Претседателот на Владата, Зоран Заев, денеска ги прими во посета во својот кабинет амбасадорот на Соединетите Американски Држави, Џес Бејли, и новоименуваната вршителка на должноста претставник на Канцеларијата на УСАИД во Република Македонија, Гречен Биркл, која истовремено е и заменик на помошник-администраторот за Европа и Евроазија на оваа агенција.

Премиерот Заев ѝ посака добредојде и успешен мандат на Гречен Биркл како вршителка на должноста претставник на Канцеларијата на УСАИД во Република Македонија и истакна дека е убеден оти и во наредниот период, како и досега, УСАИД ќе го потврдува и негува длабокото и долготрајно партнерство меѓу народите на нашата земја и на САД.

Тој потенцира дека повеќе од 25 години УСАИД дава голема поддршка почнувајќи од првите проекти на Агенцијата за поддршка на локалните земјоделци и градење нови демократски институции и учествуваше во речиси секој аспект на македонската економија и општество.

„Во соработка со граѓанските организации, приватниот сектор и Владата, УСАИД помогна во зајакнувањето на демократските процеси, институциите и граѓанското општество и ѝ помогна на Република Македонија да ги изгради своите капацитети соодветно на потребите на едно модерно општество“, нагласи Заев и додаде дека оваа средба се остварува на ден кога сојузниците на НАТО го потпишуваат протоколот за пристапување во алијансата, што претставува нова реалност и нови перспективи за земјата што набргу сите ќе ја препознаваат како Република Северна Македонија.

Биркл истакна дека е навистина привилегија да се сретне со премиерот на овој важен ден за Република Македонија и додаде дека УСАИД ја продолжува поддршката за земјата со нова стратегија и програми. Таа најави организирање координациска активност на донаторите за која побара учеството на Владата да биде фокусирано на испорака на најважните приоритети на земјата за да се добијат максимални ефекти од донаторските програми на УСАИД и на другите агенции и земји донатори, при што нагласи дека од интерес на агенцијата што ја претставува е развивање и поддршка на проектите со јавно-приватно партнерство како концепт што ги обединува интересите на граѓаните и нивните заедници со интересите на јавните институции и приватниот бизнис.