Македонија
(Видео) Адеми: Меѓу земјите сме со највисок скок во постигањата помеѓу две ПИСА-тестирања
Учениците од Северна Македонија постигнаа исклучителен напредок во резултатите помеѓу двете последни ПИСА-тестирања спроведени од страна на Организацијата за економска соработка и развој. Организаторот на меѓународната студија преку која се проверува јазичната писменост, математичката писменост, како и знаењата на учениците во областа на природните науки утрово го потврди напредокот, а резултатите денес во Владата ги презентираше и министерот за образование и наука Арбер Адеми.
Адеми информираше дека резултатите од последното тестирање се најдобри досега, односно значително подобри во однос на резултатите кои нашите ученици ги постигнаа во изминатите две тестирања на кои учествуваа, потенцирајќи ја потврдата на ОЕЦД дека сме една од земјите со најголем напредок помеѓу две тестирања.
„Конкретно, во областа на читање со разбирање учениците од Северна Македонија го остварија највисокиот скок, односно се на прво место по напредок. Во областа на природните науки на второ место по скок во резултатите и на трето место во областа на математиката“, рече Адеми, информирајќи дека успехот е постигнат во конкуренција на 79 земји кои изразиле интерес суштински и по меѓународни стандарди да ја проверат подготвеноста на учениците за практично да го применуваат знаењето што го стекнале до 15-годишна возраст.
Споредувајќи ги резултатите од 2015 и 2018 година, Адеми информираше дека резултатите од проверката на способноста за читање со разбирање кои ги остварија учениците се подобрени за 41 поен, односно од 352 постигнати поени во 2015 година, на 393 поени во 2018 година; резултатите од тестирањето по природни науки се зголемени за 29 поени, од 384 во 2015 година на 413 поени во 2018, додека резултатите по математика се подобрени за 23 поени, од 371 на 394 постигнати поени.
Според официјалните ранг-листи, Република Северна Македонија сега е на 62. место по резултатите од природни науки, на 66. место по читање и на 67. место по резултатите од математика. Напредокот е видлив, ако се има предвид дека во 2015 година земјата беше на 68. место по резултатите од математика и на 69. место по резултати од природни науки и читање, и тоа во конкуренција на 72 држави.
„Ценам дека напредокот е плод на суштинските промени кои се направија во изминатиот период во областа на образованието преку еден инклузивен пристап со учество на сите засегнати чинители. Но, исто така се и плод на добрата организираност за имплементација на ПИСА-тестирањето“, рече Адеми, додавајќи дека пред официјалното, беше спроведено пробно тестирање, а во меѓувреме сите учесници во процесот – 760 наставници, директори и над 5.500 ученици беа добро обучени и конкретно насочени за постапување, што придонесе да биде разбрана суштината и важноста на овој процес.
Адеми нагласи дека резултатот треба да нé радува, но и како што рече, да нé мотивира да го одржиме континуитетот во креирање и спроведување длабински образовни реформи во секој сегмент, на секое ниво и од секој аспект.
„Гледаме дека заложбите почнуваат да го даваат очекуваниот и проектиран позитивен ефект. А тоа е така, бидејќи политиките кои ги креираме се засноваат на објективни и кредибилни анализи и истражувања за тоа што навистина е потребно да се промени во образовниот систем“, потенцираше министерот за образование, додавајќи дека ваквиот начин и пристап на креирање политики кај него влева оптимизам дека Северна Македонија ќе постигнува уште подобри резултати на следните тестирања.
Заблагодарувајќи се на сите учесници во процесот на ПИСА 2018-тестирањето, Адеми најави дека нашата земја веќе ги започна подготвителните активности и ќе биде дел од следното тестирање во 2021 година, откако претходно во 2020 ќе се спроведе пробен процес.
„Во меѓувреме, Владата, МОН и сите останати засегнати институции и чинители, продолжуваме со спроведување на реформите, на промените кои не можат да се случат преку ноќ, туку потребна е сплотеност, многу труд и работа. Ова постигнување е одличен показател дека се движиме на прав пат, да создадеме квалитетен и конкурентен национален образовен систем“, рече Адеми.
