Македонија
(Видео) Ангелов: Добар булдожер при гаснење пожар на отворен простор понекогаш вреди повеќе од хеликоптер

Пожарот, кој вчера избувна во Националниот парк Маврово, а синоќа се приближи на 500 метри до селото Врбен, истовремено се ширеше и закануваше и на Шар Планина. За да спречиме ширење на овој голем шумски пожар кон Шар Планина, синоќа, околу 21.30 часот, од „Бехтел и Енка“, со која неколку дена претходно постигнавме договор да ни помагаат со тешка механизација онаму каде што тоа го дозволува теренот, побарав во текот на ноќта на критичната локација да донесат еден голем булдожер за изработка на широк противпожарен појас. На наше големо задоволство неколку минути подоцна нѐ побара возачот на багерот, побара полициска придружба за камионот што требаше да го транспортира повеќе од 4 метри широкиот булдожер. Пред изгрејсонце булдожерот беше на критичното место и веднаш почна со правење безбеден противпожарен појас, со кој спречи ширење на пожарот во насока кон Шар Планина, извести директорот на ЦУК, Стојанче Ангелов.
„Покрај булдожерот, кој дејствува над селото, од долната страна селото го бранат 20-ина ренџери од Националниот парк Маврово, 24 специјалци од полициската САЕ ‘Тигар’, со подршка на локално население. Од воздух помага големиот полициски хеликоптер ‘ми 171’, а набргу ќе му се придружи и словенечкиот хеликоптер.
Пожарот е критичен на еден потег над селото, каде што покрај патот, на кој се распоредени сили за одбрана, има зимзелени ели високи до 30 метри. Јас сум оптимист и со оваа стратегија и тактика очекувам овој тежок шумски пожар денес да биде ставен под целосна контрола“, вели Ангелов.
Тој упати голема благодарност до локалното население, кое активно се вклучи во гаснењето, како и до ренџерите од Националниот парк Маврово, полициските специјалци, кои, како што извести Ангелов, од рано наутро пожртвувано се обидуваат да го сопрат навидум несопирливиот оган на некои места висок и до 30 метри.
„Посебна благодарност до ‘Бехтел и Енка’ бидејки нивниот моќен булдожер замени повеќе од 30 пожарникари или најмалку еден хеликоптер.
Ги охрабрувам сите авторитети што командуваат со гаснењето на шумските пожари да користат земјоделска механизација или уште подобро тешка градежна механизација секаде каде што тоа го дозволува теренот. Доколку немаат нивни ресурси, слободно нека побараат подршка од Главниот штаб за управување со кризи, кој го предводам јас како директор на ЦУК. „Бехтел и Енка“ и понатаму стојат на располагање доколку некаде е неопходна подршка со тешка градежна механизација.
Воедно, ги повикувам сите компании, кои на кој било начин може да помогнат во борбата со огнената стихија да се јават во Центарот за управување со кризи бидејки секоја релевантна помош е добредојдена“, додаде Ангелов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пијан Турчин приведен во Охрид, со нож влегол во угостителски објект

Охрдиската полиција приведе пијан Турчин. Викал и непристојно се однесувал на улица, а потоа влегол во угостителски објект каде што полицијата забележала дека носи нож.
„На 27.06.2025 година во 07.50 часот, во угостителски објект лоциран на булеварот „Македонски просветители“ во Охрид, приведен е Г.А.(32) од Фалса, Република Турција. Тој претходно, во алкохолизирана состојба, го нарушил јавниот ред и мир со викање и непристојно однесување а потоа влегол во угостителскиот објект каде, при извршен преглед, полициските службеници, кај него забележаа и му одзедоа нож“, извети МВР.
Против него се поднесени пријави по Законот за оружје и Законот за прекршоци против јавниот ред и мир.
Македонија
Муцунски: Одлуките донесени во Хаг без водството на Трамп и САД, немаше да бидат можни

