Македонија
„Вардариште“ е обезбедено, останува „Дрисла“, проблемот ќе биде саниран за една недела, вели Мицкоски
Претседателот на ВМРО-ДПМНЕ, Христијан Мицкоски, во изјавата за промоција на изборната коалиција за претстојните локални избори на новинарско прашање во однос на депониите „Вардариште“ и „Дрисла“ посочи дека се работи за подметнати пожари за кои веќе има приведени и осомничени лица истакнувајќи дека е обезбедена градежна механизација, која од денес таму ќе биде во функција.
„Апсолутно, како Влада и како институции ги преземаме сите мерки, да немате дилема, за ‘Вардариште’ знаете дека имаме веќе приведени и осомничени лица, кои ја користеле илегалната депонија ‘Вардариште’, која постои повеќе, би рекол, неколку децении, која е со габарит поголем од 20 хектари, за да произведуваат метали, што потоа нелегално ги продаваат, тие лица се откриени, тие лица се приведени, од вчера има приватна агенција за обезбедување, здружено ангажирана од неколку општини. Истовремено, како Влада и како институции, преку општествено одговорни компании обезбедивме градежна механизација, која веќе денеска ќе биде во полн состав таму. ‘Вардариште’, би рекол, е обезбедено, останува ‘Дрисла’“, вели Мицкоски.
Мицкоски рече дека проблемот со „Дрисла“ ќе биде саниран за една недела, а воедно и дека Министерството за внатрешни работи ќе ги разгледува причините за повторното распламтување на пожарот по неговата санација.
„’Дрисла’ во текот на вчерашниот ден, би рекол, е речиси санирана, но од некои чудни причини при крајот на ноќта повторно се распламти и за тоа денеска ќе се занимава Министерството за внатрешни работи. Имав разговор и со министерот, на линија сме со директорот на Дирекцијата за заштита и спасување, со овие општествено одговорни компании очекувам денес, утре, тој проблем да биде саниран. Она што со децении не е санирано, она за што со децении никој не водел сметка, еве за неколку дена, би рекол, за една недела ќе успееме да го санираме, јас сочувствувам апсолутно со секој оној граѓанин што го чувствува сето ова“, укажа Мицкоски.
Тој наведе дека е чудно како може пожар, кој е смирен и ставен под целосна контрола, повторно да се активира потенцирајќи дека сите виновници ќе бидат изведени пред лицето на правдата.
„Но, чудно е како во одредени јавни претпријатија, каде што свои кадри има ДУИ, се случуваат вакви работи, чудно е и тоа ќе го истражиме и ќе обезбедиме соодветни докази како може пожар што беше речиси смирен, односно ставен под контрола, наеднаш да се распламти и како токму сега откога успешно се справивме со пожарите. Во околните држави имаше жртви, повредени, иселени градови и така натаму, а кај нас сето тоа беше цело лето успешно завршено и покрај диверзиите што ги имавме на почетокот на летото, наеднаш сега да се случува ова пред локалните избори. Вистинското прашање и вистинскиот одговор на ова прашање – кому сето ова му одговара. Но, ние нема да се занимаваме сега со тоа. Сега работиме да го решиме проблемот, потоа ќе се занимаваме. И да знаете дека сите виновници ќе бидат изведени пред лицето на правдата “, рече Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре ведро и студено претпладне, преку денот сончево
Времето утре, наутро ќе биде ведро и студено, а во текот на денот сончево со мала до умерена локална облачност. Ќе дува слаб ветер од северозападен правец. Минималната температура ќе биде во интервал од -3 до 5, а максималната ќе достигне од 14 до 20 степени.
Во Скопје ќе биде сончево со мала до умерена облачност и со слаб северен ветер. Минималната температура ќе се спушти до 2, а максималната ќе достигне до 16 степени.
Во наредните денови Сседува период на стабилно и суво време со постудени утра и со услови за утринска магла по одделни котлини. Во текот на денот ќе преовладува сончево време со мала до умерена облачност. Дневните температури ќе бидат без значителна промена.
Македонија
Дел од корисниците на Центар утре без вода
Дел од корисниците на Центар, поради дефект, утре ќе останат без вода.
„Од ЈП Водовод и Канализација добивме известување дека на ден 13.11.2025 година, четврток, поради уличен дефект на ул. 8 -ма Ударна Бригада 39, прекинато водоснабдување ќе имаат корисниците на дел од истата улица,вклучително и објектот на Амбасадата на Италија. Водоснабдувањето ќе биде прекинато од 08:30 часот до завршување со санација на дефектот.(општина Центар)“, информира РЦУК.
Македонија
Гаши на средба со постојаната координаторка на ОН, Рита Колумбија
Претседателот на Собранието, Африм Гаши, денеска оствари средба со постојаната координаторка на Обединетите нации во земјава, Рита Колумбија.
На средбата се разговараше за тековната и идната соработка меѓу Собранието и Канцеларијата на ОН во Северна Македонија, со акцент на улогата на законодавниот дом во процесите поврзани со одржливиот развој, човековите права и доброто владеење.
Претседателот Гаши изрази задоволство од реализирањето на средбата и ја истакна досегашната плодна соработка со Канцеларијата на постојаната координаторка, која, како што нагласи, значително придонесува за унапредување на транспарентноста и отчетноста на институциите.
Постојаната координаторка Колумбија ја поздрави иницијативата и ја потенцираше поддршката на системот на Обединетите нации за активностите на Собранието поврзани со спроведувањето на договорите и проектите што се реализираат во партнерство со агенциите на ОН. Таа нагласи дека во иднина акцентот ќе биде ставен на заедничките напори за унапредување на образованието, создавање подобри услови за лицата со попреченост, промовирање на родовата еднаквост и понатамошно јакнење на улогата на жените во општеството и во парламентот.
На крајот од средбата, претседателот Гаши изрази благодарност до системот на Обединетите нации во Република Северна Македонија за нивните активности и поддршка во областите на доброто владеење, социјалната инклузија, заштитата на животната средина, климатските промени, вработувањето и рамномерниот регионален развој, како и за досегашната конструктивна соработка со Собранието и неговите работни тела.