За Северна Македонија ова е трето учество на меѓународното ПИСА-тестирање, по 2000 и 2015 година кога според резултатите бевме земја речиси на дното на ранг-листите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Обвинителството побара куќен притвор за судијата Ѓоко Ристов осомничен за корупција
Обвинителството побара куќен притвор за судијата Ѓоко Ристов осомничен за корупција, кај кого беа пронајдени 350.000 евра соѕидани во ѕид во куќата на неговите родители во Неготино.
„Денеска предметниот јавен обвинител од обвинителството за гонење на организиран криминал и корупција го сослуша осомничениот судија и му ги предочи прибраните докази врз основа на кои се темели основаното сомневање дека ги сторил делата што му се ставаат на товар. Ценејќи ги објективните услови што е потребно да бидат исполнети за определување на мерка за обезбедување присуство, како и субјективните што истата ја оправдуваат, на судијата на претходна постапка при Основниот кривичен суд Скопје јавниот обвинител му достави предлог на осомничениот да му биде определена мерка куќен притвор“, соопшти Обвинителството.
Освен оваа мерка, предложено е и определување на мерка на претпазливост – привремено одземање на патна или друга исправа за преминување на државната граница, односно забрана за нејзино издавање.
Македонија
Се зголемуваат цените на бензините и дизелот
Цените на бензините и на дизелот од ноќеска на полноќ ќе се зголемат за 1,5 и за 2 денари, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 21.1.2026 година од 00:01 часот максималните цени на нафтените деривати ќе изнесуваат:
Моторен бензин ЕУРОСУПЕР БС – 95 72,00 (денари/литар)
Моторен бензин ЕУРОСУПЕР БС – 98 74,00 (денари/литар)
Дизел гориво ЕУРОДИЗЕЛ БС (Д-Е V) 66,50 (денари/литар)
Масло за горење Екстра лесно 1 (ЕЛ-1) 66,00 (денари/литар)
Мазут М-1 НС 32,987 (денари/килограм)
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1) се зголемуваат за 1,50 денар за литар.
Малопродажната цена на ЕУРОДИЗЕЛ (Д-Е V) се зголемува за 2,00 денари за литар.
Малопродажната цена на Мазутот М-1 НС се зголемува за 0,854 денари за килограм и сега ќе изнесува 32,987 денари за килограм.
Македонија
(Видео) Петрушевски: Филипче да одговори дали има кредибилитет да води партија?
Сведоштвата на др. Жан Митрев ја разоткрија вистината за начинот на кој Заев и Филипче ја водеа државата. Притисоци, уцени и злоупотреба на институциите за лични интереси, изјави Бране Петрушевски од ВМРО-ДПМНЕ.
„Во ек на пандемија и вонредна состојба, наместо грижа за здравјето на граѓаните, Филипче и Заев ја користеле политичката моќ за преземање на приватната болница Жан Митрев. Ова не е политика наменета за граѓаните, туку е мафијашки модел на дејствување. Дополнително, според јавно изнесените сведоштва, Заев и Филипче сакале сами да ја одредат вредноста на болницата. За возврат нуделе „помош“ во судска постапка на докторот Жан Митрев. Класична уцена и класична злоупотреба на власта. Овие обвинувања не доаѓаат изолирано. Тие се надоврзуваат на долгата низа сомнежи и афери поврзани со Заев и Филипче, златни визи, имот и бизниси во Дубаи, фирми во странство и сомнителни финансиски трансакции. Филипче денес се обидува да се претстави како ново лице, но ја седи фотелјата на Заев и ги спроведува истите политики. Истите луѓе, истите шеми, истата злоупотреба“, рече тој.
Според Петрушевски, прашањето е едноставно, а Филипче треба да го одговори – дали човек со ваков багаж на сомнежи и скандали може да има кредибилитет да води партија?
„Наместо повлекување и одговорност, гледаме ароганција и молк. Затоа правдата мора да зборува.Го повикуваме Јавното обвинителство веднаш да постапи и да ги истражи сите наводи. Законот мора да важи за сите“, рече тој.

