Македонија
Верушевски ја тужи државата

Ексразузнавачот и советник за безбедност на премиерот Зоран Заев, Зоран Верушевски, ја тужи државата за двата неосновани притвора со кои беше во затвор 11 месеца во 2015 година за случајот „Пуч“ и обвинението за неовластено поседување оружје. Отштетното побарување на Верушевски е 4 милиони и 104 илјади денари или приближно 71 илјада евра.
„Мотивот на оваа правна иницијатива е да се заокружи личната семејна голгота што ми ја наметна државата со конструкција без преседан во историјата на државата. Бев неосновано обвинет за најтешки дела од велепредавство и шпионажа до монструозно обвинение поврзано со педофилија и лична дискредитација“, рече вознемирен Верушевски пред судијката Јехона Садику.
Тој рече дека сите оние што му го скроиле ова се надвор од лицето на правдата алудирајќи на Обвинителството и полицијата.
„Ниту бегството на поранешниот премиер не беше доволно, сите инволвирани во вакви злоупотреби да бидат изведени пред лицето на правдата“, рече поранешниот разузнавач и дополни дека сака да верува оти ваквите злоупотреби ќе бидат последни.
„Не беше лесно тие денови да се биде пријател на Верушевски. Тортурата на медиумите го докусуруваше секој член на семејството. Медиумите што ја бранеа власта беа немилосрдни“, рече Верушевски, кој во тоа време бил декан на Факултетот за безбедност при Универзитетот ФОН.
Верушевски рече дека независно дали тогашните провладини новинари, како што рече, го промениле рувото, тие засекогаш ќе останат на столбот на срамот.
Верушевски, како што рече неговата адвокатка пред судот, доживеал душевна болка поради неоснованото апсење и држењето во притвор 344 дена за што беше доставен психијатриски наод.
Претставникот од правобранителството рече дека не се противи на барањето на тужителот, туку само на износот.
Изрекувањето на пресудата е закажно на 4 ноември.
Обвинителството за гонење организиран криминал и корупција го товареше ексразузнавачот за неовластено прислушување и тонско снимање, шпионажа и насилство спрема претставници од највисоки државни органи. Верушевски беше во притвор од јануари до крајот на декември 2015 година. СЈО го повлече обвинението за случајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Дел од населбата Драчево денеска без струја

Регионалниот центар за управување со кризи на Град Скопје, по добиеното известување од ЕВН Македонија АД, информира дека поради технички зафати во електродистрибутивната мрежа денеска, без електрична енергија ќе остане дел од населбата Драчево.
Од 08:30 до 12:00 часот, корисниците од дел од улицата Маркова Река во населба Драчево, општина Кисела Вода, ќе останат без струја.
Македонија
Сончево и ветровито време, температури до 38 степени

Времето денеска ќе биде сончево со мала до умерена локална облачност. Ќе дува слаб до умерен, по должината на Повардарието повремено засилен ветер од северен правец, информира УХРМ.
Минималната температура ќе биде во интервал од 11 до 22, а максималната ќе достигне од 31 до 38 степени.
Во Скопје сончево со мала до умерена облачност. Ќе дува слаб до умерен, повремено засилен ветер од северен правец.
Минималната температура ќе се спушти до 20, а максималната ќе достигне до 38 степени.
Во следните денови следува период на сончево и топло време со мала до умерена облачност.
Температурите ќе бидат во постепен пораст, особено од четврток и за време на викендот кога дневната температура насекаде ќе биде над 30°C, а наместа ќе достигне до 40°C.