Градоначалникот на Општина Карпош, Стефан Богоев, денеска пред јавноста го презентираше извештајот на Државниот завод за ревизија за материјално-финансиското работење на Општината, во текот на изминатите четири години. Извештајот утринава беше доставен и до Основното јавно обвинителство и до Управата за финансиска полиција со цел, како што рече Богоев, да се утврди одговорност за сите нерегуларности и повреди на законските одредби констатирани од страна на овластениот државен ревизор и ревизорскиот тим.

На почетокот Богоев напомена дека вкупниот долг на Карпош е 18 милиони евра или 1.105.000.000 денари. Но, додаде Богоев, Државниот завод за ревизија посочува дека покрај главниот долг, кој најчесто потекнува од минати години (2012, 2013, 2014, 2015), Општината должи и големи суми за дополнителни трошоци (адвокатски, нотарски, трошоци за извршител, процесни и парнични трошоци).

Исто така, рече Богоев, во 2014 година се подигнал и кредит од 160 милиони денари (2,6 милиони евра). „Намената на кредитот бил за тековни инфраструктурни проекти во Општината, но ревизорскиот тим констатирал дека истиот е потрошен ненаменски. Средствата целосно се искористени за плаќање  заостанати обврски, од минати години, со што е прекршен членот 20 став 6 и 26 од Законот за финансирање на единиците на локална самоуправа, според кој средствата обезбедени со долгорочно задолжување се користат за намената за која се одобрени“, појасни Богоев.

На прес-конференцијата Богоев говореше и за пропустите при изградбата на новата општинска зграда и постоечките општински бараки. Тој рече дека за постоечките простории во кои е сместена Општината, односно изградбата на бараките е без одобрение за градење и без одлука од Советот на Општина Карпош.

Богоев, исто така, рече дека од извештајот се видело дека се доделувале средства на повеќе организации, здруженија на граѓани, поединци и правни лица кои не давале финансиски извештаи, фактури за начинот на кој ги потрошиле доделените средства. Исто така, меѓу локалната самоуправа и овие субјекти не се склучувале ниту договори во писмена форма.

Државниот завод за ревизија, рече тој, го забележува и фактот дека се доделувале буџетски средства на кошаркарскиот клуб ‘Карпош соколи’ АД Скопје. „Во 2016 година исплатени се средства во износ од 38 милиони денари (618 илјади евра). За доделените средства, клубот нема дадено детални податоци за начинот на кој се потрошени. Инаку, од 15 март 2015 година Општина Карпош се јавува и како основач на КК ‘Карпош соколи’ АД Скопје и истовремено доделува финансиска поддршка на акционерското друштво“, рече Богоев.

Како што рече тој, Општина Карпош при исплатата на средства/трансфери до спортски клубови, не склучувала договори во писмена форма со примателот на донацијата и спонзорството и не се изготвувани извештаи за начинот на кој е трошена дадената донација/спонзорство, со што се повредени Законот за облигациони односи и Законот за донации и спонзорства во јавните дејности (член 4 и 19), се вели во извештајот на Државниот завод за ревизија.