Македонија
Бистри и матни случаи за октомври 2023 година според „Транспаренси интернешнл – Македонија“
„Транспаренси интернешнл – Македонија“ продолжува да ја спроведува редовната месечна активност за следење случаи и дејства поврзани со коруптивни однесувања и борбата против корупцијата наречена бистро-матно.
Матни настани за октомври 2023 година
Измените на Кривичниот законик од 6 септември обезбедуваат застарување на голем број предмети на функционери и службени лица обвинети за коруптивни дејства
„Таргет -Тврдина“ се урна, Мијалков неповреден – по пет години и девет месеци правосудно натегање, од кои 9 месеци чување на предметот во фиока во скопска Апелација, последните клинци за запечатување на предметот „Таргет – Тврдина“ дојдоа директно од политиката.
На Антонио Милошоски му застаре делото злоупотреба на службената положба, ќе му се суди само за измама – на пратеникот Антонио Милошоски и уште 9 обвинети во предметот „Moќник“ им застаре гонењето за делото злоупотреба на службената положба, но тој ќе остане во судница затоа што одговара и за делото измама.
Кривичниот законик ги спаси Димовски и Талевска во случајот „Продуцент“ – судот донесе решение со кое ја запре постапката за кривично гонење за случајот „Продуцент“ против поранешниот министер за земјоделство од Социјалистичката партија, Љупчо Димовски, и новинарката Ивона Талевска.
Измените на Кривичниот законик го урнаа „Топлик“: предметот застарува за сите обвинети – три дена пред да се заокружат точно седум години откако беше отворена истрагата за предметот „Топлик“, Апелациониот суд во Скопје ја укина пресудата, со што дозволи предметот за „Сончев град“ да добие апсолутна застареност.
По 16 години судење, застаре предметот „Змиско око“, обвинетите ќе бараат обесштетување по сите основи – застаре преметот „Змиско око“ од 2007 година, во кој 46 вработени во „Македонијапат“ беа обвинети за злоупотреба на положбата и за злосторничко здружување, односно дека на патарините не им издавале фискални сметки на возачите, а парите си ги ставале во џебот, па си ги делеле, при што заработиле неколку милиони евра.
Измените во Кривичниот законик му донесоа олеснителни околности и на Мухамед Зеќири – на судењето одржано на 24.10.2023 година Обвинителството направи промени во предметот според донесените измени, па наместо претходно законски утврдената казна од најмалку пет години затвор, сега Зекири може да биде осуден на затвор од една до пет години.
Застарува и делото за злоупотреба за Јанакиески во предметот „Талир“ – застарување ќе има и во предметот „Талир“, кој е поврзан со финансирањето на ВМРО-ДПМНЕ. Обвинителката Ленче Ристовска денеска предложи, а судијата ќе донесе одлука на наредното рочиште за застарување на делото за злоупотреба на службената положба за ексминистерот Миле Јанакиески.
Ристовска: Повторно нема да има одговорност за незаконското прислушување во државата, што е директна последица на измените на КЗ
Како и во другите два претходни случаја на прислушување, и во овој, за жал, нема да имаме кривично правна разрешница и повторно нема да има одговорност за незаконското прислушување во државата, вели јавната обвинителка Ленче Ристовска за случајот „Таргет – Тврдина“.
Џолев: Да престане да се вперува прстот во судството, измените на КЗ беа упад во судскиот систем
Според Иван Џолев, претседател на Основниот кривичен суд во Скопје, токму измените на Кривичниот законик се главен проблем за застарувањето на предметите, а она што најмногу недостигало, според него, е да се анализира тајмингот кога тие измени требало да се случат, односно дали требаше да се случат во период кога ќе застарат голем дел од предметите што беа во финална фаза.
Нема одговорност за функционери што не ги доставуваат потребните информации до Државната комисија за спречување на корупцијата
Антикорупциска ја запре постапката за дивоградбите во Чаир, градоначалникот Ганиу со години не им ги дава информациите
Градоначалникот на општина Чаир, Висар Ганиу, со години не постапува по иницијативите на Државната комисија за спречување на корупцијата, која постапува по пријава што се однесува на дивоградби подигнати од несовесни граѓани во 2011, 2016 и 2018 година за кои не се постапува соодветно од ниту една институција.
