Македонија
„Бујар Османи го спинува и навредува холандскиот амбасадор“, велат ВМРО-ДПМНЕ

„Во однос на изјавата на Бујар Османи дека холандскиот амбасадор барал поддршка од ДУИ и заедно збореле за борба против корупција, а не за посочување на ДУИ како извор на не владењето на правото, е типично извртување на фактите“, велат од ВМРО-ДПМНЕ.
„Се прашуваме се почесто дали Бујар се слуша што кажува или онака испушта неволно зборови од устата па затоа се што кажува звучи вака. Некогаш неговите изјави се како оние на Сфингите кога треба да се замисли и одгатне човек што сакал да каже, но дури и тогаш несомнено секој е свесен дека човекот тресе глупости и не знае што кажува. Вакви бесмислици ретко кој може да каже и наместо да премолчи како што вообичаено е пракса со сите корисни статуи, тие зборуват, едноставно не може да се собере, да се исконтролира и зборовите непречено и сосема слободно во необичен редослед излетуваат од него. Но шалата на страна. Нека стават прст на чело и нека пробаат да сфатат дека тие се извор на корупцијата во државата, дека 22 години се на власт од 2002-та година, и поради тоа што е доктор да му кажеме со докторски речник, тие се метастаза од корупција во државата на сите нивоа на институциите и дека се срам за сите чесни Албанци во оваа држава кои сакаат подобар живот.
И место да се тетерави вака и да се врти во круг не знаејќи како да спинува јасна изјава на странски претставник кој јасно и недвосмислено му кажува дека ДУИ е проблем на државата и е извор на корупција и влијание во правосудството, тој ја навредува интелигенцијата на секој нормален човек во државата, но и на меѓународните претставници конструирајќи вака бесмислени реченици. И не е трагично да зборувате за корупција туку најтрагично е што ја создавате и ширите и што ништо не преземате против тоа“, се додава во соопштението на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.