Македонија
(Видео) Ангелов: Добар булдожер при гаснење пожар на отворен простор понекогаш вреди повеќе од хеликоптер
Пожарот, кој вчера избувна во Националниот парк Маврово, а синоќа се приближи на 500 метри до селото Врбен, истовремено се ширеше и закануваше и на Шар Планина. За да спречиме ширење на овој голем шумски пожар кон Шар Планина, синоќа, околу 21.30 часот, од „Бехтел и Енка“, со која неколку дена претходно постигнавме договор да ни помагаат со тешка механизација онаму каде што тоа го дозволува теренот, побарав во текот на ноќта на критичната локација да донесат еден голем булдожер за изработка на широк противпожарен појас. На наше големо задоволство неколку минути подоцна нѐ побара возачот на багерот, побара полициска придружба за камионот што требаше да го транспортира повеќе од 4 метри широкиот булдожер. Пред изгрејсонце булдожерот беше на критичното место и веднаш почна со правење безбеден противпожарен појас, со кој спречи ширење на пожарот во насока кон Шар Планина, извести директорот на ЦУК, Стојанче Ангелов.
„Покрај булдожерот, кој дејствува над селото, од долната страна селото го бранат 20-ина ренџери од Националниот парк Маврово, 24 специјалци од полициската САЕ ‘Тигар’, со подршка на локално население. Од воздух помага големиот полициски хеликоптер ‘ми 171’, а набргу ќе му се придружи и словенечкиот хеликоптер.
Пожарот е критичен на еден потег над селото, каде што покрај патот, на кој се распоредени сили за одбрана, има зимзелени ели високи до 30 метри. Јас сум оптимист и со оваа стратегија и тактика очекувам овој тежок шумски пожар денес да биде ставен под целосна контрола“, вели Ангелов.
Тој упати голема благодарност до локалното население, кое активно се вклучи во гаснењето, како и до ренџерите од Националниот парк Маврово, полициските специјалци, кои, како што извести Ангелов, од рано наутро пожртвувано се обидуваат да го сопрат навидум несопирливиот оган на некои места висок и до 30 метри.
„Посебна благодарност до ‘Бехтел и Енка’ бидејки нивниот моќен булдожер замени повеќе од 30 пожарникари или најмалку еден хеликоптер.
Ги охрабрувам сите авторитети што командуваат со гаснењето на шумските пожари да користат земјоделска механизација или уште подобро тешка градежна механизација секаде каде што тоа го дозволува теренот. Доколку немаат нивни ресурси, слободно нека побараат подршка од Главниот штаб за управување со кризи, кој го предводам јас како директор на ЦУК. „Бехтел и Енка“ и понатаму стојат на располагање доколку некаде е неопходна подршка со тешка градежна механизација.
Воедно, ги повикувам сите компании, кои на кој било начин може да помогнат во борбата со огнената стихија да се јават во Центарот за управување со кризи бидејки секоја релевантна помош е добредојдена“, додаде Ангелов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЦУК: Пронајдени се двете женски лица кои се изгубија на патот кон Дрисла
Пронајдени се двете женски лица кои се изгубија на патот кон Дрисла, информираат од Центарот за управување со кризи.
„Добиена е повратна информација од Полициската станица Драчево дека двете женски лица се пронајдени на црн пат помеѓу Долно Количани и Батинци. Лицата се во добра здравствена состојба и со возило, во придружба на полицијата, веќе се движат кон Драчево. Појаснуваме дека, поради грешка во првичната комуникација, не станува збор за странски државјанки, туку за државјанки на Р.С.Македонија“, стои во известувањето од ЦУК.
Македонија
ЦУК: Две странски државјанки изгубени на патот кон Дрисла – полицијата упатена на терен
Преку единствениот број за итни повици 112 добиена е информација дека две женски странски лица, кои патувале со возило, се изгубиле во реонот на патот кон Дрисла, информираат од Центарот за управување со кризи.
Оттаму велат дека ЦУК е во постојана комуникација со МВР и Полициската станица Драчево, од каде е побарано упатување екипа на терен.
Полициска екипа од ПС Драчево е веќе упатена кон локацијата и постапува по случајот, соопшти ЦУК.
Македонија
(Фото+видео) „63 сенки ќе ве следат – секој поглед бара правда“ – марш за загинатите во кочанската дискотека
Илјадници граѓани и родителите на жртвите од Кочани денеска маршираа во Скопје. Побараа правда и одговорност.
Маршот во организација на Здружението на граѓани „16 Март 2025“ од Кочани и иницијативата „Кој е следен“ почна во 12:05 часот на плоштадот „Македонија“, продолжи кон Собранието на Македонија, а заврши пред Основниот кривичен суд.
Се движеа носејќи фотографии од загинатите и транспаренти на кои пишуваше: „63 сенки ќе ве следат – секој поглед бара правда“, „Моето дете беше убиено од систем кој не штити туку убива“, „Колку детски животи треба да згаснат за да се разбудите?“, „Ние изгубивме, вие се уште имате за што да се борите“…


Сопругата на пејачот Андреј од ДНК, Наталија Ѓорѓиеска, побара пратениците да иницираат надзорна расправа и посебна анкетна комисија за целосно и независно испитување на случајот.
„Истражувањето што се водеше остана нецелосно, со многу отворени прашања, без одговор и недоразјаснети околности. Ние, семејствата, останавме со сомнеж дека вистината овојпат е сокриена“, кажа Ѓорѓиеска.


Судењето за пожарот во Кочани почнува во среда. Предвидено е неделно да се одржуваат по најмалку две рочишта. Обвинителство распореди 15-мина обвинители кои ќе настапуваат во тимови. Ќе им се суди на сопствениот на дискотеката, фирмата за обезбедување, тројца градоначалници на Кочани, поранешни министри за економија и директори на Дирекцијата за заштита и спасување. Обвинети се за пожарот во Пулс каде загина 63 лица, а над 200 беа повредени.