Антикорупциската ќе поднесе кривична и бара разрешување на директорот на Инспекторатот за градежништво
Државната комисија за спречување корупција на седница донесе одлука да поднесе иницијатива за кривично гонење до Основното јавно обвинителство и иницијатива до Владата за разрешување на директорот на Државниот инспекторат за градежништво, Фатмир Арифи, бидејќи констатираа дека тој пред Комисијата не го оправдал начинот на кој се стекнал со имот во изминатиот период.
ГРЕКО не е задоволен од усогласеноста со препораките
ГРЕКО: Македонија не е доволно усогласена со препораките за борба против корупцијата – групата на држави против корупција заклучи дека Македонија е во недоволна усогласеност со препораките содржани во извештајот од петтиот круг на евалуација во борбата против корупцијата.
Медиуми од држави членки на ЕУ реагираат по злоупотребата на знамето на ЕУ за измените на Кривичниот законик
ФАЦ за Македонија: Корупција од името на ЕУ – по скандалот на Клиниката за онкологија и измените на Кривичниот закон, германскиот весник „Франкфуртер алгемајне цајтунг“ констатира дека владината корупција се прикрива зад знамето на ЕУ.
Амбасадорот на Кралството Холандија уште еднаш укажа на проблемот со корупцијата
Што правите вие, освен што трупате изговори?! Зошто не ги исполнивте реформите пред 15 години?! – холандскиот амбасадор за ЕУ членството на Македонија – изговори наместо реформи, корупција, непотизам. Европската Унија чека на Македонија, а не обратно. Ова е пораката што ја испрати холандскиот амбасадор Дирк Јан Коп.
Во Република Северна Македонија постои ниско ниво на владеење на правото
Македонија на 67. место на најновата листа на Индексот за владеење на правото – Северна Македонија е рангирана на 67 .место меѓу 142 држави на најновата глобална листа според Индексот за владеење на правото на светскиот проект за правда. Во однос на минатата година, иако има иста оценка, земјата е рангирана четири места подолу и сега е на ниво со Монголија, Казахстан, Индонезија и Молдавија.
Судството не почитува правила за етика и останува рак рана на нашето општество
Како се применуваат правилата за интегритет во судството!
Судијката за која реагира министерот за правда избрана за претседател на кумановскиот суд – Судскиот совет ја избра судијката Снежана Манев за претседателка на Основниот суд Куманово, функција што ја извршуваше и досега, но како вршител на должност. И покрај извештаите изготвени од направените контроли, наодите и усвојувањето на извештаите, Судскиот совет не ја санкционира в.д. претседателката на овој суд, која, според јавниот извештај, направила злоупотреба на АКМИС-системот, поставувала судии по желба, ги нарушувала човечките односи во судот и ги навредувала и понижувала вработените Албанци.
Инаку, судијката Манев летово беше во фокусот на јавна преписка меѓу Судскиот совет и министерот за правда, Кренар Лога, која тој ја иницира реагирајќи на тоа што на судијката ѝ била дадена можност вторпат да полага психолошки тест.
„Министерството за правда изненадено прашува од кои причини по јавно усвоен извештај од ваша страна на 13.3.2023 година, место да преземате соодветни мерки, Вие, по толку месеци, правите дополнителен извештај (23.6.2023), каде што самите се демантирате со првиот извештај воведувајќи нова пракса за во иднина носители на функции (претседател на суд) да постапуваат несоодветно и спротивно на законот и етичкиот кодекс и да имаат можност да поправат, стои во реакцијата од Министерството за правда во однос на Судскиот совет за кандидатката за претседател на Основниот суд во Куманово, Снежана Манев, тврдејќи дека судија што не положил психолошки тест за личност и тест за интегритет не може веднаш повторно да полага“.
Според Министерството за правда, со ова се остава простор за секаков влијание.
Бистри настани за октомври 2023 година
Откриено злосторничко здружување за даночно затајување
Приведени 20 осомничени за затајување данок и перење пари во злосторничко здружување од 26 сопственици и управители на 28 фирми, шестмина се во бегство – јавен обвинител од ОJO за гонење организиран криминал и корупција донел наредба за истрага против 26 сопственици и управители на 28 фирми за кои постои основано сомневање дека сториле кривични дела злосторничко здружување, даночно затајување и перење пари и други приноси од казниво дело од чл. 273 од Кривичниот законик.
Зголемен број пријави за поткуп
Кривична пријава за полицаец од Арачиново поради злоупотреба на службента положба и овластувањето – Одделот за внатрешна контрола, криминалистички истраги и професионални стандарди достави кривична пријава против А. А., вработен во ПО Арачиново при СВР Скопје, поради постоење основи на сомнение дека сторил кривично дело злоупотреба на службената положба и овластувањето по член 353 ст.1 од КЗ на РСМ.