Министерот за надворешни работи и надворешна трговија, Тимчо Муцунски, на маргините на НАТО Самитот во Хаг, имаше интервју со етаблираниот американски тинк-тенк „Атлантик кансл“, соопштинија од Министерството. Во интервјуто говори за одлуките од Самитот, улогата на САД и претседателот Доналд Трамп во глобалната безбедност, како и за придонесот на Република Северна Македонија во Алијансата и одржувањето на регионалната и светската стабилност.
На прашањето околу НАТО Самитот, Муцунски кажа дека одлуките донесени во Хаг се „многу повеќе од успех“:
„Јас лично го нарекувам генерациски самит. Мислам дека одлуките што ги донесовме ќе имаат позитивни историски последици за идните генерации. Мислам дека беше клучно да се донесе одлука, особено за идните инвестиции потребни за членките и Алијансата“, рече Муцунски.
Тој посебно ја нагласи и важната улога на САД во донесувањето на овие одлуки.
„Сакам да нагласам дека без водството на администрацијата на Трамп и САД, никогаш не би ги донеле овие тешки одлуки. Значи, заслугата треба да оди таму каде што припаѓа. Но и одлично водство меѓу сојузниците, отвореност за дискусија и дебата, и фокус на тоа дека вложувањето во одбрана не е само за тврда одбрана, туку и за инвестиции во индустриската база, инфраструктурата, сајбер-отпорноста и слично. Затоа, повторно би го нарекол генерациски самит. Минатите беа историски, но одлуките овде се многу повеќе од историја. Станува збор за нашата иднина. Генерациски самит. Тоа е навистина моќно“, рече министерот Муцунски.
Заборуваше и за нашиот придонес како една од поновите земји членки на НАТО.
„Ние сме нација која сериозно го сфаќа членството во НАТО. И веќе планираме како да го достигнеме прагот од 5%. Покрај инвестирањето во армијата, за НАТО мисиите сме присутни од Балканот до Балтикот, со нашите храбри војници кои ја претставуваат нашата горда нација и придонесуваат за колективната безбедност. Американците треба да знаат дека македонските сојузници се со нив. Рамо до рамо – од Балканот до Балтикот. Тоа е добар начин да се каже“, рече министерот Муцунски.
„Атлантик кансл“ е американски тинк-тенк во областа на меѓународните односи, кој застапува атлантистички пристап и е основан во 1961 година. Управува со шеснаесет регионални центри и програмски единици кои се фокусираат на меѓународната безбедност и глобалниот економски просперитет.
Македонија
ДУИ укажува на дискриминација во МВР: Полицајци Албанци со 20 години искуство не уживаат право на унапредување

Демократската Унија за Интеграција изрази загриженост за јавните изјави на Независниот полициски синдикат, кои, според партијата, потврдуваат една горчлива реалност: систематската дискриминација на албанските полицајци и неможноста за нивен напредок во полициската хиерархија.
„Според претставници на Синдикатот, и покрај тоа што многу албански службеници имаат над 20 години работно искуство и ги исполнуваат сите професионални услови, тие не уживаат право на унапредување. Во населените места со албанско мнозинство, раководното претставување е изедначено со македонското, додека во средини каде што Албанците се малцинство, речиси и не постојат во раководните структури. Ова е јасен пример за прекршување на принципот на правична и соодветна застапеност и дополнителен доказ дека оваа влада дејствува на етничка основа, спротивно на Уставот, Охридскиот договор и европските стандарди за еднаквост и инклузивност.
ДУИ оценува дека оваа постојана дискриминација не само што го поткопува моралот и мотивацијата на албанскиот кадар во полицијата, туку сериозно ја нарушува и довербата на албанските граѓани во државните институции“, соопшти ДУИ.
Партијата упати апел на сите надлежни институции итно да ги истражат овие дискриминаторски практики и да преземат конкретни мерки за обезбедување еднаквост во унапредувањата, вработувањата и одлучувањето во рамките на Министерството за внатрешни работи и пошироко.