвикани од човечки фактор, со различни мотиви и се преземаат мерки и активности за расчистување на случаите и откривање на нивна евентуална меѓусебна поврзаност.
Исто така, од 01.07.2025 година, откако е воведена забрана за движење во шуми, до 29.09.2025 без писмено одобрение за движење во шума, биле затекнати 27 лица. Против истите ќе бидат поднесени соодветни поднесоци по Закон за шуми.
Во насока на рана превенција од пожари, полициските служби употребуваат дронови за мониторирање на шумските појаси на територијата на државата.
„Со воведувањето на овие оперативни мерки зголемена е ефикасноста во делот на раното предупредување и лоцирање на евентуалните пожари, како и детектирањето на можните причини или причинители на истите“, велат од МВР.
Македонија
Католичката црква со реакција за муралот на Мајка Тереза: Ова е навредлив чин за сите верници

Католичката црква во Македонија изразува жалење за, како што велат, недостојниот и навредлив чин со кој на муралот на света Мајка Тереза, поставен на „Школка“ во Градскиот парк во Скопје, е додадена марама на нејзиниот лик.
Со оваа постапка,велат од Католичката црква, се повредуваат верските чувства на верниците и почитувачите на делото на светицата.
„Потсетуваме дека Света Мајка Тереза е светица на Католичката црква, родена во Скопје, почесна граѓанка на овој град и граѓанка на светот. Со својот живот посветен на сиромашните и болните, со својата едноставност, понизност и љубов, ја направи Македонија и Скопје препознатлива во светот и пример за почит кон другиот.
После големиот настан што се случи на 28 септември 2025 година за сиот македонски народ со осветувањето на храмот Свети Константин и Елена кој се наоѓа во непосредна близина на Спомен куќата на Света Мајка Тереза, се прашуваме: Зарем нашата Светица заслужи ваков однос од дел од своите сограѓани?
Почитта кон верските чувства е основен елемент на секое демократско општество. Грижата за нив е одговорност на сите граѓани, а воедно ја отсликува и демократската зрелост кај поединци и групи, нивната подготвеност за соживот и прифаќање на различните.
Слободата на уметничкото изразување и јавната дебата се драгоцени вредности, но тие треба да се остваруваат со почит кон достоинството на другите и кон она што е свето за една заедница. Затоа недозволиво е светите ликови, како света Мајка Тереза, да бидат инструментализирани или злоупотребувани за било какви цели“, се наведува во соопштението од канцеларијата на Скопска бискупија и Струмичко-скопска епархија.
Во него се додава дека Католичката Црква се приклучува кон сите добронамерни граѓани кои веќе реагираа и го осудија ваквиот срамен чин и апелира до целата македонска јавност на поголема свесност за значењето на светците, светите простори и другите свети работи, како и вредностите во општеството што ги застапуваат Црквите и верските заедници.
„Во таа насока, ги повикуваме надлежните институции да преземат соодветни мерки, да ги заштитат верските чувства на граѓаните и во иднина да ги превенираат ваквите појави. Во исто време изразуваме благодарност до сите луѓе на изразената загриженост и поддршка која ја упатија до Црквата“, велат од канцеларијата на Скопска бискупија и Струмичко-скопска епархија.