До надлежните служби при МВР доставувал лажни списи со евидентирани работни часови за исплата на плата, без да приложи извештаи за привремена спреченост за работа за работникот И. Џ., кој не доаѓал на работа, со што му овозможил противправно да се стекне со горенаведениот паричен износ, а со тој износ го оштетил буџетот на МВР. Од страна на Одделот за внатрешна контрола, криминалистички истраги и професионални стандарди ќе биде поведена и постапка за утврдување дисциплинска постапка и привремено отстранување на работникот од работното место до завршување на дисциплинската постапка.
Кривична пријава против лице од Неготино зазлоупотреба на службената положба и овластувањето – Надворешната канцеларија за криминалистички работи од ОВР Неготино поднесе кривична пријава против М. Д. (41) од Неготино поради постоење основи на сомневање дека извршил кривично дело злоупотреба на службената положба и овластувањето, предвидено во член 353 став 1 од Кривичниот законик. Пријавениот, во периодот од 14.9.2023 до 21.9.2023, во својство на овластено лице вработено во Општина Неготино ја злоупотребил службената положба со пречекорување на своето службено овластување, при што на барателите за користење јавен простор за манифестацијата „Неготински панаѓур 2023“ им наплаќал во кеш и на тој начин за себе противправно присвоил парични средства во износ од 98.100 денари нанесувајќиму штета на буџетот на Општина Неготино.
Поднесена кривична пријава против жител на Сарај за давање поткуп“ – Единицата за економски и компјутерски криминал при СВР Скопје поднесе кривична пријава против А. С. (50) од с. Ласкарци, општина Сарај, поради постоење основи на сомнение за сторено кривично дело давање поткуп по член 358 од Кривичниот законик. Откога полициски службеници констатирале сообраќаен прекршок и го известиле дека ќе му биде изготвен прекршочен платен налог, пријавениот извадил и на совозачкото седиште од службеното возило фрлил 1.000 денари за да не го изготват налогот, велат од МВР.
Приведен вработен во Шумската полиција во Демир Хисар поради примање поткуп – полициски службеници од ОВР Демир Хисар на патот меѓу с. Света и с. Единаковци, на подрачјето на Демир Хисар, го лишиле од слобода Д. Т. (58) од Демир Хисар, вработен во Шумската полиција во Демир Хисар, поради сомнение за сторено кривично дело по чл. 357 од КЗ примање поткуп. Д. Т. од лице од Демир Хисар побарал пари, а за возврат да не постапи, односно да не санкционира незаконско работење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Мора да се почитуваат пресудите од Стразбур и нашиот идентитет, а Македонија мора да најде решение кое ќе спречи идни предавства за да не може некој нов трговец од Горни Милановац или хирург од Дубаи да ги прекрши
На денешниот 18-ти Конгрес на ВМРО-ДПМНЕ под мото „Визија што гради држава – За генерацијата што доаѓа 2030“, кој се одржува во спортскиот комплекс „Јасмин“ во Кавадарци, претседателот на партијата, Христијан Мицкоски“ се обрати и порача дека при евроинтегративниот процес Македонија мора да обезбеди решение со јасни црвени линии, кое ќе го заштити идентитетот и ќе спречи идни условувања и предавства.
„Не чекаат сериозни предизвици. Имаме отворено прашање со нашиот источен сосед, но се чини дека нема соговорник од другата страна. И мислам дека нема подобро место од овој 18-ти конгрес на ВМРО-ДПМНЕ, да испратиме многу јасна и прецизна порака. Додека сум јас претседател на ВМРО-ДПМНЕ, нема да се поместам ниту 1 милиметар од оваа позиција“, нагласи Мицкоски.
Мицкоски посочи дека источните соседи треба да се одлучат дали сакаат билатерални разговори или разговори со Брисел.
„Подготвени сме да разговараме, свесни сме за капитулациите и предавството на најкриминалната влада во историјата на независна Македонија, предводена од СДС и ДУИ. Свесни сме за штетата, историска, која ја нанесоа на граѓаните и државата. Не го игнорираме сето тоа. Подготвени сме да разговараме, но прво нека се одлучат какви разговори сакаат да имаме, билатерални или разговори со Брисел. Ако се билатерални, тогаш се потврдува нашата теза дека ова е билатерализација на нашиот европски пат. Ако сакаат да разговараме во Брисел, во присуство на евродипломатите, подготвени сме да заминеме уште утре и да ги презентираме нашите аргументи“, вели тој.
