Македонија
(Видео) Апасиев: Само со мртов претседател законот може да влезе во сила
Законот за јазиците е мртво новороденче, а без потпис на претседателот Ѓорге Иванов не може да влезе во сила бидејќи собранискиот спикер Талат Џафери може да го потпише само доколку имаме мртов претседател, тврди докторот по правни науки и професор, Димитар Апасиев, за „Макфакс“. Против одлуката на претседателот Иванов не постои правен лек, вели тој.
„Џебното вето значи дека законот за јазиците е мртво новороденче, не може да влезе во сила бидејќи не може да се објави во ‘Службен весник’. Ако нема указ, тогаш нема ни закон. Ова е уставна празнина во нашиот систем што досега е користена во два наврата. Оттука, има уставен обичај и прецедентно право и третпат да се искористи. Доносителите на законот го знаеја тоа и упорно и силеџиски, преку прекршување на сите одредби кои се однесуваат на нормално, односно деловничко носење закон, го донесоа на мускули. Сега се наоѓаме во позиција законот да не може да влезе во сила, без потпис на претседателот“, објаснува професорот Апасиев.
Анализата на Апасиев покажала дека од 25 члена, кои ги има во законот, прекршување има во 17-18 уставни елементи, што, според него, покажува дека законот е пишуван од прилично слаби правници кои ги измешале термините што не може да се мешаат во закон. Освен материјата, по гласањето, спорно е и тоа што не се расправаше по амандманите и, како што вели Апасиев, донесен е на силеџиски начин.
„Како пример, според нашиот Устав не можете да регулирате судска постапка со закон што ќе биде донесен со помалку од 80 пратеници плус еден. Не можете без двотретинско мнозинство да регулирате судска постапка. Во овој случај се регулираат судски постапки со 64 гласа. Тоа е невозможно право и е противуставно“, вели Апасиев.
Законот донесе зголемување на национализмот, враќање на ДУИ на политичката сцена, иако беше против изумирање по последните избори, и тој нема врска со правата на малцинските заедници, коментира Апасиев, кој додава дека постојниот закон ги унапредува правата на Албанците, а со тоа нема потреба од втор закон и тој е резултат на политичка своеглавост.
„Собранието не може да го донесе истиот закон во ваква форма. Друг закон, со друга форма, во нормална процедура, во иднина може да се донесе. Овој закон има вето и е клинички мртов“, коментира професорот Димитар Апасиев.
Носењето на законот во ваква постапка може да ја донесе во прашање препораката што следуваше за Македонија, како што вели Апасиев, по падот на режимот, а овој потег може да ја уназади европската иднина исто како ставањето на европското знаменце со кое се изигрува довербата на Унијата.
„Коалицијата и угодувањето на ДУИ, особено за овие националистички прашања, ги чинеше пад на изборите во 2006 година. СДСМ не учи од своите грешки. Тиранските платформи не беа дискутирани во предизборниот период. Народот е со право резгиниран, а не остана човек што верува во политичарите. Приоритети се судските и економските реформи, а не малцинските права што се затворени со Охридскиот договор“, вели Апасиев.
ВМРО-ДПМНЕ со право може да направи политички маневр и да не ги усвојува законите што зависат од нивното мнозинство, оценува докторот по правни науки додавајќи дека СДСМ ги троши последните кредити бидејќи губи драгоцено време каде што нема реформи и резултати, а тоа резултира со апатичност кај народот. Со начинот на гласање за законот за јазиците ќе добиеме само зголемени меѓуетнички тензии, а СДСМ како партија можел да одбие да се донесе законот и по цена да падне Владата бидејќи е противуставен и го надминува Рамковниот договор, смета Апасиев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Мециновиќ: Владата води историски најопасна надворешна политика по државните интереси
На денешната седница за пратенички прашања, пратеникот од Левица Амар Мециновиќ даде критички осврт на надворешната политика која ја води владата на ВМРО-ДПМНЕ. Мециновиќ на почетокот се осврна на тоа зошто министерот Муцунски не е присутен на пратеничките прашања и праша дали можеби неговото отсуство е поврзано со градењето на новиот објект на покривот на Министерството за надворешни работи.
