Македонија
(Видео) Велјановски: Со насилство и талатизација во Советот на Општина Карпош, со Левицата како главен играч, се донесе буџетот на Општината, среќна Нова 1949
Денес сме сведоци на насилство и талатизација на Советот на Општина Карпош. Имено, насила, надвор од секоја демократска процедура, со кршење на сите законски акти и подакти, со кршење на Деловникот, Статутот на Општина Карпош и Законот за локалната самоуправа, со 15 гласа ЗА беше усвоен буџетот на Општина Карпош за 2024 година, истакна Роберт Велјановски, советник од ВМРО-ДПМНЕ во Советот на Општина Карпош.
„На наше големо жалење градоначалникот на општина Карпош, Стевче Јакимовски, со помош на советниците од Гром, СДС и епските јунаци од политичкиот исцедок на СДС, Левицата, спроведе целосна и комплетна талатизација на Советот на Општина Карпош.
Пулените на шарениот револуционер Димитар Апасиев режираа класична трагикомедија во Советот на Општина Карпош со непојавување на претседателот на Советот на четвртото продолжение на 37. седница на Советот“, вели тој.
„Борецот, левичарот и надобудниот Талат, како што ги нарекува, за да му остави простор на Јакимовски насилно да го протнат буџетот, Бранко Ристов, ненадејно добил напади на дијареја и влошување на општата здравствена состојба.
На седницата, полна со деловнички и законски недоследности, какви што до сега никогаш не се случиле во Советот на Општина Карпош, со флагрантно кршење на Деловникот на Советот на Општина Карпош беа погазени легални поднесени амандмани, поднесени од легитимно избрани народни претставници – советниците на ВМРО-ДПМНЕ и коалицијата ‘За обнова на Македонија’“, додава Велјановски.
Според него, можеби советниците на Левицата и нивниот претседател на Советот „се надеваат или договориле определена награда од дилот меѓу ‘Пуцко’, Стевчо Јакимовски и СДС“.
Истакнува дека треба да знаат оти:
„На спроведеното насилство ВМРО-ДПМНЕ ќе одговори со легални мерки и инструменти за да ги спречиме во криминалните дилови за бетонизација на Карпош.
Разголени и препознаени сте од граѓаните на Карпош, вашите фолирантски трикови ќе бидат казнети на изборите во мај, а потоа и на локалните избори.
За ова денес ќе одговарате пред законот и институциите.
Борбата со коалицијата на градежната мафија, СДС, Јакимовски и Левицата, продолжува“, истакнува Велјановски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла
Македонија
Божиновска и Јоксимовиќ: Забрзана изградба на гасниот интерконектор Македонија–Србија, се редефинира енергетската карта на регионот
Во рамки на 14. Меѓународен форум за енергија и одржлив развој (IFESD-14), што се одржува во Скопје, министерката за енергетика, рударство и минерални суровини, Сања Божиновска, оствари работна средба со Јована Јоксимовиќ, помошничка министерка за рударство и енергетика на Република Србија, задолжена за меѓународна соработка и европска интеграција.
Во фокусот на разговорите беше изградбата на гасниот интерконектор меѓу Македонија и Србија, проект од стратешко значење за енергетската безбедност и диверзификација на снабдувањето со гас во регионот.
Двете соговорнички се согласија дека проектот треба да се реализира во забрзана динамика, со цел да се овозможи поврзување на гасните системи на двете земји и пристап до нови извори на гас.
На маргините на форумот dополнително, во Министерството за енергетика на Македонија се одржа работен состанок на кој се дискутираше координацијата на институциите и операторите во двете земји за реализација на проектот. Ба разгледани процедурите и техничките чекори за понатамошно убрзување на активностите.
„Гасниот интерконектор со Србија е еден од најважните регионални инфраструктурни проекти што ќе овозможи вистинска енергетска стабилност и сигурност. Овој проект не е важен само за Македонија и Србија – тој е значаен и за цела Европа. Со оваа нова енергетска врска, двете земји добиваат пристап до алтернативни извори и рути, а Европа добива посилен и подобро поврзан Балкан. Ова е чекор што ја позиционира нашата земја како активен и одговорен партнер во новата енергетска карта на Европа. Нашата заедничка цел е овој проект да се реализира во најкраток можен рок – затоа што секој ден е важен за нашата енергетска иднина. Со заеднички напори ќе го реализираме овој проект, во тесна координација и постојана комуникација со нашите партнери од Србија “ изјави Божиновска.
„Гасниот интерконектор со Македонија е проект кој има значење подалеку од нашите граници. Тој е дел од визијата за регион кој е енергетски поврзан, сигурен и усогласен со европските цели. Србија и Македонија заедно покажуваат дека со партнерство и заедничка стратегија можеме да обезбедиме стабилна и предвидлива енергетска иднина. Соработката меѓу нашите две земји во областа на енергетиката е пример како регионалното партнерство може да донесе конкретни резултати. Соработката со колешката Божиновска и со македонскиот тим е интензивна и исклучително конструктивна. Уверена сум дека со заедничка координација и поддршка на нашите оператори ‘Србијагас’ и ‘Номагас’, ќе создадеме нова енергетска оска на стабилност меѓу двете земји. Имаме јасна динамика, завршени студии и поддршка од европските институции. Следниот чекор е координирана акција за изградба. Заеднички ќе работиме на тоа интерконекторот да стане реалност во најскоро време,“ истакна Јована Јоксимовиќ, помошничка министерка за меѓународна соработка и европска интеграција во Министерството за рударство и енергетика на Србија.
Македонија
Утре без вода делови од Карпош
Од ЈП Водовод и Канализација известуваат дека утре ( Четврток )поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхолмска.
Водоснабдувањето ќе биде прекинато од 09:00 часот до завршување со работните активности. (општина Карпош).

