Македонија
Бочварски: Даваме огромна финансиска поддршка на сите општини, до сега реконструиравме над 180 локални улици и патишта

Инвестираме преку 40 милиони денари во капитални проекти за граѓаните на Росоман и за локален економски развој на општината, истакна министерот за транспорт и врски, Благој Бочварски, кој денеска оствари работна посета на општина Росоман.
Тој заедно со градоначалникот Стојан Николов, извршија увид во инфраструктурни проекти што се реализираат во општина Росоман, а се финансираат преку Министерството за транспорт и врски.
При посетата на локалната улица Стерјо Нестороски, министерот Бочварски потенцираше дека огромна е поддршката кон општините што ја овозможува Владата заради поголем развој и подобрување на условите за живеење на граѓаните.
„Драго ми е кога ги подобруваме условите за живот на граѓаните, тоа е наш приоритет и тоа е очигледно во сите општини низ државата. Еве конкретно во Росоман извршив увид на неколку капитални проекти со кои финансиски ја поддржуваме општината, како на пример реконструкцијата на улицата Стерјо Нестороски на која се наоѓаме денеска за која инвестираме над 9 милиони денари и истата очекуваме комплетно да биде завршена во наредните 2 месеци. Исто така, извршивме увид и во изградбата на новиот зелен пазар во Росоман, за кој Министерството за транспорт и врски одвои 10 милиони денари. Претходно ја посетивме и реконструираната улица Гоце Делчев, за која вложивме речиси 14 милиони денари. И сите овие проекти се за развој на општината. Дополнително големо економски развој ќе донесе и изградбата на експресниот пат од Градско кон Прилеп кој исто така очекуваме да го завршиме оваа година“, изјави Бочварски.
Градоначалникот Николов истакна дека инфраструктурните проекти се од огромно значење за развојот на општина Росоман, подобрување на локалната инфраструктура и урбанизација на просторот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Божиновска: Секој рудар мора да се врати дома безбеден и горд, инспекциите се засилени, а казните построги од кога било

Министерката за енергетика, рударство и минерални суровини Сања Божиновска денеска по повод Денот на рударите присуствуваше на свечената манифестација во РЕК Битола, заедно со претседателот на Владата, Христијан Мицкоски, и раководството на АД ЕСМ. Настанот беше можност да се оддаде почит кон рударите и да се нагласи нивното значење за економијата на државата.
Во своето обраќање, Божиновска истакна дека рударите се економски столб кои секојдневно се соочуваат со предизвици за да обезбедат стабилност и иднина за државата.
„Секојдневна битка со длабочината и темнината за ресурси кои ја движат економијата. Наша цел е секој рудар да се враќа дома безбеден и горд. Министерството стои цврсто зад секој рудар – со современа опрема, безбедни услови за работа и фер стандарди за сите,“ порача министерката.
Таа испрати и јасна порака кон компаниите што работат во секторот:
„За оние што вложуваат во безбедноста на рударите и заштитата на животната средина, поддршката е целосна. Но за оние што мислат дека можат да ја заобиколат законската регулатива – нема компромиси. Инспекциите се засилени, контролите се редовни, а казните построги од кога било. Законот важи за сите – без исклучок“, нагласи Божиновска.
Македонија
Шаќири: Албанците во Македонија се одлучувачки и државотворен фактор

Албанците во Северна Македонија се одлучувачки и државотворен фактор, и затоа оваа улога мора да се гарантира и почитува во секоја институција и на секое ниво на одлучување, велат од Алијанса за Албанците.
„Нашата политичка платформа се раководи од три основни принципи: Традиција, Одговорност и Развој. Овие принципи се столбовите врз кои го градиме нашиот визион за функционална, ефикасна и правична држава, каде Албанците и Македонците заедно ја градат подобрата иднина.
Убедени сме дека дојде време за нов политички договор меѓу Македонците и Албанците, кој ќе се темели врз реална еднаквост, заемна почит и стратешко партнерство. Само така може да се изгради стабилно општество и модерна, европска држава еднаква за сите“.
Алијанса за Албанците, како што нагласи Њомза Шаќири, портпарол на партијата, е политичка сила, позиционирана десно од центарот, која го брани албанскиот идентитет, јазикот и националните традиции, промовирајќи како што велат, истовремено индивидуална слобода, приватна сопственост, пазарна економија и одржлив развој.
„Наш приоритет е локалниот економски развој и зајакнување на општините преку реална децентрализација. Поддршката за младите, семејствата и локалните бизниси е во центарот на нашето политичко ангажирање, бидејќи само така се гарантира еднаков развој и долгорочна стабилност.
Ќе се залагаме за активна вклученост на граѓаните во одлучувањето и за тесна соработка со албанската дијаспора, која останува драгоцено национално и економско богатство“.
Според неа, Алијанса за Албанците, е решена да биде гласот на вистинската еднаквост и гарант на албанскиот национален интерес.
„Со нашата платформа и со нов договор меѓу Македонците и Албанците, ја отвораме патеката кон еднаква, функционална и европска држава“.
Македонија
Мицкоски до Филипче: Време е да бидат конструктивна опозиција, растот на нето-платата сега е двојно поголем во однос на периодот на Владата на СДСМ

„Добро е да се направи споредба меѓу параметрите што ги прават СДСМ и ДУИ кога тие беа во Владата седум години во периодот јуни 2017 до мај 2024 година, кога порастот на реалната нето-плата што ја зедоа вработените во Македонија беше околу 3,5 проценти и оваа една година на Владата на ВМРО-ДПМНЕ и коалицијата односно од јуни 2024 до јуни 2025 кога реалниот пораст на нето платата е 6,5 проценти“, одговори денес претседателот на Владата Христијан Мицкоски на вчерашните обвинувања од страна на претседателот на СДСМ Венко Филипче.
„Математички, но и било како гледано, 6,5 отсто е речиси двојно повеќе од 3,5 проценти. Селективниот пристап и ваквиот тип на политика на СДСМ донесе резултати во Македонија како што бевме сведоци изминатите седум години катастрофални и уништувачки. Но она што е поважно и мој совет до раководството на СДСМ е дека тие со ваквиот селективен пристап ја уништија и сопствената партија, рече тој им порача дека СДСМ треба да е конструктивна опозиција, наместо да лиферува невистини.
Мој совет до СДСМ и до луѓето од раководството е дека тие со ваквиот селективен пристап ја уништија и сопствената партија. Мојот совет е конечно да бидат конструктивна опозиција, наместо да спинуваат и да лиферуваат навистина да почнат да предлагаат нешто коешто ќе значи подобар живот за граѓаните, но и за нас како Влада ќе претставува нешто што е предизвик којшто ние би го прифатиле и би го имплементирале во нашите политики, со еден збор да бидат конструктивна опозиција бидејќи тоа е она коешто им е потребно денеска на граѓаните.“