Понатаму, Мицкоски истакна дека постојат два столба за кои е подготвен да разговара, но нема да се помести ни милиметар се додека не бидат испочитувани договорите и меѓународното право.
„Нема поместување ниту милиметар, се до моментот, додека не биде испочитувана и последната буква и последниот интерпункциски знак, од договорите и од меѓународното право, и она што им припаѓа на Македонците од другата страна на границата во Пиринска Македонија. А тоа е, ни помалку ни повеќе, доследна примена на сите досегашните пресуди на Судот за човекови права од Стразбур, во својство и во насока на исполнување на правата на македонската заедница кај нашиот источен сосед. Тоа е прво“, рече Мицкоски и дополни:
„И второ, ако навистина, никој нема проблем со нашата вековна идентитетска константа, и нашиот мајчин македонски јазик, и дека нема да има повеќе билатерални вета, тогаш најмалку што заслужија граѓаните на оваа земја, е нови заклучоци од страна на Европскиот Совет. Ова се двата столба за кои што сме подготвени да разговараме“.
Тој нагласи дека Македонија мора да најде решение кое ќе спречи идни предавства и ќе ги исцрта црвените линии.
„Затоа сметам дека Македонија мора да направи решение, кое ќе спречи идни предавства и кое ќе ги исцрта црвените линии, но на начин на кој нема да може некој нов трговец од Горни Милановац или Хирург од Дубаи да ги прекрши држејќи ја раката на срцето, со блага насмевка и гнасни и предавнички намери“.
Македонија
Мицкоски со порака: Кој мисли дека функцијата се наследува заради блискост, со плетење мрежи и со неконзистентност – греши
На денешниот 18-ТИ Конгрес на ВМРО-ДПМНЕ кој се одржува во Спортскиот комплекс „Јасмин“ во Кавадарци под мотото „Визија што гради држава – За генерацијата што доаѓа 2030“ се обрати претседателот на ВМРО-ДПМНЕ, Христијан Мицкоски кој што истакна дека лидерската позиција во ВМРО-ДПМНЕ не е награда, ниту привилегија, туку обврска и жртва што ја носат само оние што имаат интегритет и дисциплина и сила да ја носат тежината на државата.
Претседателот Мицкоски упати јасна порака до членството и до сите кои ја следат работата на партијата.
„Кој мисли дека претседател на ВМРО-ДПМНЕ се станува лесно – се излажал. Кој мисли дека функцијата се наследува заради блискост или по случаен пат, со плетење мрежи и со неконзистентност – погрешил. Кој мисли дека довчерашните субјективни заслуги ќе му донесат утрешна награда – не ја разбрал оваа партија“, вели Мицкоски и додава:
„Мојот наследник на ВМРО-ДПМНЕ нема да биде човек што само победува во анкети, или што знае да аплаудира. Тоа ќе биде човек со ’рбет, со интегритет, со дисциплина и фокус. Ќе биде човек што знае да ја носи тежината на државата. Што знае да издржи. Што знае да прости. Што знае да биде чесен и кога боли и кога сите се откажуваат од него затоа што во моментот им е така опортуно да прават. Наследникот мора да биде човек што ќе знае дека партијата е поголема од него, а не човек што мисли дека е поголем од партијата. Мора да биде човек што ќе може да ја води Македонија – не во 2025 година, туку во 2050 година“.
Мицкоски додаде дека во ВМРО-ДПМНЕ никогаш не се успевало со шепотења по ходници, со интриги или со претерана самодоверба, туку со работа, пожртвуваност и искрена намера да се служи на државата.
„Мојот наследник ќе мора да го носи овој товар со истиот мир што го носам и јас денес. Ќе мора да биде човек што може да ја води државата, а не човек што ќе ужива во раскошот на функцијата заслепен од своето его. Ќе мора да биде повикан од зрелост, а не од суетата“, заклучи Мицкоски.
Македонија
Мицкоски: Како генерација имаме привилегија да направиме премостување од Македонија оптоварена со кризи во држава со јасна насока и со свест дека иднината не се очекува, туку создава
На XVIII Конгрес на ВМРО-ДПМНЕ кој се одржува во Спортскиот комплекс „Јасмин“ во Кавадарци под мотото „Визија што гради држава – За генерацијата што доаѓа 2030“ се обрати претседателот на ВМРО-ДПМНЕ, Христијан Мицкоски кој што истакна дека како генерација имаме привилегија да направиме премостување од Македонија оптоварена со кризи во држава со јасна насока и со свест дека иднината не се очекува, туку создава.
