Македонија
(Видео) Апасиев алармира: Под превезот „работно ангажирање” се легализира експлоатацијата

Пратеникот и лидер на Левица, Димитар Апасиев, на јавната расправа на Комисијата за економски прашања, труд и енергетска политика, ги посочи потенцијалните закани и сериозните пропусти содржани во Предлог-законот за работно ангажирање на лица, предложен од пратеници од ВМРО-ДПМНЕ и СДСМ.
„Законот и покрај сите хвалоспеви има суштински недостатоци кои имаме време како Собрание да ги поправиме. Законот, според мое стручно гледање е антиисториски, затоа што нѐ враќа еден чекор назад и е реакционерен. Е сега, ние измислуваме топла вода, измислуваме „работно ангажирање” или „ангажман”. Значи имате дело-облигација, имате работа или вработување-трудот, трудовоправен однос, и сега ние измислуваме во средината нешто што ни риба ни девојка, односно е работно ангажирање на луѓето” – истакна Апасиев.
„Не се согласувам со колешката дека е наменет за доброто на студентите, затоа што видете го изборот кој ние им го нудиме со овој закон: можат да бидат само келнери, аргати, чистачи и бејбиситери. Аргументот „флексибилност на пазарот на труд” е еуфемизам. Тоа е друго име, покултурно, за кратење работнички права, за нешто што до вчера сте го имале, а од утре ќе го немате. Законот е правен по мерка на пазарот на труд, односно на работодавачите. Каде се работниците? Зошто синдикатот, ако е толку добар Законот, не го поддржува овој Закон?” – праша лидерот на Левица.
„И не се согласувам дека има консензус помеѓу власта и опозицијата. Има договор помеѓу ВМРО-ДПМНЕ и СДСМ. Левица никогаш не се потпиша како опозициона партија токму поради овие дилеми. Да, постојат скриени работни односи. Но дали е овој начинот за решавање, со лекс специалис, со измислување нешто ново? Зошто не би го решиле правото на сезонска работа или проблематиката на сезонската работа со само една глава во основниот закон за работни односи, каде што и веќе има одредби за сезонска работа? Значи, со тоа што сивата економија ќе ја направиме бела, не е начинот во измислување топла вода во правото, туку во примена на прописите. Од облигација, односот да стане трудово правен и да биде регулиран. Овој закон тоа не го прави” – кажа Апасиев.
„Исто така, имате елементи на противуставност во самиот закон, а тоа е дека не се почитува правото на платен одмор. Трите осмици се придобивка цивилизациска, осум часа да работиш, осум часа да спиеш и осум часа да имаш за културни и забавни активности, хоби и слично. Значи, тука имате враќање на дванаесетчасовно работно време. Тоа е на раб на противуставност. Следно, детски труд – имате малолетници кои ќе ги ангажирате и никаде не е дефинирана нивна заштита. И каков ќе биде спорот кој ќе произлезе од овој однос? Со што ќе го заштитиме односот кој ќе стане спорен? Овдека не е предвидено со каква тужба ќе се штитат работниците при спорови. Дали тоа ќе биде парница обична, каде што важат многу подолги рокови, се чека со години, или ќе биде итна постапка во работен спор. И тоа не е дефинирано” – посочи тој.
„Значи, под превезот на флексибилноста, на сивата економија, на скриените работни односи кои ги решаваме – можеме да отвориме други прашања. Исто така, не се согласувам дека ова нема да доведе до бркање од работа, знаејќи ги лукавштините на нашите газди, еве ви пластичен пример од пракса: имам земјоделски комбинат, ми требаат аргати, ми требаат сезонски работници – зошто јас да ги вработувам сегашните? Ќе ги отпуштам од работа и ќе вработам нови, по овој новиот закон. Наместо неопределено работно време, ќе им плаќам саатнина“ – даде пример Апасиев.
„Идеалот на трудовото право е сите да имаме неопределен работен однос. Ова нѐ враќа еден чекор назад. Ова измислува топла вода во правото, а тоа е работно ангажирање. Не постои такво нешто. Договорот е или трудов или облигационен. Нема средина, а сега ние измислуваме средина. Оттука мислам дека и покрај добрата волја, патот до пеклото е поплочен со добри намери. Законот има многу празнини коишто можат да се злоупотребат во пракса. Ако има добра волја со амандмани, нешто може да се коригира” – упати апел пратеникот.
„Но, не мислам дека само мануелните работи треба да се досредат, бидејќи младите луѓе претежно извршуваат интелектуални работи. Тоа значи IT, фриленсери, диспечерски работи кои не се мануелни. Оттука нивниот проблем повторно нема да биде решен. Така што мислам дека има многу голем простор за подобрување на ова законско решение” – заклучи пратеникот пд Левица, Димитар Апасиев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
(Фото) Левица: Учениците во „Ѓорѓија Пулевски“ учат во подруми со влага и смрдеа

