Македонија
(Видео)„Мора некој и да умре, не може сите да ги спаси“, за пациентите што протестираа пред судот, Жан Митрев не е човек, туку ангел на земјата

Пациентите на Жан Митрев, кои утрово со прегратки и аплауз го испратија на судење, го доживуваат како ангел на земјата. Многумина се претставија како штипјани, од каде што потекнува и лекарот. Пред судот најавија дека ќе се борат тој да не биде осуден.
„Јас сум од Штип. Има овде многу луѓе што го поддржуваат доктор Митрев затоа што тој има спасено илјадници човечки и детски животи. Доктор Митрев е чесен човек, кој дава сè за своите пациенти, без разлика на нивната политичка, етничка, религиозна припадност и така натаму. Не треба доктор Митрев да се осудува, сè уште не влегол во судот, а го осудија. Ние мора да се бориме и нашата поддршка е огромна. Се надевам дека правдата ќе победи. Можеби е бавна, но секогаш излегува на виделина. Поддршка за доктор Митрев, огромна поддршка“, рече една од пациентките на Митрев пред судот.
Друг пациент, бранејќи во Митрев, рече дека е срамота за судот што му се суди на лекарот.
„Тој е ангел на земјата, не е човек. Со овие политики да се прекине веќе. Пациентите полумртви му ги праќаа од Градската болница на човекот, ги оживуваше. Срамота е ова што се прави за еден доктор со такво реноме. Треба да се ослободи овој човек. Не треба судија да суди доктор, по кој основ? Тоа не смее да се случи. Апсурд е тоа. Срамота за судот. Мора некој и да умре, не може тој сите да ги спаси. За некого нема лек, а ако нема лек, нема век. Еве, јас сум опериран, тој лично ме спаси. Болницата е како аптека, нема таква болница во светот, со гаранција тврдам“, рече оперираниот пациент пред судот.
Еден од пациентите на Митрев објасни дека починале оние пациенти на лекарот што не дошле навреме во болницата.
„Над 40 луѓе знам што лично тој ги има спасено, ама нормално, си доаѓаат навреме. Сите други што не доаѓаат навреме, одат ваму-таму или калкулираат за колку време ќе го продадеме автомобилот или да земеме кредит, се знаат условите во приватна болница. Тоа се условите, ако сакате – влезете, а тие поради некои небулозни сфаќања задоцнуваат и по пет-шест дена, никој не може да ги спаси. Знам 30 примени, се јавуваат навреме, реагираат и се средуваат. Тоа беше Ковид-19, беше непознато. На крајот на краиштата, никој не ти става пиштол на главата за да одиш. Тие луѓе од другата страна сигурно се манипулирани, инаку која е логиката. Еве и јас сум изгубил дете. Ќе го спасам ли? Еве на тие луѓе ние ќе им платиме отштета, ама ним не им е до отштета, сакаат да направат зло. И како може сега 1.000 души спасени, а само тие 20 не. Еве кој било нека се јави, јас ќе му депонирам 10.000 евра за отштета. Во заднина е нешто зло, нешто расипано, нешто друго“, рече пациентот на Митрев.
Пациентите останаа пред судот додека внатре траеше судењето и повторно со аплауз го пречекаа лекарот кога излезе. Неговиот адвокат Никола Додевски, слушајќи го аплаузот пред новинарите, рече дека и не се потребни изјави оти аплаузот е доволен, а потоа додаде дека успеале да го убедат судот да им одобри 15 дена за да ја подготват вистината за одбраната.
Следното судење е закажано за 13 јуни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Одличен одзив на „Цел Центар на точак“, исцрпени средствата за велосипеди, повикот за дополнителна опрема сѐ уште е во тек

Општина Центар информира дека се исцрпени средствата за субвенционирање на велосипеди, електрични велосипеди и е-тротинети во рамки на јавниот повик „Цел Центар на точак“.
„Проектот „Цел Центар на точак“ е потврда дека центарци се подготвени да направат вистински избор за поеколошки и поодржлив начин на движење низ градот. И овојпат интересот беше толку голем што за кратко време се искористија средствата. Ова е доказ дека сме на вистинскиот пат,“ порача градоначалникот Горан Герасимовски.
Од вкупно предвидените 600.000 денари, субвенционирани се 197 жители на Општина Центар, додека јавниот повик за субвенционирање на дополнителна опрема останува активен.
Овој долгогодишен и популарен проект предвидува субвенции за купување велосипед, електричен велосипед или е-тротинет, во износ од 30% од цената, но најмногу до 3.000 денари, како и субвенции за набавка на дополнителна опрема,, во износ од 30% од цената, но не повеќе од 1.000 денари, велат од општината.
Под дополнителна опрема се подразбираат: детско седиште, заштитна кацига, светло, катадиоптри, ѕвонче, безбедносна сајла, катанец и други елементи што го зголемуваат нивото на безбедност при користење.
Македонија
Македонската дипломатија нема да биде ничија партиска сопственост, одговори МНР по прозивките од СДСМ

