Македонија
„Ветувања пусти ветувања“ – активистите бесни на долгогодишните најави за изградба на клинички центар во Штип

Во текот на денешниот ден од група активисти беше спроведена активистичката акција „Ветувања пусти ветувања“. Акцијата е посветена на многуте ветувања дадени поради изградбата на клиничкиот центар Штип.
Оваа акција е продолжение на акцијата „Лопатите протестираат“, која беше спроведена исто така поради доцнењето во изградбата на клиничкиот центар.
„Во пресрет на десетгодишнината од почнувањето на проектот сакаме да ги потсетиме надлежните институции и Владата дека секое ново ветување и одложување на изградбата ги скратува 500 илјади граѓани од источниот регион на правото на квалитетна здравствена заштита, а воедно и на вработените им скратува квалитетни и модерни услови за работа, кои се еден од проблемите поради кој штипскиот клинички центар го напуштија над 70 здравствени работници“, велат активистите.
Акцијата е поставена на оградата на клиничкиот центар, кој, како што посочуваат, во моментот служи само како галерија и е во форма на изложба со шест слики, на кои се отпечатени ветувањата на разни политичари во минатите 10 години.
„Ние како активисти сакаме да прашаме дали последните изјави за медиумите на политичарите се уште едно празно ветување? И до кога истокот ќе чека нов клинички центар? Дали треба да поминат уште десет години и си заминат сите здравствени работници за да сфатиме дека на Источниот Регион му е потребен нов клинички центар? До кога ветувања, пусти ветувања???“, прашуваат активистите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Борче Стамов и д-р Ирфан Ахмети ќе ја примат државната награда „Мајка Тереза“

Борче Стамов од „Донирај компјутери“ и доц. д-р Ирфан Ахмети од Универзитетската клиника за ендокринологија, денеска во Собранието ќе ја примат државната награда „Мајка Тереза“.
„На 26 август 2025 година (вторник), во Кристалната сала на Собранието на Република Северна Македонија, во 11:00 часот, Одборот за доделување на државната награда „Мајка Тереза“ ќе ја додели државната награда „Мајка Тереза“ за 2025 година за особено значајни остварувања од интерес на државата во областа на хуманоста и човечката солидарност и за потикнување, унапредување на меѓусебното разбирање и развој на соработката, како меѓу народите, така и меѓу припадниците на различните заедници, култури и вери“, соопштија од Собранието.
Македонија
Без струја делови од Центар и Карпош

Без струја денеска ќе останат делови од Центар и Карпош, извести Регионалниот центар за управување со кризи на Град Скопје.
Поради технички зафати во електродистрибутивната мрежа на ден 26.08.2025 година (вторник), без електрична енергија ќе останат:
· од 08:00 до 15:00 часот, корисниците на бул. Партизански Одреди бр. 15, односно стамбените објекти околу објектот – Луна Бизнис Центар. (Општина Центар )
· од 11.00 до 15.00 часот, корисниците од дел од ул. Козле крак -22. (Општина Карпош)
Македонија
Патот Македонски Брод – Скопје сѐ уште е затворен за сообраќај

Поради пожар во националниот Парк Јасен, регионалниот пат Р1106 Македонски Брод – Скопје сѐ уште е затворен за секаков вид на возила, информира АМСМ.
Сообраќајот на останатите државни патишта се одвива непречено, по суви коловози.
Интензитетот на сообраќај на патните правци надвор од градските средини поради летните одмори е зголемен меѓутоа на граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.