Македонија
Богдановиќ: Со новите ДУП-ови во Центар зачувани се над 13.000 квадратни метри парковско зеленило
На продолжението на 59-тата седница советниците од Советот на Општина Центар гласаа за донесувањето на детаљниот урбанистички план Градска четврт Ц 04 – Дом на градежниците.
Станува збор за градска четврт, која во голем дел е реализирана и, како што беше посочено, повеќето од објектите се задржуваат во постојна состојба.
„Во споредба со стариот ДУП, кој предвидува 4.043 квадратни метри парковско зеленило, новиот план има вкупно 5.889 квадратни метри парковско зеленило, со што речиси 13 % од површината на овој четврт е под парковско зеленило. Наместо да се проширува, евидентиран е постојниот паркинг и задржан е во сегашната состојба, а зголемен е процентот на зеленило и дрвореди. Наместо изградба на паркинг на веќе постојно детско игралиште, детското игралиште со површина од 408 квадратни метри во новиот план е зачувано, како и постојниот паркинг околу него. Во согласност со новиот план, сите нови објекти мора да го обезбедат неопходниот број паркинг-места во своја парцела“, изјави на денешната прес-конференција градоначалникот на општина Центар, Саша Богдановиќ.

Избришан е еден објект за колективно домување, кој според стариот план би се градел на државно земјиште, а во новиот план заменет е со локален парк од 262 квадратни метра и пешачка патека.
Стариот план предвидува заеднички подземен паркинг за дел од парцелите, воедно предвидена е пристапна улица на местото на пешачката патека „Кај Маршалот“. Со новиот план секој објект треба засебно да предвиди паркирање. За објектите од внатрешноста на блокот се предвидува пристап преку пасажи од улицата Максим Горки, со што се задржува пешачката патека „Кај Маршалот“ и таа нема да стане улица за автомобили.

„Досега во ДУП-от Ново Маало 1 избришан е хотел, зачувано е зеленилото и изведен е памп-трак на површина од 2.927 квадратни метри. Во ДУП Мирче Мацан зголемен е училиштен двор на сметка на објект за колективно домување со површина од 922 квадратни метра и намалена е парцелата на трговски објект на сметка на 492 квадратни метра ново зеленило. Во ДУП-от Даре Џамбаз преместена е планираната катна гаража и зачувани се постојното детско игралиште и парковското зеленило со површина од 808 квадратни метри. Во ДУП-от Пролет пренаменета е парцелата на урбаната заедница и на нејзино место ќе никне нова градинка на површина од 1.992 квадратни метра. Во новиот ДУП Пролет избришан е верски објект и на негово место е предвидено парковско зеленило на површина од 804 квадратни метри, а дополнително се предвидени и нови 8.788 квадратни метри парковско зеленило. Во ДУП-от Тасино Чешмиче избришан е станбен објект и на негово место на површина од 1.996 квадратни метри е предвидена изградба на нов објект за здравствена заштита. Вкупно во досега донесените ДУП-ови зачувани се над 13.000 квадратни метри парковско зеленило“, појасни градоначалникот Богдановиќ.
Наведе дека намерите на Општина Центар за овозможување нормални услови за живеење се видливи и во плановите што се во завршна фаза. Оттаму, предвидени се пет нови детски градинки во ДУП-овите Геолошки завод и Клинички центар; Парк/Дебар Маало 2; Маџир Маало, Буњаковец и Крњево, нови 2 културни центра (ДУП Парк/Дебар Маало 2 и ДУП Мал ринг), изведба на 1 блоковски парк од 1.061 квадратен метар во ДУП Геолошки завод и Клинички центар и повеќе мали паркови на сметка на бришење станбени згради.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Герасимовски: Воведуваме „Центарска картичка“ со попусти за културни, спортски настани, локали и продавници
Кандидатот за градоначалник на Општина Центар, Горан Герасимовски, денеска најави дека се воведува „Центарска картичка“ со попусти за културни и спортски настани, локали и продавници.
„Секој центарец добива еднаш годишно бесплатна карта за театарска претстава, а за секоја следна купена карта добива 20% попуст. Со картичката, овоможуваме и 20% попуст за натпреварите на нашиот најтрофеен клуб „Работнички“, како и попусти за влез на базен. На нашите центарци, на децата и возрасните им овозможуваме подобри услови и поволности“, рече Герасимовски.
Македонија
Почина Агим Јонуз
Политичкиот анлитичар, Агим Јонуз, почина во Скопје на 63 години по боледување.
Јонуз беше активен во политичкиот живот во Македонија не само како аналитичар и колумнист, туку и како поранешен советник и портпарол на поранешниот претседател на Собранието, Лупчо Јордановски и на поранешниот премиер Бучковски.
Во 2021 година Јонуз беше носител на листа на советници за Град Скопје предложен од „Твоја Партија“.
Јавноста го познаваше како чест гостин во политичките дебатни емисии на телевизиите.
Погребот на Агим Јонуз ќе се одржи утре, 26 октомври 2025 година, на гробиштата во Бутел.
Македонија
ВМРО-ДПМНЕ веќе има 35 градоначалници, рече Мицкоски по повлекувањето на опонентите од Могила и Македонски Брод, очекува 59
Премиерот и претседател на ВМРО-ДПМНЕ, Христијан Мицкоски од денешниот митинг во Неготино изрази увереност дека кандидатката од ВМРО-ДПМНЕ која има предност пред нејзиниот опонент од СДСМ, ќе биде следниот градоначалник на општината.
Мицкоски нагласи дека граѓаните јасно ја изразиле својата волја и доверба кон ВМРО-ДПМНЕ и Коалицијата, која во првиот круг освоила 33 градоначалници, наспроти тројца од СДСМ, а во вториот круг влегла во 26 општини.
„Веќе во две општини противниците на нашите кандидати се откажаа – Македонски Брод и Могила – така што во овој момент коалицијата има 35 градоначалници и уште во 24 општини е во втор круг. Тоа се 59 потенцијални градоначалници“, рече Мицкоски, додавајќи дека тоа ќе биде историски најголем триумф на македонската политичка сцена.
Тој посочи дека ВМРО-ДПМНЕ е апсолутен победник на овие избори, имајќи мнозинство и во 58 општински совети, а го истакна и водството на кандидатот за градоначалник на Град Скопје, со предност од над три спрема еден во однос на противкандидатот.
Мицкоски ги повика граѓаните масовно да излезат на гласање на 2 ноември и да го заокружат бројот 9, за, како што рече, да се потврди „најголемата победа во историјата на Македонија“.

