Македонија
Блупринт групата: Јолевски да се огради од навредите на членови на Советот против граѓанското општество и да побара извинување

Блупринт групата за реформи во правосудството преку медиумите се обраќа до претседателот на Советот на јавните обвинители, г. Јолевски, и го повикува во името на Советот да се произнесе за ставот на Советот во однос на дискусијата водена од страна на членови на Советот на јавни обвинители на седницата одржана на 11 ноември 2022 година, а на која беа упатени навреди за претставниците од граѓанското општество, професионалци во правната професија и функционери. Поради тоа, контекстот на дискусијата беше крајно непрофесионален, во целост спротивна на стандардите за етичко однесување на јавните обвинители и претставува ризик за создавање недоверба, што може да доведе до несоработка со заинтересираните страни во реформата на правосудството.
Имено, на 69-тата јавна седница на Советот на јавните обвинители, одржана на 11 ноември 2022 година, на која присуствуваа и претставници од организациите членки на Блупринт групата за реформи во правосудството, а кои редовно ја следат работата на Советот на јавните обвинители (под точка разно од дневниот ред), од страна на членовите на Советот беше отворена дискусија за јавните реакции на стручната јавност, правните експерти и граѓанските организации за спроведувањето на изборот на основен јавен обвинител на ОЈО ГОКК.
Во рамките на дискусијата, еден од членовите на Советот во неколку наврати упати навреди кон Блупринт групата и граѓанското општество во целина, при што се обиде навредливо да ја дискредитира работата на организациите од Блупринт групата. Од дискусија на овој член на Советот, која содржеше неаргументирани несогласувања со јавно споделениот став на Блупринт групата за недоволната транспарентност во процесот на избор на основен јавен обвинител на ОЈО ГОКК, најмногу загрижува неговиот став и намера да укаже дека граѓанските организации не треба воопшто да даваат мислење во јавноста за работата на Советот и дека тие се под политички влијанија и критиките упатени кон Советот се со намера за рушење на неговиот кредибилитетот. Оваа дискусија не беше спречена од страна на претседателот на Советот на јавните обвинители, ниту од друг член, а уште позагрижувачки е дека не беше ниту изолирана. Имено, во продолжение на дискусијата од страна на друг член на Советот беше истакнато дека ставовите искажани од нивниот колега за Блупринт групата се ставови и на Советот.
Веднаш по завршувањето на седницата, Блупринт групата испрати писмо до г. Јолевски како претседател на Советот на јавните обвинители со барање во најкус рок да се произнесе дали искажаните ставови на двајцата членови се став на Советот или се лични ставови на членовите на Советот.
Тргнувајќи од досегашната соработка помеѓу Блупринт групата за реформи во правосудството и Советот на јавните обвинители, сметаме дека со искажаната дискусија со навреди и непрофесионален тон се создава околина на недоверба и несоработка помеѓу Советот и граѓанското општество во клучен момент за процесите за реформа на правосудството и европските интеграции. Нас нè загрижува потценувачкиот и навредувачкиот однос од член на Советот, кој е истакнат правник, и сметаме дека тој претставува и притисок врз граѓанското општество, со цел да ја ограничи конструктивната критика упатена кон работата на јавните институции, а со тоа и да се намали степенот на отвореност, инклузивност, транспарентност и отчетност на институциите, кои се клучни елементи на принципот на владеење на правото како темел на демократските општества.
Очекуваме од г. Јолевски како претседател на Советот на јавните обвинители, кој досега покажал висок професионален интегритет и бил отворен за комуникација и соработка со граѓанските организации, во името на Советот на јавните обвинители да се произнесе по барањето на Блупринт групата за реформа на правосудството и притоа јавно да се огради од ставовите искажани од двајцата членови на Советот против граѓанското општество и да побара од нив да се извинат за навредите упатени кон претставниците на граѓанките организации и кон сите други кон кои биле упатени навредите и дискредитациите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова: Ромите не заслужуваат маргинализација и дискриминација, туку отворена поддршка и рамноправност во сите права