Учениците од шесто одделение во основното училиште „Ѓорѓија Пулевски“ во општина Аеродром наставата ја следат во подрумски простории со влага, непријатна миризба и без природна светлина, реагираат од партијата Левица.
Од таму посочуваат дека ваквите услови се недостоинствени за било кое училиште, а не за основци кои треба да учат во здрава средина.
„Овие услови се недостоинствени дури ни за затворски ќелии, а камо ли за деца кои треба да растат во здраво и безбедно училишно опкружување. Загрижени родители алармираат дека на некои ученици им се слошило и повраќале поради неподносливата миризба на мувла и влага“, соопштија од Левица – Аеродром.
Според нив, локалната власт ја сноси целата одговорност за понижувањето на најмладите и изложувањето на здравствен ризик.
„Дополнителен скандал е фактот што ДПМНЕ пред четири години ветија целосна реконструкција на училиштата во општината, но во изминатиот мандат не направија ништо. Наместо елементарни услови, децата се приморани да учат во простории со влага и смрдеа“, додаваат од партијата.
Левица бара итно преместување на учениците во други училници и обезбедување нормални услови за образование.
Македонија
Земјотрес ги разбуди струмичани, епицентарот бил во Валандово

Телеметриската сеизмолошка мрежа на Македонија ноќеска во 02:13 часот регистрираше земјотрес со локална магнитуда 2,2 степени според Рихтеровата скала, со епицентар во епицентралното подрачје Валандово, на околу 116 километри југоисточно од Скопје.
Според Сеизмолошката опсерваторија при Природно-математичкиот факултет во Скопје, потресот бил почувствуван во Струмица и околните места со интензитет од III степени според Европската макросеизмичка скала.
„Се работи за послаб земјотрес кој нема потенцијал да предизвика материјални штети, но поради блискоста на епицентарот, граѓаните во дел од југоисточниот регион го почувствуваа потресот“, велат од Сеизмолошката опсерваторија.
Надлежните апелираат дека ваквите земјотреси се вообичаени за нашето подрачје и дека нема простор за паника.
Македонија
Македонци заминуваат кон грчките плажи, продолжениот викенд предизвика хаос на „Богородица“

Сообраќајот на државните патишта се одвива непречено и по суви коловози, но зголемената фреквенција на возила поради летните одмори и продолжениот викенд во Македонија предизвикува гужви на граничните премини.
Најголеми задржувања моментално се бележат на ГП Богородица, каде за излез од државата се чека околу 40 минути до 1 час. На ГП Табановце, пак, времето на чекање за влез и излез изнесува околу 30 минути. Од другите гранични премини од македонска страна не се евидентирани подолги задржувања.
АМСМ ги потсетува возачите да возат со прилагодена брзина, да ја почитуваат сигнализацијата и да бидат особено внимателни на делниците низ котлини, речни долини и клисури каде е можна појава на одрони. Како критични делници се наведуваат Катланово – Велес, Маврово – Дебар – Струга, Виница – Берово и Кочани – Делчево.
Воедно, возачите треба да бидат подготвени за времен режим на сообраќај. Од 3 септември започнуваат градежни истражувачки работи на делницата Гостивар – Тетово, што ќе траат две недели и ќе се одвиваат под изменет режим. Дополнително, во тек е и санација на мостот Здуње на државниот пат А2 (Гостивар – Стража), каде е воспоставена семафоризација и наизменично пропуштање на возилата во период од шест месеци.