Македонија
Василевска: Јавноста е најисправниот суд, кој ќе донесе одлука дали расправата за интерпелациите за судиите од Судскиот совет е издржана

Почитувана македонска јавност, вие сте најисправниот суд кој ќе донесете одлука дали денеска ова што го правиме во македонското Собрание е издржано, дали е во интерес на сите македонски граѓани, дали е во интерес на иднината на Македонија или само е еднодневна политичка фарса, рече пратеничката од ВМРО-ДПМНЕ, Иванка Василевска, на денешната собраниска седница, на која се дискутира за интерпелациите на членовите на Судскиот совет, обраќајќи се до македонската јавност.
Бидејќи, додаде Василевска, ако погледнете од мојата лева страна, ќе ја видите заинтересираноста на нашите колеги од опозицијата, но и нивната загриженост во однос на нивните штитеници во правосудниот систем.
„Но, дека денеска денот е посветен на нешто многу посериозно, би рекла, денеска, конечно, се отвора Пандорината кутија за една метастаза, која е длабоко вкоренета во севкупниот општествено-политички систем и влијае на животите и на текот на живеењето на многу невини македонски граѓани, кои се под влијание на секакви заткулисни договори, коруптивни решенија на поединци, секако во правосудниот систем. Јас исто не сметам дека сите треба да ги ставиме на едно купче, но оние моќниците со дебел врат знаат како да допрат и да ве убедат дека треба така да се донесе одлуката. Бидејќи ова не е правосуден систем, почитувани, ова е едноставно еден обичен трансакциски систем, во кој одредени корумпирани политички елити, моќници од бизнис-фелата, имаат задача да нѐ држат длабоко закопани во калта, безредието, неверието“, рече Василевска.
Таа посочи дека сите овие од нас, едноставно, сакаат да предизвикаат да останеме само обични поданици во еден систем во кој ќе глумиме граѓани, ќе плаќаме даноци, ќе се обидуваме да бидеме правични, ќе се обидуваме да се надградуваме, но тука овие големци си имаат друга математика.
„И, верувајте, тие одлучуваат кој ќе живее, а кој ќе биде маргинализиран. Бидејќи нивните интереси треба да бидат задоволени, а не оние на македонскиот граѓанин“, посочи пратеничката Василевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Република Македонија во Рим го одбележува денот на Свети Кирил и Методиј

Министерот за култура и туризам, Зоран Љутков, денеска и утре престојува во Рим, Италија, како член на државно-црковната делегација предводена од претседателката на Република Македонија, Гордана Сиљановска-Давкова, по повод чествувањето на денот на светите браќа Кирил и Методиј.
Делегацијата денеска присуствуваше на молебенот во базиликата „Сан Клементе“ во Рим, со кој чиноначалствуваа владиците Јосиф и Јаков, заедно со претставници од Македонската православна црква – Охридска архиепископија.
Во рамките на културната програма, организирана по повод манифестацијата „Македонија во чест на Свети Кирил“, министерот Љутков утре (24 мај) ќе присуствува и ќе има обраќање на концертот на маестро Симон Трпчески и квинтетот „Македонисимо“, што ќе се одржи во историскиот простор „Хорти Салустијани“ („Horti Sallustiani“) во вечниот Рим. Ќе бидат изведени дела од Едвард Григ, Петар Илич Чајковски и македонскиот композитор Панде Шахов.
Претходно, според предвидената агенда, државно-црковната делегација утре ќе го посети гробот на папата Франциск, а ќе положи и свежо цвеќе пред спомен-плочата на македонски јазик во чест на Свети Кирил во базиликата „Санта Марија Маџоре“.
Поклонението на гробот на Свети Кирил во базиликата „Сан Клементе“ во Рим е востановено во 1969 година, по повод 1100-годишнината од неговата смрт, и оттогаш се одбележува секоја година на 24 мај, со највисоки почести од државно-црковната делегација.
Македонија
Временска прогноза за викендов: дожд, грмежи, засилен ветер и пониски температури

Времето утре ќе биде променливо облачно и нестабилно со повремени врнежи од дожд, проследени со грмежи и засилен ветер. Пообилни врнежи ќе има кон крајот на денот и во текот на ноќта, особено во источните и јужните делови.
Минималната температура ќе биде во интервал од 8 до 15, а максималната ќе достигне од 18 до 25 степени.
Во Скопје утре ќе биде променливо облачно и нестабилно со повремен дожд, повремено пороен проследен со појава на грмежи и засилен северен ветер. Во делови од котлината ќе има услови за краткотрајно невреме. Минималната температура ќе се спушти до 13, а максималната ќе достигне до 21 степен.
Во недела времето ќе биде променливо облачно и посвежо со повремени врнежи од дожд, проследени со ретки грмежи. Врнежите ќе бидат пообилни во источните делови (над 30л/м2). Повремен локален дожд ќе има и во понеделник претпладне. До среда ќе дува засилен северен ветер.
Македонија
Силно одбранбено партнерство и целосна усогласеност со заедничката надворешна и безбедносна политика, Мисајловски и Калас ги посетија Балканските медицински наменски сили

Министерот Владо Мисајловски и високата претставничка на Европската Унија за надворешни работи и безбедносна политика, Каја Калас денеска (23 мај) ги посетија Балканските медицински наменски сили (Balkan Medical Task Force) каде извршија увид во опремата со која Европската Унија го поддржа развојот на оваа регионална организација.
Министерот Мисајловски истакна дека поддршка од Европската Унија, но и од сојузниците во градење на македонските одбранбени капацитети се должи на искрената посветеност, подготвеност и професионалност во зачувувањето на мирот, стабилноста и безбедноста на регионот и пошироко.
„Европската Унија ја препозна нашата искрена заложба за зајакнување на безбедноста вклучувајќи го и придонесот во мировните мисии и операции и одговори позитивно на барањата за зајакнување на македонската Армија со помош во опрема во висина од 40 милиони евра“, рече министерот.
Тој додаде дека европската помош се однесува на „ опрема за потребите на инженерија, за воено медицинскиот центар, за Лесната пешадиска баталјонска група, за логистиката, технологии поврзани со разузнавање, набљудување и извидување, електронско војување, комуникациско – информациски системи, системи за команда и контрола, заштитна опрема“ и посочи дека со оваа помош е опфатена и обука на персонал.
Високата претставничка на ЕУ за надворешни работи и безбедносна политика, Калас за Балканските медицински наменски сили рече дека се силен пример за регионална соработка што дава резултати.
„Европската Унија ја поддржува оваа иницијатива и политички и финансиски, бидејќи таа точно го одразува она за што се залагаме во Западен Балкан: доверба, партнерство и постигнување видливи резултати за луѓето. Оваа иницијатива е уште поважна бидејќи се однесува на спасување животи“, рече Калас.
Калас посочи дека Северна Македонија е доверлив партнер, целосно усогласен со Заедничката надворешна и безбедносна политика на ЕУ, придонесувајќи во операциите на ЕУ, особено во ЕУФОР АЛТЕА во Босна и Херцеговина и истакна дека јасноста и конзистентноста во геостратешката ориентација на нашата држава „се клуч што би можел да отклучи подлабока одбранбена соработка со ЕУ“.
Балканските медицински наменски сили се меѓународна организација со седиште во Скопје, формирана со цел да обезбеди брз и координиран одговор при катастрофи предизвикани од природни непогоди или човечки фактори. Земји членки на БМНС се Северна Македонија, Албанија, Босна и Херцеговина, Србија, Словенија и Црна Гора.