Првиот вицепремиер и министер за животна средина и просторно планирање, Изет Меџити, денеска ја почна официјалната посета на Република Турција со средба со министерот за животна средина, урбанизација и климатски промени, Мурат Курум.

Меџити разговараше за можностите за продлабочување на соработката во однос на справувањето со еколошките предизвици и искористување на турскиот модел на борба против аерозагадувањето, кој се покажа како многу успешен.

Меџити и Курум се договорија преку потпишување на меѓудржавен меморандум за соработка, двете земји да разменат искуства и тесно да соработуваат во одржливото управување со индустрискиот отпад, рударскиот отпад, опасниот отпад и медицинскиот отпад. Исто така, дел од оваа соработка ќе биде управувањето со домашните и индустриските отпадни води, вклучувајќи технологии за третман и рециклирање на отпадни води, системи за онлајн мониторинг на капацитетите за третман на отпадни води, управување со квалитетот на воздухот, имплементација на најдобри техники и практики за спречување на загадувањето од индустријата, борба против климатските промени, енергетска ефикасност и обновливи извори на енергија, како и многу области од заеднички интерес.

Двете страни се согласија да соработуваат во блиска иднина во поглед на управување со хемикалии, откривање, анализа и чистење на подрачја контаминирани со опасни материи и хемикалии, во смисла на развој на географски информациски системи за животната средина и релевантно законодавство, заштита на природата и биолошката разновидност во заштитените подрачја, како и планирање, управување и промовирање на заштитените подрачја за спроведување на еко-туристички активности.

За да се постигнат посакуваните ефекти, двајцата министри за животна средина Меџити и Курум се договорија да воспостават програми за научни посети на истражувачи, консултанти, експерти и членови на невладини организации и размена на информации и документи на научно и техничко ниво во однос на истражувачките, развојните и апликативните активности.Развојот на проекти за соработка ќе се реализира преку соработка во рамките на меѓународните договори чии страни се Република Турција и Република Северна Македонија, во рамките на финансиските средства наменети за оваа област.

Првиот вицепремиер и министер за животна средина и просторно планирање Изет Меџити за време на престојот во Турција ќе се сретне и со министерот за надворешни работи на Република Турција Хакан Фидан, а заедно со премиерот Христијан Мицковски ќе бидат дел од државна вечера приредена од страна на претседателот на Република Турција, Реџеп Таип Ердоган.

Одредени структури кои со децении се вгнезндени во Судскиот совет и Обвинителството даваат силен отпор. Но во една редовна законска процедура во Собраните ќе бидат разрешени. Граѓаните очекуваат ред и правда и тие што згрешиле ќе одговараат, одговори на новинарско прашање, вицепремиерот Александар Николоски.

Како што истакна тоа е процес кој што граѓаните имаат најголеми очекувања, но за жал се одвива со динамика спротивна на очекувањата на граѓаните од причина како што наведе вицепремиерот Николоски, структурите во овие институции се вгнездени преку три децении и даваат силен отпор.

„Граѓаните очекуваат ред и правда, но за жал ниту Обинителството ниту судството тоа го испорачуваат. Тоа не значи дека сите таму што работат се неспособни или корумпирани, но една мала клика која што е добро поврзана меѓу себе и која политчки има бизнис мотиви го руши целокупниот систем и затоа сакаме да воведеме ред. Првиот чекор беше интерпелациите на членовите на Републичкиот судски совет. И јас очекував дека дента кога ги поднесоа интерпелациите ќе поднесат оставка од причина што мнозинството кои ги избрало веќе не постои и не само што не постои доживеа и катастрофален пораз на парламентарните избори што значи дека народната волја е јасно. Но наместо тоа, тие решија да се спротиставуваат, ќе поминеме низ процедура на разрешување во Собранието и ќе бидет разрешени. Слично е и со Обвинителството. И таму се дава отпор, но тоа е прашање на месец или два. Правдата ќе ги стигне сите тие што згрешиле. Јас можам да кажам само за ресорот што го водам, преку 29 кривични пријави и иницијативи имам поднесено до соодветните институции до сега не е реализирана ниту една што најмногу кажува како и што работат. Слушаме ммогу ветување но малку реализација”- изјави вицепремиерот Александар Николоски.

Министерот за економија и труд Бесар Дурмиши ја поддржа и ја охрабри Комисијата за заштита на конкуренцијата, која поведе прекршочна постапка против четири големи синџир-маркети и против Сојузот на стопанските комори за договарање цени.

„Неколку синџир-маркети меѓусебно нелегално договарале цени и биле фатени од Комисијата за заштита на конкуренцијата. Комисијата спроведе ненајавен увид во четири големи трговски синџири и во една стопанска комора поради сомневање за нарушување на пазарната конкуренција. Увидот бил извршен врз основа на индиции дека овие субјекти го прекршиле членот 7 од Законот за заштита на конкуренцијата, кој забранува картели и усогласување, дејствување меѓу претпријатијата, со цел ограничување на конкуренцијата. Контролираните субјекти постапиле спротивно на законот и нормално дека Комисијата за заштита на конкуренцијата поведе прекршочна постапка и најави дека во наредниот период ќе преземе најригорозни мерки. Ја поддржувам оваа иницијатива и ја охрабрувам Комисијата да продолжи и понатаму да врши контроли на теренот во сите други синџир-маркети“, рече денес министерот Дурмиши.

Комисијата за заштита на конкуренцијата утврди дека четири големи синџир-маркети и Сојузот на стопанските комори на состанок на почетокот на февруари незаконски утврдиле дека нема да примаат нови ценовници од доставувачите до крајот на март.