Додека струјата поскапува 7,5 %, ЕЛЕМ распишува јавна набавка на газирана и негазирана вода за речиси 3 милиони денари, изјави Стевче Антовски од ВМРО-ДПМНЕ.

„Власта на Заев во екот на зголемување на цената на струјата не престанува ниту со разузданото трошење на народните пари. Тоа го прави токму преку ЕЛЕМ, еден од чинителите поради кои се поскапува струјата. Имено, на 29 јули, два дена пред поскапувањето на струјата, ЕЛЕМ склучило договор по тендерот за јавна набавка на минерална газирана и негазирана вода, што го распишала компанијата во износ од речиси 3 милиони денари или околу 50 илјади евра за потребите на РЕК ‘Битола’. Компанијата, која за да го заштити својот профит, бараше поскапување на струјата, во исто време набавува вода во износ од 50 илјади евра само за РЕК ‘Битола’“, рече тој.

Со други зборови, додаде Антовски, народот ќе плаќа поскапа струја 7,5 %, а ЕЛЕМ ќе набавува газирана и негазирана вода од речиси 3 милиони денари или 50 илјади евра.

„Ова е само еден од показателите на недомаќинското работење на власта на СДСМ и Заев. Тие изминатиов период во енергетските компании, каде што платите се далеку над просекот, вработуваа партиски војници, непотистички вработуваа роднини на функционери, делеа бонуси, правеа сомнителни милионски тендери, цело време со парите од граѓаните, за сега без срам да бараат народот да им го плаќа нивното неодговорно работење“, рече тој.