„Јас и претходно реагирав за едно многу контроверзно гласање во Генералното собрание на Обединетите Нации. Тоа е гласањето против обидот за носење на резолуција за прекин на огнот во Газа. Тогаш вие гласавте против, надвор од очекувањата на македонското општество и надвор од традицијата дипломатска која Македонија ја има”, истакна Мециновиќ.
Пратеникот од Левица дополни дека ова е првиот владин кабинет за надворешна политика кој гласал против кревањето на ембаргото на Куба. Ваквиот чекор според Мециновиќ претставува најгруб дисконтинуитет во традицијата на македонската дипломатија.
Тој се осврна и на односите со Кина, безвизниот режим и прашањето за Тајван, како и на поширокиот геополитички контекст на продлабочена криза во трансатлантските односи. Ја обвини Владата дека во момент кога САД стануваат сè понепредвидлив партнер, таа ја врзува Македонија исклучиво за американската линија, занемарувајќи ја европската траекторија.
„Албанија воведе безвизен режим со Кина и се приближува кон Европската Унија. Вие не воведувате безвизен режим и се оддалечувате од Европската унија. Моето пратеничко прашање е: каде оди овој брод?” – праша пратеникот од Левица.
Македонија
Министерство за правда: Собранието ја изгласа потребата од носење на Предлог законот за Судски совет
Со мнозинство гласови пратениците ја изгласаа потребата од носење на Предлог законот за Судски совет. Законот се проследува на второ читање, информираат од Министерството за правда.
Министерот за правда Игор Филков во своето обраќање рече дека со овој закон во министерството е започната нова ера на работа и функционирање, во којашто секој битен и суштински закон за граѓаните на Република Македонија ќе се изготвува низ отворен, јавен и транспарентен процес.
,, Клучни новини кои се предвидени со Законот се:
Јавност во постапката за разрешување на претседател на Судскиот совет,
За прв пат прецизирање на критериумите за избор на „истакнат правник“.
Воведување јавна расправа при избор на кандидатите за не-судски членови со цел поголема транспарентност и одговорност,
Зајакнување на критериумите за избор, одговорност и разрешување на членови на Советот од редот на судиите,
Јасно прецизирање на постапката за дисциплинска одговорност на судиите, но и на членовите на судскиот совет,
Воспоставување обврска Судскиот совет да ги прецизира, индивидуализира и образложи одлуките за избор и утврдување одговорност на судиите,
Утврдување на рокови за преземање дејствија за дисциплинска одговорност на судиите, како и прецизирање на основите и постапката за жалба против одлуката на Судскиот совет, како и
бројни други решенија за унапредување на целокупната правна рамка согласно препораките на ЕУ”, рече Филков.
Тој изрази жалење што дел од опозицијата не беше присутна на седницата за носење на, како што оценува, исклучително важен закон кој е дел од Реформската агенда.
Македонија
Утре, во утринските часови наместа со појава на магла, во текот на денот сончево со умерена облачност
Утре во утринските часови наместа ќе има појава на магла, а во текот на денот сончево со умерена облачност и претежно тивко. Во северозападните делови повремено ќе има зголемена облачност со услови за слаб дожд.
Минималната температура ќе биде во интервал од -4 до 1, а максималната ќе достигне од 8 до 13 степени.
Во Скопје, претпладне во делови од котлината ќе има појава на магла. Во текот на денот времето ќе биде умерено до значително облачно и претежно тивко.
Минималната температура ќе се спушти до -4, а максималната ќе достигне до 8 степени.
Во наредните денови продолжува периодот на стабилно и претежно тивко време. Во утринските и ноќните часови по одделни котлини ќе има појава на магла.

