Град Скопје и скопското јавно претпријатие Водовод и канализација информираат дека континуирано реализираат проекти за подобрување на водоснабдувањето во градот, решавање на повеќедецениските проблеми со честите прекини поради застареноста на системот, намалување на загубите на вода и трошоците за поправките на дефектите на водоводната мрежа.

„Продолжуваат градежните работи за реконструкција на водоводната мрежа на улицата Лисец во Аеродром, со која се врши двојно зголемување на досега незадоволителниот профил на водоводните цевки, со цел обезбедување на квалитетно и континуирано водоснабдување за жителите во тој дел од општината. Со реализација на овој проект за обнова на водоводната мрежа, се решава уште еден долгогодишен проблем каде досега поради дотрајаност и несоодветност, имаше појава на дефекти на старата водоводна мрежа и чести прекини во водоснабдувањето. Изведбата на оваа реконструкција претставува реализација на уште еден од проектите од програмата За модерно Скопје, за обновување и подобрување на градската водоводна мрежа“, велат од Град Скопје.

Претседателката Гордана Сиљановска Давкова, на покана на претседателката на Швајцарската Конфедерација, Виола Амхерд, денеска и утре во Бургеншток на езерото Луцерн во Швајцарија ќе учествува на Самитот за мир во Украина.

Предвидено е претседателката Сиљановска Давкова да има обраќање на самитот и да оствари билатерални средби со дел од учесниците на самитот, информира претседателскиот Кабинет.

Собирот има за цел да воспостави форум за дијалог на високо ниво за начините за постигнување сеопфатен, праведен и траен мир за Украина во согласност со меѓународното право и Повелбата на ОН, да промовира заедничко разбирање за можна рамка за постигнување на оваа цел и да дефинира патоказ за тоа како да се вклучат двете страни во иден мировен процес.

На конференцијата, што се одржува на иницијатива на Украина, ќе учествуваат високи претставници на околу сто земји и на меѓународни организации. Ќе се разговара за различни прашања, меѓу кои за извозот на жито од Украина, безбедноста на нуклеарната централа Запорожје, што е под руска контрола, како и хуманитарни прашања како што е размената на воени заробеници.

Бесплатни дерматолошки прегледи на бенки и промени на кожата ќе бидат овозможени денеска и утре од 17 до 21 часот во Градски парк во Скопје, во организација на ДМ маркетите, а идниот викенд вакви прегледи ќе бидат достапни и  во Охрид.

Бесплатните прегледи ДМ ги организира втора година, а првиот термин годинава се одржа на 9 јуни во Парк-шумата Гази Баба кога, како што информираат, бил голем одѕивот од граѓани што дошле на проверка кај тим од стручни дерматолози.

Со дерматоскоп се прегледуваат бенките и другите неправилности на кожата за да се утврди општата состојба и типот на кожата, да се забележат пигментни промени или настанување на нови бенки кои може да бидат условени од штетното дејство за сончевите зраци.

„Втора година по ред, ДМ ги повикува сите заинтересирани граѓани на бесплатни дерматолошки прегледи. Иако летото е едно од нашите омилени годишни времиња, поради високите температури и штетните сончеви зраци, тоа со себе носи различни предизвици. Притоа, посебно е важно да обрнеме внимание на тоа како правилно да се заштитиме од УВА и УВБ зрачењето кое може да предизвика промени на кожата, па и оние кои се малигни, неретко фатални“, наведува организаторот на настанот.

Оттаму го пренесуваат апелот на дерматолозите кои алармираат за пораст на случаи на кожен меланом, посебно кај младата популација.

„Согласно статистиките, во 2020 година биле забележани вкупно 325 000 нови случаи на меланом на глобално ниво (174.000 мажи, 151.000 жени), а доколку продолжи досегашниот тренд на појава на меланомот, се проценува дека бројот на нови случаи од меланом ќе се зголеми на 510.000 (приближно зголемување од 50 проценти) до 2040 година. Повеќето случаи на рак на кожата се предизвикани од прекумерна изложеност на ултравиолетовите (УВ) зраци од сонцето или солариум. Превенцијата е од особено значење за заштита од овие заболувања, а редовните дерматолошки контроли на бенките и промените на кожата, како и заштитата од УВ-зрачењата се еден од главните методи“, наведуваат од ДМ.

Идниот викенд (22 и 23 јуни) во период од 16 до 20 часот, односно од 11 до 15 часот, бесплатни дерматолошки прегледи ќе бидат организирани во „Куба Либре“ во Охрид.