Македонија
(Видео) Адвокатот на Османи: Нема клевета, ниту намера за омаловажување, само изразување јавно мислење

Адвокатот Љупчо Илиев, кој го брани министерот за надворешни работи Бујар Османи во судскиот спор со Македонското меѓународно движење за човекови права (ММДЧП), посочи дека тој го критикувал здружението, но не го клеветел. Според Илиев, Османи има право на тоа иако е функционер што креира јавно мислење. Прашан дали Османи ќе се појави на следно судење за да сведочи: „Не можам да прејудицирам. Ние го предложивме, судот го прифати“.
„Од наша страна беа истакнати наводи, кои упатуваат на тоа дека од содржината на изјавите презентирани во тужбата, апсолутно не може да произлезе дека тужениот имал намера кого било да омаловажи, во случајот и најмалку – тужителите, од кои едното е физичко лице, а другото е здружение од Канада. Од наша страна беа истакнати соодветни наводи, особено укажувајќи дека изнесените наводи во тужбата и предложените докази од тужителите апсолутно не може да бидат во корелација и да се подведат под одредбите од Законот за граѓанската одговорност за навреда и клевета. Од страна на министерот, сега тужен, изразено е само јавно мислење. Тој изразува јавна критика на однесувањето на здружението“, вели Љупчо Илиев, адвокат на Бујар Османи.
„Тоа не значи дека и тие не може да изразат свое јавно мислење за дејствување и ангажман на другите граѓани, особено граѓани што вршат јавни функции или здруженија“, додаде адвокатот на Османи.
Од Македонското движење поднесоа тужба против Османи бидејќи тој лани во октомври за бугарската телевизија БТВ изјави дека треба да се види кој стои зад отворањето на македонскиот клуб во Благоевград. Османи го посочи токму ова движење како еден од финансиерите на македонскиот клуб „Никола Вапцаров“ во Благоевград. Рече дека се работи за фондација од Канада, која работи спротивно на интересите на државата и на интересите на македонските стратешки партнери.
На 27 јануари 2023 година претседателот на Македонското меѓународно движење за човекови права, Бил Николов, и организацијата (ММДЧП) поднесоа тужби за навреда и клевета пред Основниот граѓански суд Скопје и против медиумот „360 степени“.
„Османи и ‘360 степени’ се гласно критични против сите што ќе изразат несогласување со режимот и со американските антимакедонски политики и нивното кршење на човековите права и граѓанските слободи. Тужбите се за кршење на Законот за граѓанската одговорност за навреда и клевета“, велат од Македонското движење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Богојески ја менува постапката за избор на надворешни експерти за оценување на проектите и апликациите за Еразмус+

Националната агенција за европски образовни програми и мобилност го објави почетокот на клучна постапка, а во рамки на заложбите за транспарентност и борба против корупцијата.
Денес, директорот на Националната агенција, Петар Богојески, донесе нова процедура за постапката за избор на надворешни експерти/евалватори за оценување на предлог-проекти и/или периодични и конечни извештаи од одобрени проекти, како и за апликации во рамките на програмите Еразмус+ (2021–2027) и Европски солидарен корпус (2021–2027).
Во таа насока, како што посочуваат од Националната агенција, ќе следува целосна реевалуација на постојните евалватори, согласно највисоките професионални стандарди и етички норми. Потоа, ќе биде објавен нов јавен повик за избор на професионални и департизирани евалватори, експерти од различни области, кои со својата стручност и интегритет ќе придонесат кон натамошно зајакнување на кредибилитетот на Агенцијата.
Со оваа постапка, од Националната агенција велат дека се испраќа јасна порака дека борбата против корупцијата е приоритет и дека се стреми да биде пример за интегритет и професионализам, не само во нашата земја, туку и во земјите членки на Европската унија.
Македонија
Филков : Сите закони, кои се дел од реформската рамка, се подготвени или се во финална фаза на усвојување

