Македонија
(Видео) Мицкоски – Фон дер Лаен: Ѝ покажав фотографии од убиствата во Ваташа, да прифатиме ли дека се администратори?
Раководството на ВМРО-ДПМНЕ оствари средба во канцеларијата на ЕУ со претседателката на ЕК, Урсула Фон дер Лаен.
На средбата, како што информираат од опозициската партија, биле презентирани три позиции на ВМРО-ДПМНЕ.
„Бидејќи одговорот на претседателката на ЕК, Урсула Фон Дер Лаен, во македонскиот парламент е дека практично ако помине ова што го промовира Владата на СДСМ и ДУИ, ќе имаме одржување меѓувладина конференција, дилемата што ја имаат ВМРО-ДПМНЕ, македонската јавност и граѓаните е следна: во членот 11 од документот наречен EU Common Position или заеднички став на ЕУ јасно стои дека Македонија нема да ги почне преговорите сè додека, повторувам, сè додека не биде променет Уставот, дали е тоа точно или не е точно, оставам јавноста експертска и луѓето што се занимаваат со оваа проблематика да дадат одговор. Повторувам, првата дилема и првиот став што ВМРО-ДПМНЕ го изнесе на таа средба е дали според документот EU Common Position, односно европски став на ЕУ, член 11, ги почнуваме преговорите сега веднаш или кога ќе дојде до промена на Уставот. Бидејќи ние, според овој документ, читаме дека почетокот на преговорите ќе биде кога ќе биде променет Уставот или, да бидам попрецизен, мал дел од бугарскиот народ, 750 семејства според последниот каков таков попис, биде дел од преамбулата и нормативниот дел на македонскиот Устав“, истакна лидерот на партијата, Христијан Мицкоски.
„Втората дилема што ја имаме, бидејќи се спомена во говорот дека нема да зборуваме за историјата, но членот 14 од истиот документ тоа не го говори. Членот 14 вели сосема спротивно, а тоа е дека деновиве ќе биде потпишан документ што се нарекува протокол, а во тој документ ќе се зборува за сè, само нема да се зборува за владеење на правото, борбата против криминалот и корупцијата, подобра економија, поквалитетно здравство, покомпетитивно образование. Туку ќе се зборуваме за средниот век, за 18 или 19 век, чиј бил Гоце, чиј бил Даме, чие било Илинденското востание. Што значи дека според членот 14 и протоколот, кој, за волја на вистината, никој во македонската јавност не го видел, ниту ја прочитал неговата содржина. Ние ќе зборуваме за сè, само нема да зборуваме за иднината. Ќе зборуваме за проблеми од минатото. Односно ќе зборуваме како во 21 век да се асимилира македонскиот народ и да се уништи македонскиот идентитет“, посочи Мицкоски пред новинарите.
Овој член 14, од документот наречен заеднички став на ЕУ, како што оценува Мицкоски, е поврзан со генералните позиции на ЕУ, членот 5. каде што покрај Копенхагеншките критериуми и критериумите дефинирани со Договорот за стабилизација и асоцијација, само за Македонија, за ниту една земја членка од овие 27 ниту, пак, за Албанија, не се поставуваат билатералните прашања како критериум.
„Ние ќе зборуваме за сè, само нема да зборуваме за она што е важно за граѓаните, а тоа е поквалитетен живот. Да бидам попрецизен, ќе бидеме фокусирани само на историја. И третото прашање за кое имам исто така дилема, а и позициите на ВМРО-ДПМНЕ се такви и имаат дилема, е воведната изјава, членот 3, каде што јасно стои дека акито или преговарачката рамка ќе биде преведена на македонски јазик, но бугарската страна ќе даде еднострана изјава со тоа како таа го гледа македонскиот јазик. Така што дека ние имаме чист македонски јазик, односно дека имаме јазик чист, кој буквално ќе биде дел од преговарачката рамка и од документите на Европската Унија, е голема лага“, потенцира лидерот на ВМРО-ДПМНЕ.
„Зошто е ова важно? Ова пред мене, почитувани претставници на медиумите и почитувани граѓани, е документ од третата конференција на Обединетите нации од 1977 година и се однесува на стандардизација на светските јазици, одржана во Атина пред точно 45 години, каде што јасно стои разликата помеѓу бугарскиот јазик и македонскиот јазик со македонското кирилско писмо. И ова го покажав на средбата. Ова се документи од гробовите на децата од Ваташа, на младинците од Ваташа, ова ли го прават администраторите? Ова се тие луѓе, ова ли е дело на администраторите? Ова ли е дело на луѓето што велат дека ја администрирале Македонија?
Ете тоа се дилемите што јас и ВМРО-ДПМНЕ ги имаме, а за жал, овие корумпирани политичари во Владата, потпомогнати од други корумпирани политичари, ги немаат и го распродаваат она што со крв и со живот некој го плаќал“, изјави лидерот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Максим Димитриевски најави нова детска градинка за 400 деца и целосна изградба на улицата АВНОЈ
Градоначалникот на Куманово и кандидат за нов мандат – Максим Димитриевски најави нов голем капитален објект – изградба на детска градинка во населбата Зелен Рид. Со која ќе се излезе во пресрет на потребите на жителите на оваа населба, но и пошироко. На локација за која во минатото биле издвојувани големи износи на финансии како отштета за поранешните сопственици на земјиштето.
„Дојде време денес да се обезбедат средства со кои ќе се изгради нова детска градинка за повеќе од 400 деца. Исто така, целосно урбано ќе се среди целиот простор околу, со што дополнителнои ќе се придонесе за облагородување на изгледот на оваа населба“, нагласи Димитриевски.