„Во секоја политичка генерација доаѓа миг кога мора да се издигнеш над прашањата „што“ и „како“, и да одговориш на едно многу подлабоко „зошто“. Ние денес не расправаме само за програми, ниту за изборни циклуси, говориме за смислата да се води една држава низ турбулентен век во кој повеќето нации се прераскажуваат себеси, а некои дури се борат да опстанат. Македонија е во редот на држави кои не смеат да си дозволат ниту грешка на самодоволност, ниту луксуз на краткорочна мисла“, кажа Мицкоски и додаде:
„Нашиот пат, драги мои, не е линија што трча од избори до избори. Тоа е патека што ја исправа државата. Во мигови кога малите земји се принудени да докажат зошто заслужуваат свое место во светот, нашата должност е да покажеме дека силата на Македонија не лежи во нејзината големина, туку во нејзината издржливост, во зрелоста на нејзините институции, во способноста на нејзините луѓе да гледаат пошироко од хоризонтот на сопствените грижи“, нагласи Мицкоски.
Мицкоски во својот говор истакна дека ја прифаќа довербата не како политичка победа, туку како заеднички завет.
„Нашата генерација има ретка привилегија: да го премости времето меѓу старата Македонија држава оптоварена со кризи, сомнежи и неизвесности и новата Македонија која ја градиме денес, држава што стои исправено, со повисока самодоверба, со јасна насока и со свест дека иднината не се очекува, туку се создава. Токму затоа ја прифаќам оваа доверба не како политичка победа, туку како заеднички завет. Завет дека ќе ја продолжиме модернизацијата без да ја изгубиме суштината. Завет дека ќе ја чуваме традицијата без да станеме заложници на минатото. Завет дека ќе се движиме европски, но секогаш македонски. И завeтoт дека секоја наша одлука ќе ја мериме со прашањето: „дали го јакне достоинството на државата?“, кажа Мицкоски.
Претседателот на ВМРО-ДПМНЕ потенцира дека секој што ја предводи ВМРО-ДПМНЕ мора да ја разбере вистината што често се заборава дека Македонија не пропаѓала од слабости, туку од мали амбиции.
„Историјата не нè учи дека победи се кратки, но системите се долги. И ако нашето дело има вредност, таа ќе биде измерена не денес, туку за дваесет години кога новите генерации ќе можат да кажат дека живеат во земја што не паднала во искушение да се повторува, туку се осмелила да се преобрази. Секој што ја предводи оваа партија мора да ја разбере вистината што често ја забораваме: Македонија не пропаѓала од слабости, туку од мали амбиции. Од политичари што мислеле за следниот говор, а не за следната генерација. Од влади што правеле пријатели, но не и институции. Од системи кои се одржувале на импровизација, а не на дисциплина“, потенцира Мицкоски.
Мицкоски истакна дека наша задача е да се изгради држава што нема да се моли за почит, туку ќе ја добива затоа што ја заслужува.
„Нашата задача е спротивното. Да изградиме држава што ќе трае подолго од нашите имиња. Држава што ќе ја подигне самодовербата на народот. Држава што нема да се моли за почит, туку ќе ја добива затоа што ја заслужува. Држава што ќе има економија со перспектива, институции што не зависат од волјата на поединци, образование што ги отвора вратите на светот, и национална сила што не се темели на гласност, туку на стабилност“, заклучи Мицкоски.
Експерти предупредуваат на радиоактивна прашина по оштетувањето на обвивката на Чернобил
Заштитната обвивка изградена за да спречи ширење на радијација од нуклеарната централа Чернобил мора итно да се поправи откако беше...
Мицкоски: Европската интеграција не смее да се сведе на пасивно прифаќање, Македонија мора да знае да каже ДА кога тоа е во нејзина корист
Во 21 век, историското наследство не може да биде изговор за застој. Напротив, тоа е најсилен мотив државата да биде...
Орбан: ВМРО стана една од најуспешните политички сили во Европа, ја поставивте вашата татковина на патот на стабилен, предвидлив и безбеден развој
Претставници на сестринските партии на ВМРО-ДПМНЕ упатија честитки за како што велат, достигнувањата на партијата кои ги имаше во последните...
