Македонија
Бојковски: Потребна е физибилити-студија за да се знае колку автобуси се потребни за Скопје

„Скопје е град што овие 15 години се изгради како во Центарот така и во приградските населби и села. Автобуските линии се стари повеќе од 40 години со мали интервенции и не одговараат на потребите на граѓаните, потребно е системско решение, предлагам да се направи физибилити-студија за автобуските линии и за возниот ред што ќе важи за сите автобуси“, истакна советникот во Советот на Град Скопје од ВМРО-ДПМНЕ, Тони Бојковски, на денешната седница на Советот на Град Скопје.
Бојковски посочи дека целта на студијата е да се прикаже колку автобуси му се потребни на Скопје.
„Целта на оваа студија да покаже колку автобуси му требаат на Скопје за потребите на граѓаните. Со новите линии ќе бидат поврзани населби што денес во пракса требаат два автобуса за да се поврзат, тоа значи повеќе километри гориво, но помалку автобуси и возачи, на пример, Бутел и Гази Баба со два автобуса, Гази Баба и Карпош со два автобуса се оди, Кисела Вода и Гази Баба со два автобусиа обратно“, рече Бојковски.
Бојковски потсети дека во 2012 година од Владата предводена од ВМРО-ДПМНЕ биле набавени 300 автобуси и дека навистина можеби проблемот не се состои во набавувањето автобуси, туку изработка на физибилити-студија со цел да се знае колку автобуси му се потребни на Скопје.
„Замислете, во 2012 година, како сите што знаеме, тогашната влада на ВМРО -ДПМНЕ купи повеќе од 300 автобуси, од кои 260 беа големи и повеќе имаше и мали и мини автобуси. Замислете, и со тие 250-300 автобуси што ги купи тогашната влада во 2012 година со возниот ред имаше проблем, значи можеби не е недостиг на автобуси, туку може е навистина дојдено време кога треба да се изработи физибилити-студија за ние навистина да знаеме колку автобуси му требаат на Скопје“, рече Бојковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Се воведува системот за е-фактура, а тоа значи крај за фантом фирмите

Се воведува системот за е-фактура, а тоа значи крај за фантом фирмите и лица кои испумпувале стотици милиони евра народни пари од Буџетот, изјави премиерот, Христијан Мицкоски.
„Оваа е-фактура како процедура ќе значи да нема фантом фирми коишто 90, 100, 200, 300 милиони евра ќе украдат од Буџетот и од Вас граѓаните, ако добро се применува и се работи во што немам сомневање, така што за да можеме попластично сето тоа да го разбереме можноста да ни се случуваат фантом фирми коишто ќе добиваат поврат на ДДВ и преку ноќ ќе бидат отуѓувани на фантом луѓе повеќе со овој начин на функционирање ќе биде тешко или речиси невозможно“, рече тој.
Мицкоски кажа дека овој процес почнал уште во 2015 година.
„Јас имам некоја меморија дека таму некаде 2015 година се започна овој процес, за нас од нејасни причини зошто тој беше континуирано, како да кажам беше одложуван, но сфативме после некои процеси коишто овој изминат период ги откривме и отвориме зошто бил одложуван. Еве конечно денес после повеќе од 10 години добива почеток и од она што го добивме на брифингот пред оваа прес-конференција е дека првиот кик оф, значи почнувањето со софтвер компанијата за имплементација ќе почнат 1 јули“, рече Мицкоски.
Македонија
ДУИ: Нема да дозволиме Албанците да бидат третирани како граѓани од втор ред во сопствената држава

