Македонија
Бојмацалиев: Со реформи и дигитална опрема успеавме да имаме повеќе пријавени давачи отколку примачи на мито

Дополнителниот заменик-министер за внатрешни работи Митко Бојмацалиев се обрати на јавна дебата на покана од националниот координатор за гранично управување, Владимир Пивоваров, на тема „Утврдување интегритет на сите службеници што работат на високоризични работни места на ГП и граничната линија со примена на полиграф како превентивна мерка за спречување можна корупција“, во организација на Националниот координативен центар со логистичка поддршка на Владата на Република Северна Македонија.
„Наша примарна должност е да ги овозможиме сите елементарни услови за работа, да воведуваме норми и стандарди за неспорно легалистичко постапување. Притоа да ги реафирмираме улогата и позицијата на полицискиот службеник како во системот на МВР така и во очите на граѓаните како вистински сервис“, истакна Бојмацалиев. Притоа тој се осврна на реформите и напредокот на МВР во борбата против корупцијата преку дигитализирани процеси на полициското работење и воведување дигитална опрема.
„Најважно беше да создадеме мотивирана и задоволна полиција, која нема да се впушта во коруптивни дејства. За таа цел, ја покачивме платата 35 %, вложивме 17 милиони евра во подобри услови во полициските станици во државата, вложивме 14 милиони евра во униформи и опрема. Секоја година усвојуваме антикорупциска програма со систем на мерки што ќе овозможат справување со корупцијата и идентификување на причините, условите и факторите што ја овозможуваат. По препораките од ГРЕКО, МВР ја измени својата норматива (Законот за внатрешните работи) преку воведување посебен тест на интегритет за сите вработени и забрана за членување во политичка партија. Покрај Одделот за внатрешна контрола, криминалистички истраги и професионали стандарди, создадовме и надворешен механизам на контрола на полицијата во рамките на Народниот правобранител, посебно одделение Полициски омбудсман. Паралелно, во Јавното обвинителство за гонење организиран криминал и корупција се формира посебно одделение, кое исклучиво ги процесира предметите кои се однесуваат на полициските службеници кои ја злоупотребилe својата позиција“, рече Бојмацалиев надополнувајќи со тоа каква дигитална опрема е ставена во функција на борбата против корупцијата.
„Тука би ги споменал и набавките на дигитални радари, на радари за ноќно снимање, кои првпат се набавија во државата, набавката на дигиталните дрегери за алкотестирање, кои се вмрежени во еден софтвер и од кој не може да ги избришат податоците. Од држава со 7 дрегери и 10 радари, денес имаме 144 дрегери и 128 радари, најсовремени во регионот. Тука се 10-те специјални возила за надзор, вредни 3 милиони евра, во регионалните центри за гранични работи во државата. Тука се и боди-камерите за граничната полиција, донација од нашите стратешки партнери САД, кои се покажаа како исклучителна алатка во овој процес на неселективност при постапувањето. Успеавме да имаме повеќе пријавени давачи отколку примачи на мито“, рече Бојмацалиев на крајот од своето обраќање упатувајќи честитки до националниот координатор за јавните дебати во насока на унапредување на граничната безбедност и уште поефикасна борба против корупцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.