Тошковски доби опомена од „Сејф сити“ – возел со 1 километар на час над дозволената брзина
Министерот за внатрешни работи, Панче Тошковски, на Фејсбук објави дека добил порака за сторен сообраќаен прекршок од „Сејф сити“. „Утрово,...
Томовски: СДС да се извинат за клеветите и измислицитe, посочената компанија не е моја, во моментов немам никаква приватна компанија
„Посочената компанија не е моја, ниту пак имам било каков удел во нејзе. Јас во моментов немам никаква приватна компанија...
(Видео) Димитријевиќ: Семејната фирма на директорот на СОЗР добила 161 тендери за 5,3 милиони евра
Опозициската СДСМ денеска обвини дека семејната фирма на директорот на СОЗР, Ивица Томовски, која го менувала името, добила 161 тендери...
Македонија нема, не планира и не преговара за отворање мигрантски кампови, порача ВМРО-ДПМНЕ
Владејачката ВМРО-ДПМНЕ реагира по објавите на британските медиуми и СДСМ дека Владата подготвува договор со Обединетото Кралство за отворање центар...
Британски медиуми објавија дека се преговара со Македонија за отворање центар за мигранти, СДСМ ја повика Владата да ја објави содржината на разговорите
Социјалдемократскиот сојуз на Македонија ја повика Владата веднаш да ја објави целата содржина на разговорите со Британија и да одговори...
Никаде го немало македонското знаме на прославата на Денот на албанското знаме, прекршочна постапка за Општина Струга
Полицијата поднесе барање за поведување прекршочна постапка против Општина Струга и уште едно физичко лице затоа што на денот на...
Поранешните премиери се скараа на „Фејсбук“: Груевски вели дека Заев е дволичен, тој му одговори дека треба да си најде хоби, а не да пишува епопеи од бегство
Поранешните премиери Никола Груевски и Зоран Заев со обвинувања преку социјалната мрежа „Фејсбук“. Груевски го нарече Заев дволичен, а тој...
Од 1 јануари се намалува надоместокот за дистрибуција на струјата, останува ЕВН да ги објави финалните цени
Од 1 јануари 2026 година надоместокот за користење на електродистрибутивниот систем „Електродистрибуција“ ДООЕЛ се намалува 3,64 %, надоместокот за користење...
Алиу: Со синдикатите сме на иста страна, заеднички работиме на унапредување на статусот на здравствените работници
Министерот за здравство Азир Алиу денеска одржа работен состанок со претставниците на Самостојниот синдикат за здравство, фармација и социјална заштита...
Кривична против директорка на средно училиште во Делчево: набавила фалсификуван тест за познавање аглиски јазик од Бугарија
СВР Штип – ОВР Делчево, до Основното јавно обвинителство Делчево, поднесе кривична пријава против Д.Ц.(53) од Делчево поради постоење основи...
(Видео) „Корупцијата на власта оди до Брисел“, Филипче ја повика Ковеши да дојде во Македонија
Претседателот на Социјалдемократскиот сојуз на Македонија, д-р Венко Филипче, на денешната прес-конференција упати повик до главната европска обвинителка, Лаура Ковеши,...
Во Грција поплавени патиштата поради бурата, а училиштата во делови од земјата затворени
Бурата „Бајрон“, која ја погоди Грција, предизвика затворање на многу училишта, поплавени патишта и затворање на автопатот Атина-Коринт. Рано утрово,...
(Видео) Украина погоди руско пристаниште и рафинерија за нафта во напади со дронови
Украинските беспилотни летала извршија напади врз клучни руски енергетски објекти синоќа, погодувајќи го морското пристаниште Темрјук во Краснодарскиот крај и...
Маж во Австрија ја оставил девојката на планина, таа замрзнала до смрт: обвинет за убиство
Маж (36) се соочува со обвиненија за убиство од небрежност откако ја оставил својата девојка (33) да замрзне до смрт...
Путин: Подготвен сум за војна со Европа; Америка: Ќе бидете добро со помалку наши војници
Намалувањето на бројот на американски војници во Европа нема да ја загрози одбраната на континентот, изјави во вторник врховниот командант...
Медиумите: Дронови забележани во близина на рутата на летот на Зеленски на пат кон Даблин
Ирската морнарица забележала околу пет дронови кои дејствувале во близина на рутата на летот на украинскиот претседател Володимир Зеленски за...
Трамп сакаше да отпушти 250 вработени во Стејт департментот, судот ја блокира неговата одлука
Одлуката на американското Министерство за надворешни работи за отпуштање на околу 250 вработени беше блокирана на суд во четврток, што...