Македонската дипломатија не е, и нема да биде ничија партиска сопственост. По години на политичка злоупотреба, ја враќаме дипломатијата на државата, институционално, професионално и во согласност со законот, реагираат од МНР по прозивките од страна на СДСМ кои на прес -конференција кажаа дека Муцунски и ВМРО-ДПММЕ ја узурпираат дипломатијата.
„Автентичното толкување на член 39 став 3 од Законот за надворешни работи е легитимна, уставно заснована постапка, донесена од Собранието – единствениот орган со надлежност за толкување на законите. Министерството нема ниту овластување, ниту влијание врз овој процес.
Членот на Комисијата за надворешни работи од СДСМ, Фатон Бејта, го упатуваме на предметот Уставно право на кој било правен факултет во државата, каде што ќе може да се потсети дека државата се темели врз начелото на поделба на власта – законодавна, извршна и судска.
Целта на ова толкување е да се воведе дополнителен демократски филтер и јавна отчетност при изборот на амбасадори – не да се одземе уставната надлежност на Претседателот, туку да се зајакне транспарентноста пред граѓаните.
Собраниската процедура, спроведена пред Комисијата за надворешни работи составена од пратеници од сите политички партии, е доказ за инклузивност и независност на процесот.
Наместо да одржуваат безпредметни прес-конференции, СДСМ треба да одговори зошто нивните амбасадори со години беа апатични, невидливи или отворено политизирани, а именувањето на дел од нив беше спроведено спротивно на Законот за надворешни работи“.
Нашата цел не е партизација, велат од МНР, туку системска професионализација.
„За првпат по долг период се воспоставуваат јасни критериуми, јавни постапки и механизми за унапредување на кариерните дипломати. Најсилна потврда за ова се измените на Законот за надворешни работи, кои неодамна беа усвоени во Собранието, а чија главна цел е токму професионализацијата на дипломатијата.
Амбасадорите што чесно и професионално ја извршувале својата функција немаат од што да се грижат. Но оние што амбасадите ги третираа како партиски трофеи, нивниот мандат завршува“.
Оваа влада, се нагласува во реакцијата од МНР, гради модерна, отчетна и компетентна дипломатија, со амбасадори што ја претставуваат државата, а не партијата.
Македонија
(Видео) Дали СВР Велес фалсификува службени документи за да ги заштити УМС на ВМРО-ДПМНЕ, прашува Цветаноски

Денеска поставуваме сериозно и алармантно прашање: Дали СВР Велес фалсификува службени документи за да ги заштити УМС на ВМРО-ДПМНЕ од одговорност, прашуваат од СДММ.
„Откако УМС на ВМРО-ДПМНЕ славеа со пиротехника во момент кога цела Македонија тагува по трагедијата во Кочани скандалот стана уште поголем. УМС објави демек „доказ“ дека го пријавиле настанот и пиротехниката, но дали е валидно и дали станува збор за фалсификат? Нема повратница од Министерството за внатрешни работи – со што би се потврдило дека оваа пријава навистина е доставена и примена во законскиот рок“.
Не е наведена количината на пиротехнички средства што ќе се користат, што е обврска според член 39 од Законот за употреба на пиротехнички средства, вели Бојан Цветаноски, претседател на ЛК СДММ Прилеп.
„Но што е клучно. На документот стои ознака со број 23.23.5.5188/2.
Според нашите информации ова е интерна ознака, која не ја става известителот, туку ја додава началникот на СВР по приемот на актот. Тоа значи, оваа ознака не може да биде дел од документот што го објавува УМС туку е службена ознака по прием. Со други зборови, оваа хартија што се обидоа да ја протнат како легален документ постои голема веројатно дека не е релана“.
Очекува, како што нагласи, одговори од МВР и Панче Тошковски и праша дали е ова фалсификат.
Според него, нема правда ако институциите фалсификуваат документи за да ги штитат партиските членови на ВМРО-ДПМНЕ.
Ако ова се потврди, ќе бараме, потенцира Цветаноски, кривична одговорност за сите инволвирани, од извршителите до политичките наредбодавци.