Македонија
Бочварски од Крањ: На транспортерите им се потребни олеснувања на граничните премини и модерни патишта

Министерот за транспорт и врски, Благој Бочварски, денеска, во Брдо кај Крањ, Република Словенија, учествуваше на министерски состанок за прекуграничното поврзување на земјите од регионот на Западен Балкан и Европската Унија во организација на словенечкото претседателство со Советот на Европската Унија.
На министерскиот состанок присуствуваа министрите за транспорт на Република Грција, Република Словенија, Република Србија, Република Хрватска, Црна Гора, Република Албанија, Босна и Херцеговина, Република Косово, како и претставници на Секретаријатот на Транспортната заедница и Европската комисија.
Во своето обраќање министерот Бочварски истакна дека Република Северна Македонија се стреми кон создавање модерен и безбеден транспортен систем, кој е приспособен на потребите на земјата, за обезбедување поголема мобилност на граѓаните како поддршка на одржливиот развој и раст на националната економија.
„Воспоставувањето сигурен и безбеден транспортен систем е исто така еден од нашите приоритети и вклучува подобрување на безбедноста на патниот и железничкиот транспорт, воведување ИТ-технологии и имплементација на интелигентни транспортни системи во транспортниот сектор. Нашата Влада ја промовира регионалната соработка со ставање во центарот на вниманието на регионалната и меѓународната димензија на сите видови транспорт преку развој и модернизација на транспортната инфраструктура по должината на основната и сеопфатната мрежа на TEН-T, што минува низ земјата“, истакна министерот Бочварски.
Во рамките на дискусијата на темата за подобрување на граничното управување министерот Бочварски истакна дека билатералните договори со соседните земји за заеднички гранични премини се ефикасна алатка за подобрување на транспортот на стока и патници на граничните премини.
Министерот Бочварски истакна дека паралелно со билатералните договори потребно е да се подобри транспортната инфраструктура на граничните премини и по должината на транспортните коридори 8 и 10.
Во рамките на министерскиот совет тој одржа и билатерална средба со министерот за транспорт и инфраструктура на Грција, Костас Караманлис.
На средбата се разговараше за поинтензивна соработка помеѓу двете министерства, како и за обновување на железничката линија Битола – Лерин по должината на Коридорот 10-д.
На маргините на советот се одржа и средба со асоцијациите на транспортерите од Словенија, на која, покрај министерот Бочварски, присустваа и министрите од Словенија, Хрватска, Србија и од Босна и Херцеговина. На состанокот се разговараше за олеснување на транспортот на граничните премини, изнаоѓање начини на поедноставување на процедурите, како и проширување на зелените ленти на граничните прмини со земјите членки на ЕУ од регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Двајца браќа обвинети за убиство и за обид за убиство на подмолен начин

По спроведена истражна постапка, јавен обвинител од Основното јавно обвинителство Скопје денеска поднесе Обвинителен акт против две лица кои како соизвршители се товарат дека сториле едно кривично дело – Убиство од член 123 став 2 точка 1 и уште едно кривично дело – Убиство во обид предвиден со член 19 од Кривичниот законик.
Во текот на истрагата се обезбедени докази кои потврдуваат дека на 01.11.2024 година во Арачиново двајцата браќа на возраст од 23 и 31 година со умисла и на подмолен начин лишиле од живот едно лице и се обиделе да лишат од живот уште едно. Со двајцата оштетени – татко и син обвинетите се договориле да се најдат и да разговараат за наводен долг од 7.000 евра. Со автомобил пристигнале на договорената локација, но по краток разговор, едниот од обвинетите извадил огнено оружје – пиштол и започнал да пука кон жртвите. Од нанесените огнострелни повреди оштетениот татко починал, а синот се здобил со тешки телесни поврeди.
Јавниот обвинител до Основниот кривичен суд Скопје достави и предлог за продолжување на претходно определената мерка притвор за двајцата обвинети, бидејќи се уште постојат законските основи за најстрога мерка за обезбедување.
Македонија
Филипче ја следи политиката на Заев, кој со една раката на срцето се колнеше во македонската жичка, а со другата ја распродаваше, велат од ВМРО-ДПМНЕ

Венко Филипче се гордее со неговиот претходник, Зоран Заев и учи од него. Тој призна дека не сака да се одвои од неговата сенка и дека и народот треба да учи од неговото искуство и политики спроведени во минатото, велат од ВМРО-ДПМНЕ.
„Неговите политики спроведени во минатото од Заев, покрај криминал и корупција се предавството на националните интереси. Зоран Заев е човек кој со едната рака на срце се колнеше во македонската жица и тврдеше дека си ја сака земјата, додека со другата ја распродаваше. Откако со Бугарија влезе во процес на преговори и без око да му трепне, Заев прифати се што Бугарите од него побараа. Сега, таа попустлива политика на Зоран Заев спрема Бугарија, до најмал милиметар ја следи и неговиот наследник во СДС, Венко Филипче. Наместо државничка политика за заштита на националните интереси, Филипче инсистира на попустлива и политика на предавство на националните интереси“, според партијата на власт.
Од оваа партија оценуваат дека политиката на Филипче и СДС е предавничка.
„Пред некој ден потврди и Бујар Османи, кој призна дека со дозвола на СДС, со Бугарија преговарал за етнички прашања.
Со вакви погубни и предавнички политики и послушнички и поданички однос кон Заев, не е ни чудно што на последните анкети на јавното мислење, половина од граѓаните Филипче не го препознаваат за лидер на опозицијата“, додаваат од ВМРО-ДПМНЕ.
Со неговите потези, како што велат, Филипче само потврдува дека СДС продолжува да биде синоним за неспособност, криминал и предавства.
Македонија
„Како Тошковски и МВР штитат роднини на партиски функционери од ДПМНЕ“, СДСМ најави нов скандал

СДСМ извести дека денеска ќе објави нов скандал, поткрепен, како што велат и со видео докази, „како Панче Тошковски и МВР штитат роднини на партиски функционери од ДПМНЕ“.
„Брат да ми е ќе одговара? Дали е ова точно што го кажува Панче Тошковски или уште една голема лага? Дали роднините на партиските функционери од ДПМНЕ праваш што сакаат и никој не ги казнува“, прашуваат од СДСМ и додаваат дека за денеска за 11.30 часот е закажана прес-конференција, во седиштето на партијата.