Во врска со предлогот-законот за данок на солидарност, Стопанската комора на Северна Македонија изминатиот период во континуитет укажува дека носењето вакво законско решение за измината фискална година (конкретно за 2022 година), создава несигурност кај постојните и кај потенцијалните инвеститори, особено ако се има предвид дека правната сигурност е еден од врвните приоритети за кои се залагаме како застапувачи на интересите на бизнис-заедницата во земјата.

Стопанската комора на Северна Македонија, која ги застапува компаниите што создаваат половина од вкупниот приход во приватниот сектор, компании што генерираат речиси половина од нето-добивката во приватниот сектор и компании што вработуваат повеќе од една третина од вработените во приватниот сектор, уште еднаш ги афирмира своите забелешки во однос на предлог-законот за данок на солидарност и укажава на следното:

Селективен пристап затоа што се опфатени само поголемите компании, кои остваруваат приход поголем од 615.000.000 денари;

Се врши даночење на добивката што ја оствариле компаниите независно дали таа е резултат на пазарните услови (остварена екстра-добивка поради движења на пазарите на енергенти или други причини што довеле до конјуктурни поместувања на пазарот) или е резултат на нивното работење, односно резултат на зголемени инвестиции, подобрена продуктивност, освојување нови пазари и сл.;

Дестимулирање на успешните компании, кои се инвестициски ориентирани, односно во неповолна положба се доведуваат компании што инвестирале во претходните години.

Ефектот што се очекува од неговата примена во смисла на обезбедување дополнителни средства во државниот буџетот може да изостане за делот на добивката на компаниите што се корисници на државна помош од причина што ќе се намали нивниот индивидуален износ на доделена државна помош и по тој основ нема да се зголемат приходите во буџетот.

Ваков данок, кој се носи ад хок, во втората половина на деловната година создава несигурност кај постојните и кај потенцијалните инвеститори.

Во таа насока Клуб 100, како најрепрезентативно тело на раководење во Стопанската комора, ја повикува Владата на РС Македонија да го повлече предлог-законот за данок на солидарност и со тоа да покаже сериозен однос кон укажувањето на најголемата и најмногубројна бизнис-асоцијација во државата. Исто така, сакаме да напоменеме дека е јасна намерата на Владата на РС Македонија дека овој закон сака да го протне со европско знаме, кој ќе нанесе поголема штета отколку добро.

(ПР-текст)