Македонија
(Видео) Арсовски: Гази Баба – еклатантен пример за сомнителни тендери

Местењето тендери во СДСМ не е ништо ново, тоа е она што го говориме 4 години, тоа е она што го знаат граѓаните, тоа е она што сите го гледаат и имаат докази, само, за жал, ЈО и антикорупциската комисија немаат докази. Денес, ќе презентираме и ќе продолжиме, ќе се надоврземе на вчерашните докази за тендерот за улично осветление во Гази Баба, каде што јавноста треба да утврди дали фирмата „Дигитал“ ДООЕЛ со очигледни евидентни податоци на однапред договорени цени добила тендер?, истакна на денешната прес-конференција Димче Арсовски, портпарол на ВМРО-ДПМНЕ.
„Фирмата ‘Дигитал’ ДООЕЛ добила тендер за јавно улично осветление со цени на кои се надоврзуваме на вчерашната прес-конференција, и тоа: на пример, за набавка и вградување натриумова цевеста светилка од 70 вати над 6.600 лумени, понудената цена е 10.000 денари за парче, а за истата светилка со моќност од 150 вати над 17.500 лумени, која по логика на нештата треба да е двојно повисока, понудената цена е само 1.000 денари. Дали е ова нормално? Или, на пример, за набавка и вградување придушувачи цените се следни: од 70 вати чини 2.500 денари за парче, а двојно и петпати помоќни од 150 вати и 400 вати чинат по 1 денар за парче. Кој кого манипулира?“, посочи Арсовски.
Ова, како што напомена тој, е само дел од цените и начинот на кој има простор за сомневање за предност во добивање на тендерот од страна на оваа фирма „Дигитал“ ДООЕЛ во општина Гази Баба, но, за тоа, како што рече, треба да утврди и Јавното обвинителство дали имало такво нешто или не.
Посочи дека антикорупциската комисија исто така требаше веќе да има отворено случај, но очигледно дека сака, додаде Арсовски, да скрие сомнеж за криминал и воопшто да не истражува каков било криминал во овие јавни набавки.
„Ваквиот начин на функционирање и добивање тендери очигледно добро функционирал како пракса секаде, ама баш секаде онаму каде што СДСМ има свои кадри за функционери. Дали сега на јавноста ѝ е јасно како СДСМ ги трошел нивните пари? Истото се случува и во институциите на државната власт, каде што СДСМ ја има централната власт, што всушност покажува дека не се работи за изолиран случај, туку за начин на функционирање на СДСМ како политичка партија и неговите кадри. Парите на граѓаните на овој начин биле испумпувани и завршувале во нечии џебови. Да не се чудите после како од просечни граѓани, функционерите стануваат милионери, а пред тоа немале никаков основ да заработат огромни суми пари“, нагласи портпаролот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Елитната полициска единица ЕБР прослави 24 години постоење

Со свечена церемонија вечерва на градскиот плоштад во Кавадарци беше одбележан 23 август – Денот на Единицата за брзо распоредување (ЕБР) и 24 години од формирањето на оваа елитна полициска единица при Министерството за внатрешни работи. Настанот се одржа во присуство на премиерот Христијан Мицкоски, раководството на МВР, министри, пратеници, претставници на институциите и локалната самоуправа, полициските синдикати, како и семејства на загинати и починати припадници на ЕБР.
Граѓаните на Кавадарци имаа можност да се запознаат со опремата на единицата преку концептот „До вас, за вас“ и да се дружат со припадниците на полицијата.
Министерот за внатрешни работи, Панче Тошковски, во своето обраќање истакна дека ЕБР е симбол на сигурност и доверба, формирана врз темелите на професионализам, пожртвуваност и верност кон државата.
„Во изминатите две и пол децении, ЕБР се втемели како симбол на сигурност и брза реакција, вистински штит на државата и граѓаните. Ниту еден припадник не се двоуми да преземе одговорност и да дејствува во најризични ситуации, каде што секунда одлука може да значи спас на човечки животи“, порача министерот Тошковски.
Тој додаде дека токму оваа единица има незаменлива улога во борбата против криминалот и корупцијата.
„Разбиени се опасни криминални групи, расветлени стотици дела, запленета е дрога која ќе завршеше кај младите, спречени се илјадници обиди за нелегален влез во државата. Дојде време да покажеме дека државата е посилна од криминалот и дека институциите ја враќаат довербата кај граѓаните“, истакна Тошковски.
На свеченоста зборуваа и досегашниот командант на ЕБР, Зоран Јанаќијев, кој даде свое видување за иднината на единицата, како и градоначалникот на Кавадарци, Митко Јанчев, кој ја поздрави иницијативата „До вас, за вас“.
Беа доделени плакети на најистакнатите припадници на ЕБР, а претходно во текот на денот беше положено свежо цвеќе пред спомен-обележјето во чест на загинатите херои на единицата.
Македонија
„Корумпираната држава ни ги украде децата“, потресни сцени на маршот во Кочани

Родителите, семејствата и пријателите на младите кои трагично ги загубија животите во пожарот во дискотеката „Пулс“ повторно одржаа марш во Кочани. Повторно се гледаа солзи, тишина и болка, а поворката ја следеа фотографии на загинатите кои нивните родители ги носеа во рацете.
„Корумпираната држава ни ги украде децата. Корупцијата ни го одреди местото каде да ги славиме нивните родендени – на гробиштата. Ни го украдоа сонот, ни ја скратија иднината, а болката ја претворија во наша секојдневна реалност. Бараме правда за нашите деца, бараме крај на корупцијата“, пишуваше на еден од транспарентите.
Слична порака се појави и на друг транспарент: „Моето дете умре, беше убиено од систем кој не штити, туку убива.“
Особено емотивен момент предизвика Мита Тасева, мајката на загинатиот диџеј Стефан Тасевски, чиј роденден се совпадна со маршот.
„Денес небото одекнува од твојата музика, синко наш. Слави го роденденот со ангелите“, порача таа, оставајќи длабока тишина меѓу присутните.
„Ние, родителите, скапо го плативме данокот на корупцијата“, стоеше напишано до фотографиите на младите кои повеќе не се меѓу живите.
Овој марш уште еднаш ја отвори болната тема за безбедноста, одговорноста на институциите и вечната битка на родителите – правдата за своите деца.
Македонија
Сајкоски: Собранието е дом на граѓаните, законот за финансирање донесе нова поддршка

На денешниот Саем-Отчет „4 години работа за тебе“ учествуваше генералниот секретар и пратеник на ВМРО-ДПМНЕ, Ѓорѓија Сајкоски, кој порача дека Собранието останува клучен претставнички дом на граѓаните и преку носење квалитетни закони работи за подобрување на нивниот живот.
„Собранието претставува претставнички дом на граѓаните и со самото тоа се труди најмногу да врати на граѓаните преку носење на квалитетни закони, подобрување на законите и сè она што во делот на локалната самоуправа треба да се направи, за да се подобри таа легислатива“, изјави Сајкоски.
Тој посочи дека изминатата година биле донесени суштински закони кои овозможиле на општините дополнителни средства за реализација на значајни проекти. Како пример го наведе законот за финансирање на локалната самоуправа, преку кој општините добиле повеќе средства за развој.
„Собранието донесе и закон за заем со кој се овозможија средства на секоја општина, што до сега не било. Вкупно 80 општини добија поддршка од Владата за да реализираат проекти. Овие проекти што сега се спроведуваат се суштински и неопходни за граѓаните“, истакна Сајкоски.