„Ние не ја прифаќаме оваа пресуда и ќе се жалиме до Апелација. Видовме дека сè уште нема правда во Македонија, казната е превисока“, рече Бесарт Беља, братот на Бесир Беља, кој е осуден за убиство на 20-годишниот Никола Саздовски, по денешното изрекување на пресудата.

Бесир Беља и Скендер Демири денеска од страна на Кривичниот суд беа осудени на по 19 години казна затвор за сторено кривично дело убиство направено врз 20-годишниот Никола Саздовски, член на навивачката група „Комити“.

Беља, Демири и Јетон Љужа, кој е во бегство, на 29 јуни 2018 година, околу 17.45 часот, на булеварот Александар Македонски во населбата Автокоманда, на автобуската постојка пред фабриката „Алкалоид“, му пристапиле на Саздовски и му побарале лична карта.

Кога Саздовски го потврдил идентитетот, обвинетите заедно почнале да го удираат со боксови во главата и градите. Од силните удари Саздовски загубил рамнотежа, паднал на тротоарот по што обвинетите со силни удари со нозете продолжиле да го удираат по главата. Од ударите Саздовски добил тешки телесни повреди опасни за животот по што паднал во коматозна состојба.

Саздовски во бесвест бил пренесен на Ургентниот центар при Клиничкиот центар „Мајка Тереза“. Истиот ден бил пренесен на КАРИЛ, каде што престојувал повеќе од 10 дена. На 3 јули 2018 година му била констатирана мозочна смрт. Како резултат на добиените повреди, Саздовски починал на 9 јули 2018.