Македонија
Богоев: Регионалната соработка е клучна во борбата против шверцот, нелегалната трговија и организираниот криминал

Денес и утре, во организација на Царинската управа и со поддршка на Царинската и даночната служба на Обединетото Кралство, се одржува јубилејниот 10-ти неформален регионален состанок, на кој учествуваат директори и високи претставници на царинските управи од Западен Балкан, како и претставници од британското Министерство за надворешни работи – канцеларија за меѓународни операции и EXBS. Главната тема на оваа средба е подобрување на регионалната соработка на царинските служби во насока на заедничка борба против шверцот, нелегалната трговија и организираниот криминал, со цел развој и унапредување на економската соработка во регионот.
„Регионалната соработка е клучна во борбата против шверцот, нелегалната трговија и организираниот криминал. Она што денес е вистински предизвик за нас е да обезбедиме баланс помеѓу потребата од забрзан транспорт и олеснување на трговијата, од една страна, и спроведување ефикасни контроли за заштита на безбедноста и здравјето на граѓаните, од друга. Остануваме и во иднина безусловно посветени на борбата против криминалот и корупцијата и ќе продолжиме со заеднички напори за придонес кон безбедноста и поддршката на легалната трговија, со што ќе обезбедиме забрзан развој и напредок на регионот“, истакна директорот на Царинската управа, Стефан Богоев, во воведното обраќање на состанокот.
На настанот присуствуваше и амбасадорот на Обединетото Кралство, Метју Лосон, кој во своето обраќање посочи: „Обединетото Кралство е посветено на регионот и на соработката со Северна Македонија. Безбеден, стабилен и просперитетен регион подразбира посилни партнери за Обединетото Кралство, со кои можеме да работиме заедно за подобрување на безбедноста и стабилноста, како и да поттикнеме подобрување на трговската соработка со Западен Балкан. Зголемената способност на царинските службеници од целиот регион да работат заедно за зајакнување на механизмите за гранична контрола и споделувње на разузнавачките информации на регионално ниво ќе помогне во решавањето на заедничките закани од сериозниот и организиран криминал, како и на економскиот криминал“.
За време на состанокот се разгледува напредокот во реализацијата на активностите за дефинирање рамка за безбедна размена на информации преку SEED-системот од областа на анализа на ризик, но и во размена на оперативни разузнавачки информации со цел спречување на шверцот, нелегалната трговија и организираниот криминал. Исто така, се дискутира и за примена на ефикасни мерки за спречување на корупција, како и за подготовка на заеднички проекти и идни активности на царинските служби од регионот, со цел олеснување на трговијата, унапредување на царинските постапки и економската соработка во Западен Балкан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски и Филипче ги поделија сферите на интерес и се договорија да ја задушат правдата, велат од Алијанса за Албанците

Премиерот Христијан Мицкоски и лидерот на СДСМ, Венко Филипче во изјавите по денешната скандалозна средба ги потврдија сите наши сомнежи и ги открија своите планови, велат од Алијанса за Албанците.
„Тие се согласија да формираат работни групи во три области кои се поврзани, се вкрстуваат или од интерес за двајцата лидери. Ќе ја подготват реформата во здравството, сфера на интерес на Венко Филипче каде што ќе се заобиколи актуелниот министер Арбен Таравари, во енергетиката, сфера на интерес на Христијан Мицкоски, сопственикот на хидроцентралите и на крајот, „правдата“ каде Филипче и Мицкоски имаат заеднички интерес да се спасат меѓусебно од одговорноста за Кочани, Модуларната Болница во Тетово, Беса Транс и Дурмо Турс и другите трагедии и скандали кои се случија во земјава“, истакнуваат од оваа партија.
Овој договор, како што велат е целосно игнорирачки за Албанците, а воопшто не ги третираат ни нивните албански „партнери“ во Владата.
Овој договор, според Алијанса за Албанците е и против граѓаните, по секоја цена да ја сокријат вистината од нив, да го заробат системот, да инсталираат диктатура како што одамна ја заробија и македонската опозиција и да го уништат секое досегашно достигнување.
По оваа средба, што ќе биде со повторното судење за трагедијата со Модуларната болница во Тетово, кога најодговорниот човек за таа болница ќе го води реформскиот процес во име на „правдата“, прашуваат од оваа партија.
Македонија
Струјата во модуларната болница ја спровеле две неквалификувани лица од тетовската болница, според Шаќири

Денеска во Основниот суд Тетово траеше главната расправа во судскиот процес за обвинетите Флорин Бесими и Артан Етеми како и правното лице ЈЗУ Клиничка болница за кривично дело „тешки дела против општата сигурност“, за пожарот во модуларната болница во која животите ги загубија 14 лица.
Сослушани беа вешти лица кои во текот на истрагата изработиле вештачења.
Според првоовластениот судски вештак по електротехника Ирфан Шаќири кој пред судот образложи дека по наредба на Јавно Обвинителство извршил вешт наод за можните индиции за појава на пожарот во објектот, целокупната постапка за доведување на електрична енергија од трафостаница до модифицираниот објект наречен модуларна болница бил направен од две неквалификувани лица, вработени во Клиничка болница.
„Високата температура довела до согорување на изолацијата од кабелот и создавање на пламен, посочи Рубин Бошковски од Министерството за внатрешени работи кој извршил форензичко испитување.
Според него при вештиот наод утврдиле настанување на механичко оштетување на продолжителниот кабел поради нагмечувања или превиткување, на кој бил приклучен дефибрилатор.
Кажа и дека не биле евидентирани противпожарни апарати во самата болница.
Сведочеа и професори од Технолошко-металуршкиот факултет кои ги испитувале материјалите од кои е составена модуларната болница.
„Материјалите за изработка на префабрикуваниот контејнер ги задоволуваат барањата според спецификацијата на Министерството за здравство и истите се анализирани според процедури за соодветни својства за што гарантирам, кажа професорката Анита Грозданова.
Одбраната по сослушувањето на вештите лица побара да се сослушаат и вештите лица од Германија кои имаат изработен извештај. Судијата Реџеп Муса оцени дека според насоките на повисокиот Апелациски суд предлогот на одбраната се одбива.
„Постојат доволно докази за околности на настанот, посочи судијата.
Поради истекување на работното време, тој ја прекина главната расправа и истата ја закажа за 8 април кога се предвидува да се читаат писмените докази од одбраната.
Македонија
Венко Филипче на отворена сцена денес го фалеше Зоран Заев, се покажа дека е чувар на фотелја, велат од ВМРО-ДПМНЕ

Венко Филипче на отворена сцена денес го фалеше Зоран Заев. Со други зборови тој кажа дека народот треба да му биде благодарен што Заев ја водеше државата, што го смени името, ја упропасти економијата, што СДС стана безгласна буква преку ДУИ, Артан и Ахмети, истакнуваат од владејачката ВМРО-ДПМНЕ.
„Венко Филипче не чувствувал одговорност за модуларната болница, и кажа дека понудил оставка, а не кажа дека заеднички со Заев одлучија да продолжи да биде министер за здравство и оставката беше само блеф кој народот не ја проголта.
Венко Филипче е продолжение на црнилата, криминалот, предавствата и поразите на Зоран Заев“, додаваат од ВМРО-ДПМНЕ.
Според нив, тој нема никаков кредибилитет. Тој, како што потенцираат е само чувар на фотелјата и продолжена рака на Зоран Заев.