На армискиот полигон „Криволак“ припадниците на декларираната чета на Воената полиција на АРМ, во склоп на програмата за денот на високи гости на вежбата „Македонски блесок 14“, го демонстрираа нивото на борбена подготвеност, со што завршија активностите за оценувањето на оваа декларирана единица на АРМ во согласност со концептот за оперативни способности според стандардите на НАТО – ниво 2.

Пред министерката за одбрана, Радмила Шекеринска, началникот на ГШ на АРМ, генерал-мајор Васко Ѓурчиновски, генерали на АРМ, претставници на асоцијацијата на воените аташеи акредитирани во РМ и други високи гости, се претставија борбени постапки и ситуации кои беа дел од содржините за оценување на вежбата „Македонски блесок 14“, кои се базираат на фиктивно сценарио при учество во операција за одржување на мирот.

По завршување на вежбовните активности, министерката Шекеринска, по искажаните честитки на учесниците во вежбата за прикажаното, изјави дека припадниците на АРМ при вакви настани се прикажуваат во најдобро светло, што е доволен аргумент да се бараат и да се обезбедуваат подобри услови за АРМ.

Претходно, од страна на командантот на ЗОК, генерал-мајор Павле Арсоски, пред присутните посетители беше истакнато дека на вежбата „Македонски блесок 14“ е постигната главната цел со успешното оценување на дел од декларираните единици на АРМ.

Исто така, и директорот на вежбата „Македонски блесок 14“, потполковник Игор Манасовски, нагласи дека оваа вежба претставува потполна демонстрација на борбената готовност на декларираната чета на Воената полиција, како и нејзините капацитети за рамноправно учество во операции за поддршка на мирот предводени од НАТО.

Како што информираат од Министерството за одбрана, оценувањето на декларираната чета на Воената полиција и Копнената маневарска болница со улога 2, се реализирало во согласност со концептот за оперативни способности на НАТО – ниво 2, а го спровеле национални оценувачки тимови поддржани од оценувачи од Босна и Херцеговина и Србија, додека валоризација на процесот на НАТО-оценувањето ниво-2 извршил тимот на монитори од Здружената команда за операции на НАТО од Неапол, оценувачки тим на АРМ, заедно со набљудувачи од разни команди на НАТО.

Во текот на вчерашниот ден на командирите на оценуваните единици им била соопштена првичната оценка од спроведеното оценување во согласност со концептот за оперативни способности на НАТО, која е во согласност со прикажаната обученост на припадниците на единиците.

Во текот на активностите на „Македонски блесок 14“ се изврши и внатрешно медицинско оценување на декларираниот состав на Копнената маневарска болница со улога 2 во согласност со концептот за оперативни способности на НАТО, информираат од Министерството.