Демократската унија за интеграција го осудува најновиот пример на намерна и систематска дискриминација на Албанците во државните и јавните институции.
Само во еден случај, велат од партијата на Ахмети, во Фондот за здравствено осигурување на РСМ, биле реализирани 19 унапредувања, од кои 18 за Македонци, 1 за Турчин, а ниту едно за Албанец.
Ова, додаваат од ДУИ, е јасен показател за етничка исклученост и повреда на уставниот принцип за правична и соодветна застапеност, како и доказ за континуитетот на дискриминаторските политики што ги спроведува оваа влада.
„Оваа влада секојдневно дејствува како режим на етничка изолација, претворајќи ги јавните институции во ѕидови за Албанците. Наместо еднаквост, се спроведува исклучувачки систем кој унапредува само етнички селектирани лица, ги игнорира албанските професионалци и им ја ускратува можноста за професионален и институционален напредок. Сè започна со неуставното укинување на балансерот од страна на Уставниот суд, со цел да се создадат услови Албанците да бидат третирани како непожелни во државната и јавната администрација“.
Упатуваат апел до сите институции за транспарентност и одговорност и порачуваат дека ДУИ нема да дозволи Албанците да бидат третирани како граѓани од втор ред во сопствената држава.
Македонија
Лимани до жените -жртви на насилство: Не сте сами, има помош, има излез

Министерството за социјална политика, демографија и млади организираше настан како дел од комуникациската стратегија и кампања- „Има живот без насилство“ фокусирана на подигнување на јавната свест за родово базирано насилство врз жените.
Настанот, како и целата кампања се реализира во соработка со Канцеларијата на УНФПА во Северна Македонија и финансиска поддршка од Британската Амбасада во нашата држава.
По тој повод воведно обраќање имаше министерот за социјална политика, демографија и млади, Фатмир Лимани, заменик амбасадорот на Обединетото Кралство во Северна Македонија, Даниел Филер и шефицата на Канцеларијата на Фондот за население на Обединетите нации во Северна Македонија, Афродита Шаља.
„Денес не сме тука само за да зборуваме. Денес сме тука да кажеме – доста е! Доста е молкот да биде одговор. Доста е насилството да биде „приватна работа“. Доста е секоја петта жена да живее во страв – дома, на работа, на улица. Насилството врз жените не е нешто непознато. Не е статистика. Тоа е секојдневна реалност која разорува животи – во тишина, зад затворени врати, во домовите каде љубовта треба да биде заштита, а не закана,“ посочи министерот Лимани.
Тој во своето обраќање се осврна на многуте лица на насилството- емоционално, економско, психолошко, сексуално. Како и последиците кои насилството ги остава зад себе.
Лимани упати силни пораки до жените -жртви на насилство, до мажите- вршители на насилство, но и до институциите кои треба да превенираат, заштитат и одговорат на насилството.
„Не сте сами. Има помош. Има излез. Има живот без насилство. Имате право на достоинство, на љубов без страв, на дом без болка. Машкоста не е во удирање, во викање, во понижување. Вистинската сила е во почитта, во разбирањето, во поддршката. Затоа, ако сте сведоци, не молчете. Ако сте татковци, научете ги синовите на љубов, не на страв. Или сте дел од решението, или сте дел од проблемот. Средина нема,“ порача Лимани.
Министерот го заврши своето обраќање со апел до пошироката јавност.
„Да не молчиме! Да пријавуваме! Да им веруваме на жртвите! Да реагираме како општество што штити, не што осудува! Ако и еден живот спасиме, вреди. Ако и една жена добие втора шанса, сме успеале. Но мора да работиме не за еден – туку за сите. Да изградиме општество во кое жените ќе бидат безбедни – во својот дом, на улица, на работното место, на интернет, секаде. Да ги учиме нашите деца – дека љубов не значи контрола. Дека насилството никогаш не е оправдано. Дека тишината не е заштита – таа е дозвола за насилникот. Почнуваме денес. Почнуваме тука. Со глас што нема да замолчи, со храброст што нема да отстапи. За секоја жена. За секое девојче. За секое утре без страв. Не молчи! Не толерирај! Дејствувај! Има помош! Има надеж! Има живот без насилство!“ нагласи Лимани.