Претседателката Гордана Сиљановска-Давкова се обрати на второто издание на годишниот настан „Разговори за еднаквост“ којшто годинава Комисијата за спречување и заштита од дискриминација го организираше на тема „Право на домување на Ромите“.
Во своето обраќање Сиљановска-Давкова истакна дека не треба да се зборува само за статистика или политики, туку да се чуе за нееднаквоста, за животните искуства на Ромите, како најранлива категорија наши граѓани, кои се соочени со системска и со структурна дискриминација врзана за законско непоседување сопствен дом или стан, „осуденост“ на живот во непостојано, несигурно или супстандардно живеалиште на периферијата, без пристап или отежнат пристап до вода за пиење, без услови за лична хигиена, во недостиг на животен простор, односно катче за секој член на најчесто многудетното семејство.
Како претседателка која ги претставува сите граѓани, таа посочи дека има политичка, правна, етичка и морална обврска да не дозволи ниту една заедница да се чувствува запоставена, изоставена, маргинализирана, дискриминирана.
Според неа, потребна е не само институционална, туку и индивидуална човечка борба за надминување на предрасудите, на стереотипите и докажана грижа за најранливите, односно обид за согледување на Ромите низ ромски очи, заради уривање на (не)видливите ѕидови зад коишто е изолирана и маргинализирана ромската заедница. Потребни се чекори за вклучување на Ромите во општествениот и политичкиот живот.
,,Потребна е инклузивна, наместо ексклузивна политика на домување во чие креирање ќе учествуваат и Ромите” – рече претседателката.
Во општините со доминантно ромско население, според претседателката, мора да се применуваат исти урбани стандарди, вклучувајќи ги и оние на домување како и во другите општини.
Сиљановска-Давкова посочи дека на нашите сограѓани Роми секогаш им вели дека не се дојденци во оваа земја, туку таа е и нивен дом. Порача дека тие не заслужуваат маргинализација и дискриминација, туку отворена поддршка и рамноправност во сите права, вклучувајќи го и правото на пристоен дом.
Настанот на којшто се обратија и шефот на делегацијата на Европската Унија, амбасадорот Михалис Рокас, заменик министерот за локална самоуправа, Ерџан Селими, претседателот на Комисијата за спречување и заштита од дискриминација, Лимко Бејзароски и лидерката на компонентата 4 од проектот „Поддршка на ЕУ за владеење на правото“, Барбара Лигл е финансиран од ЕУ и имплементиран од Лудвиг Болцман Геселшафт – Институт за фундаментални и човекови права (LBI-GMR), австриско владино тело кое функционира како институт за истражување, обука и консултации.
Македонија
Хеликоптер на МВР исфрли повеќе од 30 тони вода во реонот на Дојран

Денеска во попладневните часови хеликоптерот бел 412 беше повикан за гасење пожар во реонот на Дојран, соопшти МВР.
Притоа во 22 налети биле исфрлени преку 30 тони вода.
„Поради ноќните услови хеликоптерот се повлече во базата“, информираа од ова министерство.
Македонија
Морбидни обивнувања на Мицкоски и измислени приказни за пожарите, велат од СДСМ

Нема крај на морбидното однесување на ВМРО-ДПМНЕ и Христијан Мцикоски. Во услови на огнена стихија и прогласена вонредна состојба на територија на целата држава, партијата на власт наместо да бара решенија, бара изговори за катастрофата, реагираат од СДСМ.
„Минатата година со ВМРО-ДПМНЕ на власт изгореа помеѓу 10% и 15% од целокупната територија на земјата. И тогаш наместо одговорност, Мицкоски бараше виновници додека ветуваше дека ЌЕ биде подобро следната година.
Точно една година подоцна, во моментов гори тоа што остана од шумите и зелените површини низ земјава да догори.
Нема нова опрема – промовираа стари реновирани хермелини и БТР кои ги нема никаде на терен бидејќи веќе се во сервис.
Нема нови авиони, поточно, воопшто нема авиони.
Нема пилоти, иако ветуваа дека за една година ќе обучат и вработат доволно нови пилоти.
Нема нови пожарникари, а сега за 24.000 денари бараат привремени пожарникари кои би требало за минимална плата да го ризикуваат сопствениот живот. Цела година немаат абер да почнат да работат“.
Населението, додаваат од опозициската партија, само се спасува, кравите бегаат и не ја пасат тревата, пожарите беснеат, само Мицкоски не е крив.
„Мицкоски е одлепен од реалноста. Веќе има една жртва од пожарите, а наместо збор на утеха или превземање на мерки, Мицкоски повторно забегува во некрофилска реторика и бара виновници, бркајќи духови“, оценуваат од СДСМ.