Осудениот Бојан Јовановски-Боки 13 за тврдењата дека е цел на тортура, за наводите дека има криминално постапување од страна на Кривичниот суд, но и дека располага со сензитивни податоци за криминал што го правеле највисоките државни структури, ги известил Амбасадата на САД и амбасадорката Анџела Агелер. Неговиот адвокатски тим копија од писмото испрати и во јавноста, каде што наведува дека се бара од Амбасадата и од амбасадорката да го посетат Јовановски-Боки 13 во затворот.

„Молам за помош од ваша страна и молам во најкус можен рок да ме посетите во КПУ ‘Идризово’, вие или друго службено лице, кое би било делегирано од ваша страна. Ова од причини што ценам дека е потребно и значајно со вас да споделам важни и сензитивни податоци со кои располагам, а тие се од крајно сериозен карактер и директно се поврзани со коруптивни дејства на поединци и криминал поврзан со лица од највисоки државни структури. Во тоа име, ве молам за заштита од ваша страна бидејќи се соочувам со реални закани за мојот живот, особено поради тоа што инволивираните лица поседуваат реална моќ и влијание“, посочува Јовановски во писмото.

Освен ова, Јовановски ја известува Амбасадата за тортура, со која тврди дека се соочува.

„Со овој писмен поднесок до вас сакам да ве запознам и да ве известам за целата тортура што ја доживувам, покрај тоа што сум осуден без докази за сторено кривично дело, туку и поради интереси на политичките и бизнис-моќници во нашата држава. Во моментот се соочувам со сериозна тортура и незаконито и криминално постапување од страна на судските власти, поточно од страна на Основниот кривичен суд Скопје, па оттука чувствувам дека е потребно да ве известам за реалните состојби во нашиот правосуден систем дотолку повеќе што за овие мои наводи располагам со докази. Со оглед на вашата императивна заложба за владеење на правото во нашата држава, чувствувам должност да ви ги приложам следните документи, од кои неоспорно ќе можете да утврдите тенденциозно и незаконито постапување од страна на судот и поигрување со човечки живот, особено важно што мојата здравствена состојба е од животозагрозувачки карактер во согласност со сите медицински докази што ви ги доставувам во овој писмен поднесок заедно со судските одлуки, од каде што неоспорно ќе можете да ги утврдите селективноста и незаконитото постапување на судот дотолку повеќе што за ова судско решение изразувам основано сомневања дека е фалсификувано и антидатирано за кое сомневање иницирав постапки пред надлежните правосудни органи“, додава Боки 13.

Претходно, писма за наводите за незаконски постапувања беа доставени до домашните институции.