Македонија
Билбиловска: Нема да се гради никаков објект на фудбалското игралиште во дворот на ООУ „Киро Глигоров“

Изминатите неколку дена фудбалското игралиште во ООУ „Киро Глигоров“ е актуелно во јавноста за договорот за отстапување да го користи приватна компанија.
Директорката на училиштето, Билјана Билбиловска, во изјава за „Мафакс“ вели дека не се вистина тврдењата оти на игралиштето ќе се гради кафе-бар или некаков друг придружен објект.
„Никакви други дополнителни дејности, како кафе-бар, не се во договорот ниту, пак, некогаш биле предмет на дискусија. Во нашата работа интересот на децата ни е секогаш на прво место. Оттука, сметам дека навистина е неблагодарно да се доведуваат во заблуда родителите за изградба на некаков објект во училишниот двор, уште повеќе тој објект да биде кафе-бар, ресторан“, вели Билбиловска.
Таа нагласи дека училишниот двор останува отворен 24 часа секој ден.
„Игралиштето за време на наставата ќе го користат исклучиво учениците и наставниот кадар за часовите по физичко образование и за воннаставните активности. Од 15 до 18 часот ќе биде на слободно користење за сите деца, ученици на училиштето, сами или во придружба на нивните родители, во зависност од нивната возраст. По 18 часот, ќе се издаваат три термини на корисникот ‘Форца спорт ДД’ ДОЕЛ Скопје. По 21 часот, фудбалското игралиште ќе биде затворено сè до почеток на наставата во 8 часот“, рече Билбиловска за „Макфакс“.
Таа објасни дека договорот за користење на фудбалското игралиште предвидува давање простор на користење – отворено бетонско игралиште за фудбал, кое ќе се користи за реализирање спортски активности за време од 5 години со вложување, односно инвестирање над 10.000 евра. кое ќе биде реализирано во првите две години по план за инвестирање, кој се состои од набавка и поставување метална ограда, вештачка трева, заштитна мрежа, мрежа за головите, голови, набавка на потрошна инвестиција, сите претходно наведени на терет на корисникот.
„Целокупната постапка е спроведена на начин на кој се почитувани сите важечки закони и подзаконски акти што важеле во моментот на склучување на договорот и за чие склучување се потребни претходно обезбедени согласности во 2021 година“, објасни таа.
Директорката на училиштето потенцира дека училиштето останува отворено за комуникација со сите родители и деца што посетуваат настава тука. Додаде дека за таа цел, во договор со родителите, ќе работат на допрецизирање на постојниот договор имајќи предвид тој да биде во интерес, пред сѐ, на децата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце за излез од државата се чека по 20 минути

Сообраќајот на државните патишта се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 20 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Притвор за уште едно лице од групата која е под истрага за злосторничко здружување, даночно затајување и перење пари

Управата за финансиска полиција информира дека во текот на вчерашниот ден, 28.08.2025 година, на граничниот премин „Долно Блаце“, при обид за влез во РСМ, е лишен од слобода С.А., државјанин на Р.Косово, за кој постои основано сомнение дека сторил кривично дело „Злосторничко здружување“ (чл.394 ст.2) и кривично дело „Даночно затајување“ (чл.279 ст.3).
Од страна на овластени службени лица од Управата за финансиска полиција, лицето веднаш било превземено и изведено пред судија на претходна постапка од каде му била определена мерка притвор во времетраење од 30 дена, по што истиот е спроведен во КПУ Куманово.
Притворањето, појаснуваат надлежните, е продолжение на акцијата од 25 август, кога беа притворени седум лица, како резултат на сложена предистражна постапка спроведена од страна на Управата за финансиска полиција, под раководство и во координација со надлежен јавен обвинител од ОЈО ГОКК, во рамки на која беа превземени низа мерки и активности и беше обезбеден обемен доказен материјал, што резултираше со поднесување на кривична пријава против 13 физички лица и 10 правни лица, за сторени кривични дела: злосторничко здружување, даночно затајување, даночна измама и перење пари и други приноси од казниво дело, со што е предизвикана огромна штета на државниот буџет во висина од над 430 милиони денари.
Македонија
Обвинение за насилство за таткото кој повреди 15-годишни деца на фудбалскиот натпревар во Штип

Основното јавно обвинителство Штип поднесе Обвинителен предлог против едно лице за кривично дело – Насилство од член 386 став 4 во врска со став 3 и став 1 од Кривичниот законик.
На 24 август, на фудбалскиот стадион “Бело Брдо“ во Штип, за време на фудбалскиот натпревар помеѓу пионерските екипи на фудбалските клубови “Брегалница“ од Штип и “Шкупи“ од Скопје, обвинетиот со грубо насилство ја загрозил сигурноста на оштетените две 15-годишни деца, кои биле играчи во тимот на ФК “Брегалница“.
На децата им нанел телесни повреди, а кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот.
Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.