Министерот за правда Игор Филков на денешната прес конференција се осврна и на Реформската агенда и законите кои се подготвени или се во финална фаза на усвојување во изминатите 10 месеци.
Подготвени се:
-Предлог Закон за судски совет
-Предлог Закон за јавно обвинителство
– Предлог Закон за платите на јавните обвинители
-Кривичен законик
-Предлог Закон за кривична постапка
-Предлог Законот за судска служба
Во план и подготовка се и:
Предлог Законот за судски буџет
Предлог Законот за Советот на јавни обвинители
Предлог Законот за јавнообвинителска служба
Измени на Изборниот законик, со поддршка на ОДИХР.
Закони со кои се регулираат платите на судиите, јавните обвинители, и јавно обвинителската служба
Закон за слободен пристап до информации од јавен карактер
Закон за помилување
Закон за вештачење
Закон за нотаријат
Закон за извршување
Закон за пробација
Закон за извршување на санкции
Закон за конфискација на имот во граѓанска постапка
Закон за заштита на лични податоци
,,Реформската агенда има рокови до кои законот треба да биде донесен од Собранието. Од друга страна, Годишната програма на Владата опфаќа поранешна фаза — кога законот треба да биде доставен до ЕНЕР или до Владата.
Во просек, собраниската постапка трае два месеца. Кај одредени закони, постојат надворешни фактори.
Изборниот законик, на пример, бара широк политички консензус,”рече министерот за правда Игор Филков.
Министерот порача дека се оди на квалитетни измени и законски решенија во интерес на граѓаните, не како што досега била праксата да се носат во интерес на поединци или какви било интересни групи кои што во минатото ги носеле измените на штета на граѓаните ,на начини на кои што сите ги знаеме.
,,Законите се тука, подготвени, доставени, транспарентно објавени. Ние нема да дозволиме реформите да бидат жртва на дневна политика или бирократска инертност. Затоа ќе повторам: реформите не се желба, туку одговорност. И Министерството за правда таа одговорност ја носи до крај”,потенцира министерот за правда Игор Филков.
Македонија
Палевски вели дека не се пријавил во полицијата во Баликесир оти секако ќе го нашле, се видел на сите вести во пицеријата додека пиел еспресо

Обвинетиот за убиствата на Вања и Панче, Љупчо Палевски, во судот одговараше на прашањата на обвинителите.
Тој беше прашан зошто сам не се пријавил во полиција кога во Баликесир видел дека го бараат со меѓународна потерница. Рече дека пред да биде уапсен го вратил клучот од куќата на сопственикот затоа што сметал дека е јасно оти ќе биде уапсен.
„Без разлика на големината на Баликесир, кога 48 часа сте во градот, не може да знаете каде се судот, Обвинителството и полициската станица. Затоа, реков дека во истиот ден двапати се вратив во пицеријата по што вториот пат бев лишен од слобода на регуларен, нормален начин. Немам приговори на однесувањето на турската полиција, освен една забелешка, која вашиот претпоставен Бубевски ја злоупотреби. Еден од вработените од Интерпол ме извади во ходникот, ме фотографира и фотографијата на ‘Воцап’ му ја испрати на Оливер Спасовски. Подоцна мојот адвокат во Турција ми испрати печатени вести од Македонија, каде што ја видов оваа фотографија. Тоа се ваши класични злоупотреби и на предистрагата и на самата истрага, каде што ги фотографирате осомничените и им ги праќате на медиумите. Немало бегање и не сум променил град на престој по сознанието дека сум осомничен“, рече Палевски.
Потоа обвинителката му рече дека ако сакал, можел и од самата пицерија да се пријави бидејќи бил баран со меѓународна потерница, а прашањето беше насочено кон тоа дали седел без намера да се пријави, Палевски одговори: „И еспресо пиев“.
Додаде и дека не барал полициска станица. На мониторот во пицеријата на сите вести во Турција се гледал себеси.
„Зошто да барам станица кога ќе ме најдат? На 2 декември, Дејан Димовски, оној што вистински ја водел истрагата, а не вие, барал од мојот адвокат Стојков преку телефон да му кажам каде се наоѓам, да му кажам каде сум се движел на 27 ноември. На полицијата ѝ кажав дека сум во Баликесир“, рече Палевски.
Обвинителката Жаклина Јосифовска го праша и каде одел и зошто, иако тврдеше дека го боли грбот и одел во Белград по второ мислење за болеста, со себе немал ниедно ливче од медицинската документација.
„Имав две цедиња во куферот, Обвинителството ми ги украде“, рече Палевски.
Прашан беше и за денот кога беше грабнат и убиен 74-годишниот Панче Жежовски од Велес и за лицето што вели дека го сретнал, но рече дека не може да се сети на неговото име и презиме. Додека ја шетав Хера, рече Палевски, среќавав многу луѓе.
„Кога и како ќе се осмели тоа лице да се појави пред судот, не знам, но за разлика од ЈО, моите тврдења до сега, како и за пиштолот што недостига, се поткрепени со материјални докази“, одговори Палевски.
Прашан дали однапред платил кирија за декември и покрај лошата финансиска состојба на партијата за да си обезбеди алиби, Палевски одговори: Токму тоа што не сум правел алиби како што сум можел, покажува нешто друго, а не да грабнуваш и да убиваш. Дополнително, слушнавте дека обвинетите рекоа оти се плашеле од мене, тогаш зошто би убивал кога сум можел само да им наредам да го направат тоа.