Паралелно со ова, Димитриевски најави дека во план е и изградба и довршување на сите краци од улицата АВНОЈ, како и целосно поставување на фекална канализација, со што дефинитивно ќе се надмине деценискиот проблем за жителите што живеат во тој дел на Куманово. „За сите проекти се обезбедени средства од Владата и во следниот период општината ќе ги реализира целосно“, порача Максим Димитриевски.
Тој ги повика граѓаните да му ја дадат поддршката и во вториот круг за Куманово да продолжи да расте и да се развива.
Македонија
Мицкоски од Карпош повика на масовна излезеност и поддршка за Сотир Лукровски и Орце Ѓорѓиевски
Претседателот на ВМРО-ДПМНЕ, Христијан Мицкоски, се обрати на мини митингот во Карпош, во рамки на вториот круг од локалните избори закажани за 2 ноември 2025 година, под слоганот „Вистинскиот избор! Твојот човек! Твоето место! За твојата иднина!“.
Мицкоски од Карпош зборуваше како човек кој го поминал својот живот низ улиците во Карпош со карпошани и повика граѓаните на 2 ноември да гласаат за број 9 за крај на бетонизацијата, за развој и напредок.
„Денес сум овде како човек кој го поминал својот живот тука во овие улици тука низ Карпош, како карпошанец и како таков сакам да кажам неколку работи коишто сметам дека се важни да се кажат. На овие локални избори народот јасно и гласно кажа која партија ја има довербата. После првиот круг ВМРО-ДПМНЕ и коалицијата освоија 33 градоначалници плус кандидатите кои се во втор круг како првопласирани и 6 како второпласирани, тогаш доаѓаме до бројка од 59 општини. Во 58 општини коалицијата предводена од ВМРО-ДПМНЕ и има мнозинство во советите. Ако на тоа се додаде и огромната предност која ја има Орце во однос на неговиот противкандидат којшто вчера видовте како на медиум јавно избегна да каже дали ќе ги поддржи кандидатите во Брвеница и Кичево на ВМРО-ДПМНЕ, тоа треба да се запомни, ние знаеме, но добро е скопјани да запомнат со какви измамници имаат работа. Затоа што еднаш измамник цел живот измамник. Честа се стекнува на улица и таму се учат работи кои во училиште не можеш да ги научиш, а меѓу нив е и честа и таа се брани на улица, но овој човек не само што не ја има таа чест туку тој има од кого да учи од неговиот ментор претседателот на таа политичка партија за која одамна вие знаете за каков измамник станува збор, тие луѓе ја изгубија својата чест и ја немаат“ нагласи Мицкоски.
Мицкоски од Карпош повика на масовна излезеност и поддршка за број 9, за Сотир Лукровски и Орце Ѓорѓиевски за градоначалник на Скопје
„Советничката листа на ВМРО-ДПМНЕ и коалицијата за Град Скопје убедливо победи во однос на сите други советнички листи, што значи имаме вкупно 60 општини во кои ВМРО-ДПМНЕ победи на овие локални избори во првиот круг. Јас сум убеден дека и после вториот круг ќе имаме 59 градоначалници плус Градот Скопје“ истакна Мицкоски.
Мицкоски ги повика граѓаните на 2 ноември да гласаат за број 9 и Сотир Лукровски во Карпош, за развој и напредок.
Македонија
Мицкоски: Кога Јакимовски бараше поддршка го замолив да нема бетонизација, а потоа ми рече ‘морам од нешто да живеам’
Претседателот на ВМРО-ДПМНЕ, Христијан Мицкоски, од маалска средба во општина Карпош порача дека е време за промена и крај на, како што рече, годините на „бетонизација и приватни интереси“ во оваа општина.
Во своето обраќање, тој се осврна на односите со актуелниот градоначалник Стевчо Јакимовски, за кого рече дека „ја изневерил довербата на граѓаните и коалицијата“ уште по изборите во 2021 година.
Мицкоски се наврати на 2021 година, кога, како што рече, актуелниот градоначалник на Карпош, Стевчо Јакимовски, побарал помош и поддршка од ВМРО-ДПМНЕ по првиот круг од локалните избори.
„Тогаш дојде ненајавен, вознемирен и уплашен, во паника. Го примив, му реков да седне и да се смири, да разговараме. Ми велеше: ‘Те молам, поддржете ме, ако треба ќе клекнам, само да ме поддржите. Народот може да ме оправда, да ме обели’. Му реков – немој така, не личи, си човек во години, ќе разговараме, но имам едно барање – нема повеќе бетонизација во Карпош. Граѓаните се изморени од тоа“, раскажа Мицкоски.
Според него, Јакимовски ветил дека ќе го почитува тоа барање и добил поддршка од ВМРО-ДПМНЕ со што ја обезбедил градоначалничката функција.
„По изборите, кога отидов да му честитам, ми покажа маса преполна со детални урбанистички планови. Ми рече: ‘Бирај, кој е за тебе’. Го прашав што значи тоа, нели се договоривме дека нема да има нова бетонизација. А тој ми рече: ‘Морам од нешто да живеам’. Тогаш ми стана јасно дека не станува збор за ветувања, туку за интереси. Му се заблагодарив и му реков дека од мене нема да добие поддршка“, изјави Мицкоски.
Тој додаде дека по тој период Јакимовски започнал со лични напади, но и дека, како што рече, времето на „старите политички лица“ завршува.
„Карпош мора да ја врати својата енергија и изглед. Се работи за човек кој се наоѓа на црната листа на САД за криминал. Време е граѓаните да изберат чесност, а не интереси“, изјави Мицкоски, повикувајќи ги жителите на Карпош да го поддржат кандидатот на ВМРО-ДПМНЕ, Сотир Лукровски, во вториот круг на локалните избори на 2 ноември.

